20-04-07, 05:31 AM
نــحــس
يا نحس يا حاصد جنايي بمنجَلك
دخلك عليي قول مين موكلك؟
عندك بَشَر غيري اعتقني يا نحس
ولا بد ما تلقى شي صاحب يحملك
لا بد ما تلقى بدالي شي رفيق
تشلح بوجّو حجار ع طول الطريق
تسهر معو وتنزع صباحو بس يفيق
وتجاوبو بالعكس كلما يسألك
وتجاوبو من الشرق لو بالغرب كان
وتنكّد بعَيشو إذا راق الزمان
وتبعّد دروبو عن دروب الأمان
تكتب نحس حظّو على براج الفلك
تكتب نحس حظو على طول الحياة
حتى إن خلق مرّات من بعد الممات
يولد شخص ملعون مكروه الصفات
يفشل بسعيو كيف ما دربو سَلك
يفشل بسعيو كيف ما وجهو بَرَم
ويحصد ندالة بوقت ما زارع كَرَم
ويخفت ضِيا شمعة شبابو ع الهرَم
والعتم يطفي النور ويسود الحَلَك
والعتم يطفي النور ويسوء المصير
ويصير أعمى الكان بالأول بصير
وبتتركو يا نحس معدوم وكَسير
وبقلب غيرو تروح تبني منزلك
