غزليات ثناء حيدر ....

[ثناء حيدر]

تكملة القصيدة بتمنى تنال إعجابكن

***
حُبَّكْ
قَدَرْ مكتوبْ عا جبيني
عِمْر انكتَبْ بـِدْفاتِر سنيني
كلّ العمر حدَّكْ
تمَتـَّع بحبي قـَدْ ما بَدَّك
تَاتشْبَعْ بحبّي
وترْويني
وبْحِدْ مِنـَّكْ دَوم
خلّيني

\
/
وسِكِتْ الحَكي
وتأوَّهْ الموّال
وقالتْ إلو:
يا عايش بها البالْ
لـَ شُو ياعمري الزهد والتَفكير
لـَ شُو يا حبي الصّمتْ والتّعتير
لـَ شُو يا دلّي خانَك التّعبير؟

ما قِدِرْ يحكي
خانتو الكلمِه
وهرِّت الدّمعَه
وبكيِتْ النّجمه
وبكيِتْ معو

وقالت إلو منِ جْديد:
لا تِكْـذ ُبْ عليّي !!!
دقات قلبَك بسْمَعا من بعيد
عليها أنا وهَوْنيك يا ما غِفِيْتْ
ومنها أنا وهونيك يا مَا وعِيت !!!
بفْهَمْ عاقلبَك
بالْوَما
بفهم عليكْ كتير
لَوْمَا حْكِيت

صَمتَكْ حَكي
صَمتَكْ بِكي
صَمتَك يا عطري الّليلكي
صَمتَكْ وَجَعْ ما بيشتِكي

تْنَحْنَحْ شوَي وقلّْها:
صامت أنا ... بْمَرجـِة زَهِرْ
سارح بكلمات السحر
بحروفْ أحلى من الشّعرْ
يا تقبريني بسْ !!!
حبّي إلِكْ نعمِة
أو صار شي نقمه؟

وتنهدِّتْ ...
والآه قالتلو:
حبَّكْ ؟؟؟
نعمة عليي ... وصار غانيني
حبَّكْ
بيادر خيرْ لـَ سْـنِيني
بيادر قمحْ
وغمارْ فوقْ غمارْ
تعطيني
غمار والوفا والامل
تِهْديني
وبرمْشْهَا عينَك تغطيني
حبَّكْ بحر !!!
ياريت إغرَقْ فيه
ومن الغرق
أوعَاكْ تنقذني
وتحميني