قالت ما بدّي مأخّري ومقَدّمي
قلتلها ان بدّك عيوني مقدّمي
إنتي الأخيرة وبغلاكي مقدّمة
عن كلّ شي نسوان حبّيتن أنا
قالت ما بدي مقدمي بدي مهر
نعلا على بروج السما ..النجمة مهر
واكتب كتابي عالبدر واختم مهر
في نعل مهرك فوق مهرو معنونا
قالت قَبل منّك حياتي ماحِلة
وكل شي انكتب من قبل، حُبك ماحِ لي
قلتلها العنقود بعدو ما حِلِي
ولما بيحلى رح بجي قطّف أنا
قالت حياتي قبل منك مالها
إلا المآسي والمصايب مالها
ولما هواها صوب منك مالها
سيف السعادة دبّح ليالي الضنا
قالت بلاك العمر يا ولفي عدم
هجرك حنيني بمرسة الحيره عدم
تخمينك بتفرح وانا بسكر ع دم
دمّ الحزن والقهر من جرح وعنا
قالت ودادي مواسم الطيبه هدي
متلو متل ناسك على الحكمه هدي
لكن جنونك يا وليفي ما هدي
غر من بعد ما شرّعت باب المنى
قالت دخيلك من دموعي حاجتي
مهما نزفت مش رح بصرّف حاجتي
وبدّك لحاجك رح بسرّح حاجتي
وع مسؤوليتي اتركهن بوهج وسنا
قالــت : الفضـــة اليوم حقــــك صارفهِ
وتا إصلبك .. عيني النظـر مـش صارفهِ
قلت: الشرط ..صدرك جْلِجلة ن صار في
ومــابــين هاللصيـــن اتمســــمر انــــا
-------------------------------------------------------------
قالت جنونك بالليالي أدمني
مع ظروف عار وقلت ماشي أدمني
يا بنت حاجي في عذابك أدمني
حـّى ضمير الأدمني عاف الضنا
قالت إنت بدّي تكون معلّمي
تَ صير بفنون الغرام معلـِّمة
قلتلها عيونك بقلبي معلـِّمة
ومن رفّة رموشك عبتعلّم أنا
قالت إلي حاجي بقا تكتب شعر
وتتغزل بطولي وبأحلى شعر
خوفي إذا بيي بمقصودك شعر
من غضبتو رح نندبح انت وأنا
قلتلها صعبي بلا وصفك نعش
يلي هواكي ل أحاسيسي نعش
نشالله نموت بشرط يجمعنا نعش
حتى سوا في قبرنا نعيش بهنا
قالت حبيبي اللي حلمتو إنتَ هو
وكل اللي مرْقوا قبل منَّك انتهوا
قلتلها عيوني، نهيتُن وانتهوا
ما يقشعوا غيرك وبس إنتي المُنى
قالت حلو إنت وأنا دخل الحلو
وقلبي وقت شاف الحلو داخ للحلو
وعقلي عم بيسأل على دخل الحلو
قلتلها طفران ومفلس أنا
قالت يا وعدي أخ قلبي شو بكي
م قدرت ع مصابي اسألها شو بكي
ممرمر انا دخلك دموعي شوبكي
بخيوط عطفك والمحارم والهنا
بشالا الحلو يا نسمة الصبح العبي
غِلّي بعطرا وفلفشي شَعرا العَبي
ضيعان جسما تخنقو سود العِبي
وزهر الـ ع صدرا فتّح وناطر جنا
قالت شبعنا للوفا تعطي وعود
دخلك حبيبي جرحنا خفف وعود
وبعد العتاب ع الحضن ارجع وعود
وبالعاطفي رمّد جمر حرماننا