منتديات مشتاوي

الله يا مشتى .. ما أحــــــــــلاكي **** شـــو كان طعم العمر لولاكي
يا شـــهقة الأحبـــــاب للأحبـــــاب *** يا طيـــــر يتنقــــــوز عَ شبّاكي
رسمتك شمس شقرا ما إلها غيــاب *** تولدن بإيــــدو الغيـــــم محّاكي
كتبتك قصيدي خصـــرها منســاب *** متــــل الدلب عَ القنطـــرا تاكي

وينزل على غصونك قطيع ضباب *** بغفــــلة قمــــر نعسان يرعاكي
وكل ما بيســــمع ترشـــقة مزراب *** يركض على سريرو طفل باكي
كـــل ما يا مشـــتى قلب فيكي داب *** بيكــــون معــــــــروم بحناياكي
وكل ما نْ كتب بالشعر فيكي كتاب *** لا تفـــــزعي لوما قروكي ليوم
بكـــرا بتجـــي الأجيـــال تقراكي



ويا كتــــابي من الزمن لا تخـــاف *** حروفك أزل والسرمديّي غـلاف
عصـــــرت دمّــاتي وسقيتك خَمر *** يــــوم لكنت آكـــل رغيفي حـاف
يا كتابي : يــــا رفيــــــق العــــمر *** يا حبــق ناطـــــر موعد النّفنـاف
بجدايـــل الّلهفي غمــــرتك غَمــــر*** والبحــر دمعـــا والرّمش مقـداف

صفحــــاتك بيــــــادر حنينك غْمر *** نبيـدك نهـر جمرك وهج وضفاف
ما قبـــلت حتّــى من الخـــالق أمر *** ولا خــاف عنقــــك شفرة السيّاف
عصرتك شفق صارو الّليالي حمر *** دلقتـــك مــدى نبيـدي بقمر شفّاف
سكبتك بكاســـي نبيـــد فوق الجمر *** وشربتك " نبيــد وجمر وشفاف "



لعاشو عمـــر عمـرين عَ حسـابي *** وسرقو شقا عمري وأتعـــابي
وفرضــو عليّي الفقــر والحرمـان *** وإيدهــــن للبـــــاط بجيـــابي
وراقبــــــو بالمطبعــــا الدّيـــــوان *** ووقفـــو متــــل حيّات نشّابي
نْ كنّو شي سطر بيزعج السـلطان *** يمّــا شـــي كلمي حرفها نابي

عنهـن أنا بالعمـــر مش ســــألان *** ولا بتسأل الخمره عن الخابي
وحتّى كتــــابي يكون مش زعلان *** ســقيتو دمــوعي حبر عنّابي
ومنشـــان رجّــــع قيــمة الإنسـان *** نفّضــت غبـــرتهن عن تيابي
ورحت وقعتـــو بحــما لبنــان *** وليـــوم عَ مشـــتى الحلو طليت
منشـــان فيــــها وقّـــع كتــــابي


لبنــــان يـــــا رنـــــدوحة معنّى *** حلوي بليـــلة صيف تتـــغنّى
لوحا بإيد الصبـــح مرســــومي *** عليـــهـا ضميــــر الآلها تأنّى
كترت ما فيـــك الدول مغرومي *** يـــا رفيقنــا وياخــــيّ موطنّا
صارو من حواليك " سالومي " *** بليـــلة غوى تا صرت يوحنّا

لبنــــان يا أمجـــاد عـــــم تومي *** شــو بالحكومي صـــار طمنّا ؟؟؟
بعدهـــــــا الآراء مقســــــــومي *** وكلمــن بِ دولي عــم بيتكنّا
بدكن حكومي تكون محكومي ؟؟ *** مــا حلّــكن تتعــلّـمو منّـــــا
نْ مــا قـــدرتو تشــــكّلو حكومي *** نحنا في عنّا جاهز وتفصيل
نقّـــو حكـــومة شـــعر من عنّـــا

يا أبـــونا لصغت كلمـــاتك *** بنــور الإله وروح صلواتك
كلمــــاتك لّــــي كلّن محبّي *** يلّي بيحكـو عن صدق ذاتك
بحيثك على الإيمان متربّي *** وساكن ضمير الحق جوّاتك
بتفـــوّح البخـــــور بالجبّي *** وبتروحن الكلمي بوعظاتك


ويا فــرات الزنبــق الميّـاس *** كيف ما تميلي بيصير يميــل
وبيدوب متـل الشمع بالقدّاس *** لمّا بيســمع منّـــك تراتيــــل
خلقتي نبع بيفض بالإحساس *** متل الفراشي والشمس قنديل
بدهن بعــد بكرا يقولو النّاس *** لمّا فرات تصير تحكي شـعر
بدّو الفرات يضارب عْلى النيل

وعدنــان من تــاريخ ميــــلادو *** بقلبو محبّـــة موطنو زادو
يحـــرم عليه نْ داق جفنو النوم *** إلاّ بـــأرض أهلو وأجدادو
من بعد غربي من العتب والّلوم *** بســنين ينزكرو ما ينعادو
بتشرين راجع متـل طير الحَوم *** يرفرف على قرميدة التلّي
يمــرمغ جنــاحو بغبـــرة بـــلادو

ويا شاعر لْ غرْ شكل صب عطور *** تالزهر يســكر من ينا بيعك
غرْ شــكل عن كل لّي خطّو سطور *** غرْ شـــكل حتّــــى بتوقيعك
الكــلمي ما بتنقّــط وحـي وشـــعور *** إلاّ إزا بالشــــعر بتطيــــعك
ومنهــا ما بيفـــوح الشـــعر بخّــور *** تا تحترق من جمر صابيعك

ويا سيّد الملكوت أنت الّلون *** الشعري لمأسس عالمدى العلمي
لوما لهَا لمنبر تقــدّم عــون *** ما كـــان داوا قـــلوب منكـــلمي
بهنّيك لمّــا أعلنـت من هون *** ثـــورة لهيب النّـــور عَ الظلمي
وعا ثورتين بينبـني هالكون *** ثـــورة الحـــرف وثورة الكلمي

وليم حقيقا بالشـــعر مش فرض *** وها لمدرسـي لبينتمي لَيْهــا
لوما دفـــع ألها حيـــــاتو قرض *** ما كحّــــلت بالنّور عينيهــا
"وعاصي " لكان يقول العَرض *** تا تةقف الفرقة عَ إجريهــا
دعّمـــو أربـــع زوايـــا الأرض *** بيجـــوز وليم يعس عليــها

شو قيمة الرابـي على النيشــان *** نْ ما كان حكّـــم كلمتـــــو عن صيب
وشو قيمة العمر بسما الأنسـان *** نْ مـــتا كلّـــل جبـــينو وقــــار الشيب
وشو قيمــة الدنيــــا بلا الديّــان *** نْ مـــا كـــان متمرّس بعــــــلم الغيب
وشــو قيمة الأرزي بـــلا لبنان *** وشو قيمة الكلمي بلا " موسى زغيب "

الشّـاعر نهــر عمق الدى ضفافو *** سـيف البرق طالع من غـلافو
عتّــق ســــنينو من الصبا للشيب *** نبـيدو وجمــرو وشهقة شفافو
وحيــاة تاريخك يا موسى زغيب *** لتـعّب دنــــي وما تعبت كتافو
بحكــي الحقيقة بـدون شك وريب *** عَ الشعر بــدّي تطمّن الشّعار
كلشــي وأنـــا موجـــود لا تخـــافو


ــــــــــــــــــــــــــــــــــــــــــــــــــــــــ حسّـــــان بســـطاطي

ـــــــــــــــــــــــــــــــــــــــــ مشتى الحلو 15/ تشرين الأوّل / 2009

[COLOR="Navy"]قصيدة الشاعر الفنّان " وليم حسواني "
بتوقيع كتاب " نبيد وجمر وشفاف " مشتى الحلو
[/COLOR]
هـوّي حقيـقا أو حلم تَ لقيت *** وجّ الحبـايب متـل ما تمنيت
أحمـل لمشتى الحلو عطر الأرز *** تا كـون دَيـن محبتي وفيت
من كل أرزي حملت معّي كرز *** مصوّر بشعري كل حرف وبيت
وحبّيت عَ ديــار الوفا والعز *** إدفــا كأنّـي ما قطعت حدود
كنّي من البيت وصـلت عَ البيت

وشو العمر شو الأيّام شو الأزمان *** إلاّ سـفر عَ دروب متعـوبي
وهموم ترسـم عَ جفـن سهران *** غربي وحنيـن وشوق وعتوبي
من الكـرم ما بيضـل يا حسّان *** الاّ خمـور الفكـر مسـكوبي
ياما مرق شـاعر بِ هالأكـوان *** من تـراب لْ تـراب اوبقيت
كلمتـو عَ الدهـر مكتـوبي


برحلة جمـال بتلمحن أطياف *** هــاك لّي بحر الحسـن فيهن طاف
بتغلب تفتّشـلن على كلمـات *** فيهـن توفّـي الحســن والأوصاف
بتقطف من بحور البـدع آيات *** ومن البــلا غة المنطــق الشفّاف
بتقطف العطر السّاكن الوردات *** بتقطف الطهــر السّــاكن النفناف
بتقطف نعومة همسـة النسمات *** ورحــلة قلق من حلم ما بينشـاف
بتقشع الغنج لْ كحّـل الحلوات *** ما رتـــاح ألاّ عنــد ما حسّـان
قطفّــلن " نبيـد وجمـر وشفـاف "

شفنـاك تسكب شـعر عَ المنبر *** بعطــر النســيم ودمعـة الكوثر
شفنـاك رحلة حلم يا حسّــان *** بريشــة جمــال وموهبي مصوّر
شفنـاك تتغنّـا بســحر لبنان *** بوديــانّا وبــأرزنا الأخضــر
متـل كنّـك عنــدنا خلقـان *** وبينــاتنا لا حــدود لا مخــفر
محلاك ماحلا شـعرك المليـان *** بنكهــة المســـك وفوحة العنبر
محلاك تحكي ورد عَ الأغصان *** تض الورد عَ الأغصــان يتغنـدر
محـلاك يوميلك قمـر سهران *** شــعرك يغنّــي والقمـر يسـهر
محلاك تسـكب عَ الورق ألوان *** يحــلا الورق وبريشــتك يسـكر
ولمّا تســوح بمركـب القصدان*** وبحلمــك التيّــــاه تتـزنّـر
يصيرو القصيدي ودفترك خلاّن *** ســاعة الدفتـر بالقصيــدي يجن
ســاعة القصيــدي تجــن بالدفتر


لكن يا شـاعر ليش مش ممنون *** من ربّنـا والخلق والتكـوين
وبدّك صـلاة المؤمنـين تكون *** باقـة قصـايد شعر للحـلوين
بدّك تحكّـم بالبشـر لعيـون *** تا نضـل للحـلوين مرهـونين
وبدّك رئيس الكون يبقى بدون *** سـلطا ولا هيبـي ولا قـوانين
لنّـو تركـلو التلت حتّى يمون *** يحكـم ويمنـع أكـلة التفّـاح
عـلّي خلقهـن متلنـا شـياطين


مشتى الحلو يلّي شربت من منهلو *** مطرح ما عمرك شاف صورة أوّلو
مطرح ما فكرك ساح والقلب نزرع *** وقطفت شتول الموهبي من مشتلو
بحيّيـك من هاك المقـالع تنقـلع *** مقلع شـعر قدّيش ما حجـارو غلو
ضليت تزرع شعرك بهاك الضّيع *** تا صـار كلمن يحلم بأرض الجمال
يشـتاق لنّـو يمـرّ في مشـتى الحلو


وأنتو يا أهل الفكر والكـلمي *** للموهبـي أنتو الشـعر والعيد
بموسم الشعر بضحكـة الكرمي *** أنتـو الدوالي ودمـع لعناقيد
من وجوهكن شو طيّبي البسمي *** شـو طيّب الملقى و المواعيد
ليـل لّ كن ما طـالتو العتمي *** صبـح لّ كن أنـوار وتغاريد
نْ شـالله إلآه النّـور والحكمي *** يعطيـك يا حسّان عزم شديد
وما يطـول تَ توديلنـا نجمي *** عَ الدرب تهدينـا لمشتى لحلو
ونحكيـلك بديـوان شـعر جـديد