[COLOR="Red"]الضيعة بشكلها العام[/COLOR]

بعدك يا ضيعة مْقـَرْ كل الملهمين ** ومنـِّك يا ضيعة العين ما بتشبع نظر
فيكي الروابي معطـَّرة بالياسمين ** وفوق زنـدِك نــــام ... تا شِبع القمر
نْ بعَّـدِت عنـك يـوم بيزيد الحنين ** وبْحِس إنـّو صابني بعدك ... ضــرر
عا منظرك شِعّارنا .. بحلف يمين ** صاغوا الشعر تا صار أحلى من الدرر
بحبك أنا ومش بس رب العالمين ** حبك ... تا صرتي اليوم نغمة عا وتــر
إنتي بضمير الناس من دِر التـَّمين ** لْ مِتلي بحب الأرض ... بكلامو جَهَر
ولولا شموخك ما نضج مرَّة العجين ** وإلاّ عجين الشعر فيكي ما اختمَر
عَ جبالِك الغـرّاء فيَّقتي السنين ** كْبـِرتي ... وبعين الشعر شيَّبتي الكَبَر
وشعب اللي فيكي من الشعوب المخلصين ** حبّوا الأرض حبّوا الزهر حبّوا الشجر
والحب فيهُـن عالعمر ما بيستكين ** نارو ... إلِك مشعال يضوي عالبشر
يا وادي النضارى يا مسرح محبين ** ما بين ضيعة وتانية .. شلفة حجر
فيك المحبة عامرة ... والمعجبين ** من كل مطرح عم يجوا يملـّوا النظر
منك ومن غابات هالشعر الأمين ** بمحبتو ... يعطي البشر أجمل صوَر
وإنتي يا ضيعة يا حلم كل البنين ** عَ دروبك الحلوين ما بتشبع سَهَـر
إنتي يا مطرح ما شبابك حالمين ** يبقوا معك ... تا يضل إسمك ينذكَر
وفيكي أنا رح ضل مرفوع الجبين ** ولا تصدقي بنسى الوداعة والجَمال
ما زال إسمك هَـون بالقلب انحَفـَر
*********************************************

مع تحيات
سمير سارة

10/12/2009

قصيدة رائعة :
بتمنّا من شعراء مشتى عازار يتحفونا عَ طول بهالقصائد الرائعة . لأنّو مافي فرق بين مشتى الحلو ومشتى عازار الاّ بالكنيّة .
الله يقويك يا سمير وبنتمنالك التوفيق والأستمرار