كاهن الحب

[ghandi]

= كاهنْ الْحُبّ =



يا كاهن الحبّ انطوى جيلك عا مين عم تقرا أناجيلك ؟؟

خلّيك داخل هيكلك غفيان ما في حدا بْهالجيل يصغيلك

صلّي لا تشكيلي ولا بشكيلك يا كاهن الحبّ انطوى جيلك !!



خلّيك داخل هيكلك غفيان بين الشّمع والخمر والقربان

لا صوتك بيهدي مع الطّرشان ولا نورك بيجدي مع العميان

ولا المجدليّة رح بتبكيلك يا كاهن الحبّ انطوى جيلك !!



شفتك بنومي في قصر بلقيس هدهد عا إيقاع الحلا بيميس

وخاتم عيارو ماس ما بيخيس سليمان صاغو بجنّة نواقيس

رنّـاتـها بتشرح مواويـلك ياكاهن الحبّ انطوى جيلك !!



وشفتك بنومي في حمى داوود عم تقطف الحبّة من العنقود

وداوود عالقيثار يعطي وعود والصّيف يتحوّل برق ورْعود

من كحل أوريّا على ميلك ياكاهن الحبّ انطوى جيلك !!



ببكي عا قلبك كيف عاطي سكوت وعم يرسم خيالات من لاهوت

في عصر قدّس موميا الناسوت وبالزنطرة خزّق ورقة التّوت

وفضّل العتمـة عا قناديـلك يا كاهن الحبّ انطوى جيلك !!



ارفعني لعرش الرّوح تا ناجيك وعبّي الوفا بالقمقم وإعطيك

ارفعني تا إعصر كلمتي وإسقيك دمعة شعر في حزنك تواسيك

لكن ومن قلبي اللّي بعدو فْريك وعم يرتعش ويجنّ تا يلاقيك

بطمّنك مهما الدّني تقاسيك بكره اللّي كانوا يستخفّوا فيك

رح يركعوا يبوسوا تماثيلك ويترحّموا عليك وعلى جيلك !!

===========

الشاعر عبدالله خبازة