بلا سياسة اليوم

[adidas]

د. إياد قحوش


مررت بداره وكان على النافذة, سلمت , فقال تفضل فوت , شو وين هالغيبة أنتي ونسيب لحود مختفيين فقلت: جايي , بس بلا سياسه اليوم يا بوروفايل .


ثم سألته: وهل البوابه مفتوحه؟


فأجاب : البوابه ضيقة بس عطول مفتوحة , لو كانت عريضة كنت بيجوز سكرها .


وبعد أن دخلت وسلمت عليه وسألت عن صحته , رجوته عدم التطرق للسياسة . فرد : ولا يهمك . ثم أردف اذن حدثني عن آخر ما قرأت من أقوال النبي , لحكيم بشري .


فأعدت الرجاء: يا عمي ,دعنا من السياسة ولنتكلم بشيء يهدئ الأعصاب .


فأجابني : ماشاالله متل الجنرال بتضل عندك أوامر .


فضحكت وقلت : أنا مصر على تجنب الخوض في السياسة اليوم.


فرد هازئا: يا حرام , أعصابك حريرية بتتلف , وبيضيع مستقبلك .


فتأففت بلطف وقلت : شو صايرلك اليوم؟


فقال: انكسرت قرعة المتة , وما قدرتش عبي المثانة ,منشان هيك مأنغره معي .


قلت : اذن أنا توقفت عندك في الوقت الغلط على ما يبدو ,ومنشان هيك بتسمحلي , بدي روح .


فانتصب غاضبا وقال: يعني بدك ياني طق , ما طول النهار وأنا عم قلب بهالمحطات التلفزيونية العربية وما فيها غير دين وسياسة . والسياسيين ما لهم دين ورجال الدين بيحكوا بالسياسة . ليك يا عمي , اذا نحنا ما فشينا قهرنا فيكون أنتو منجن . ونحنا جيران ولبعضنا . يعني بطلت تتذكر تلازم المسارين؟


كنت في هذا الوقت قد وقفت وقبل أن أهم بالخروج ,قال لي : مبين وجهك سخن , شو رأيك بكاسة مي من نهر البارد بتروقك قبل ما تروح؟ .


فقلت : بتعرف يمكن أشرفلي امشي بقى قبل ما ينفجر راسي .


فرد : أي أي انفجار بالأشرفية ..


وقبل أن يتابع نزلت الدرج مهرولا .. وأنا أقول ياحرام , راح الزلمة ..


وبينما أنا أقطع الشارع تحت نافذته مسرعا كنت لا أزال أسمعه يقول: جغرافيا , وتاريخ , تماني , أربعطش ,مغالاة في الموالاة ومعارضة السلم بالعرض , وعشتم وعاش لبنان .


قلت في نفسي : سامحني يا بوروفاييل , بس مشكلتك أنك ما قريت الكتاب الأخضر .عندما قلت ذلك ,توقفت للحظة , ضربت حالي كف ,فعدت الى وعيي وقلت بلاسياسه اليوم وكل يوم الى أبد الآبدين ,آمين