[size=6]افتتاحية جوقة الوطن
حسن بنوت/الولايات المتحده
بشار ابراهيم/سوريه - الجولان
جعفر وثنا حيدر/براغ - تشيكيا


اشرقي بهاليل يا شمس الهدايه
أنا راكض خلف منك وجايي
ومن خيوط الوحي والعبقريه
تعي تا نحيّك الكلمه عبايه
وعلى منبر لا فجر ولا عشيي
رفعنا للاًدب والشعر رايه
تعي نقدم عراوي مخمليه
لعالم في لها بالشعر غايه
وزجلنا انت يا مفضل عليي
يا خيي وسلوتي بهجري وشقايي
بقلبي ساكن بروحي الوفيه
بعينيي بصبحي وبمسايي
أنا وياك رحلتنا سويه
بدنيا لا حدود ولا نهايه
انخطفنا من حلم ليله هنيه
ومن دماتنا اكتبنا الروايه
ومهما يحاربونا بسؤ نيه
شعار الكتيبه والقرايه
ما رح بيحصلو واحد عا ميه
ومارح بيوصلو عا مستوايي
واٍنت يا ديب يا لقمه طريه
نصيحه سماع مني من البدايه
مهما تكون رداتك قويه
ومهما تكون متحمس كفايه
وعا جنبك جبت أهل الشاعريه
وسيّد مصطفى اعطاك الوصايه
وقلدتو بقوافي مهتريه
بمص ومصمص وهاك الحكايه
أنا بكفي السيوف الحيدريه
ونخوة بو علي رفعت لوايي
واٍذا دم الشعر بيفور فيي
اٍنت والسيد وأحمد السيد
بتجوا عا منبري بدكم رضايي
**********
أنا بجوق الوطن طليت طله
بعناصر لابسي الالهام حله
من أرض البراغ ناجيت حيدر
انتفض متل النسر من فوق تله
وقلت وينك ثنا ووينك يا جعفر
تعوا شوفوا الشعر صار بمذله
سمعت جعفر صرخ الله أكبر
سلّي يا ثناء السيف سلّي
ومن الجولان رفرف نسر أسمر
الاًمه مجدها بأسمو معلّي
بشار الاًلو موقف ومحضر
صديقي وصاحبي وخيي وخلّي
بشار المن الشعار أشعر
للي كسّر روسكن كله وكله
نحنا أربعه من فرد جوهر
علينا الوحي نازل بالمظله
ما عنا مين أكبر مين أزغر
بذات المستوى وذات التجلّي
واٍنت القلت كلمه يا معتر
عن جوقك وزدت الطين بله
قلت زغيرك علينا تعنتر
بين شادي وعمر وشريم وضّح
مين كبيركم بالله تقلي
**********
أنا امي الشمس والبدر بيي
وهدوني الارض لعبه بين ديي
وعليي غارت النجمه بسماها
ودابت بالشعور العاطفيه
وعطارد كنت طارد في سماها
لوما المشتري يدفع جزيه
والمريخ وبراجو وسماها
غزيتو في خيال الشاعريه
وعطى فعلي زحل أسمو وسماها
زحل من ضربة كفوفي القويه
برمت الكاينه بفسحة مداها
تلاقي شاعر فكارو غنيه
يجي يقابل شعاري ومستواها
وبمرج الموهبي نسرح سويه
صرخه وما حدا ردد صداها
متل الصبح راجع من عشيه
ندرت ندور للقدره وعلاها
تاٍجعل منبري ودفي ضحيه
وعملت الصبر لجروحي دواها
ولهلق ما حدا جاوب عليي
اٍلا والارض كشفت غطاها
وشو عم بيصير ما عندي دريه
شفت انسان جايي من وطاها
تيتحدا السماوات العليه
ركب عا مهرة الجهل ومطاها
وعمقياس الذكا بين شويه
وأنا لاًجل الفطانه والنباها
سايرتو وقلت يالله خطيي
وعلى وب سايت ما قطفنا جناها
حضنتو حضنة الام الوفيه
كبر راسو و عا استاذو تباهى
وماشي باًبهيه وعنتريه
حلفت بالانبيا عيسى وطه
بمشتى الحلو اقطعلو لسانو
واقضي عليه لو بيكون خيي
**********
وعا سيرة زين رح حمي المكاوي
وخصمي ركعو وزيدو شقاوي
مش بحاجه لاًمجادو وشهرتو
الله يرحمو الاًمجاد طاوي
درب المرجله بفعلي عبرتو
وحسن مع بو علي بذات التساوي
الدهر حدي ركع لما أمرتو
واٍيدي باسها بود وطلاوي
سبع الغاب من عبسه وهرتو
رجع عالغاب والكتفين لاوي
صخر الصمّ بكفوفي عصرتو
وبوهج مراجلي الاًعداء شاوي
واٍذا سيفي بهالساحه شهرتو
السما عالارض بتشتي بلاوي
وياشعار لو شعار صرتو
قوايا وصيتكم بالكون داوي
عا منبر بو علي انما ظهرتو
حطّوا عا أساميكم غشاوي
أنا (مهدي)الزجل يللي انتظرتو
ظهوري وجيت والاٍيمان حاوي
اٍذا كان الزجل لعبه افتكرتو
وسهرة كيف وزرار بعراوي
وبشرع المنبر وشعرو كفرتو
وقصد صارت صداقتكم عداوي
أنا هالكسر صلحتو وجبرتو
ولما الخصم شفتو الشر ناوي
بجورة حافر حصاني قبرتو
وبدي ضل قبّر هالمساطر
لحتى تمم الشرع السماوي
**********
ويا مشتاوي اٍلك مني عباره
بدي قولها بصدق وطهاره
عطيتو للزجل حقو زيادي
رغم بعد المسافه والمراره
أنا انسان لبناني بفؤادي
ما بفرق بين جار وبين جاره
أرض الشام بعبدها عبادي
خساره للي عم بيحصل خساره
يا أرض المجد يا أرض السياده
من ربوعك بثق فجر الحضاره
ومهما يلعبو فينا الاًيادي
بدنا نضل عن حق وجداره
أخوه بالمحبه والمبادي
ما بدنا لا سفير ولا سفاره
واٍنت يا منتدى كل النوادي
دعاني مشرفك عاهالزياره
شفيق البحسبو بمركز ولادي
وأنا البي المع ولادو تبارى
وبدنا هيك نبقى يا بلادي
كل ما صار بين الاهل أزمه
نحارب بالشعر مش بالحجاره

الخرزة الزرقة عالحالين.....تركها ما بتفيدك هون
عا فنونك في النا دين.......حتى ترّدو بدك عون
بالتاريخ قشعنا عين.......رخيصة وباعت فادي الكون
وحتى تشوف المقصد وين......علّقتك حتى ما تبيع
فادي الشعر اللبناني