كيف شفت الضيعة ...

[adidas]

انو بتبعتلي وبتسألني كيف شفت الضيعة? ياأبواسبر, ليش أنا شفت ضيعة ياأبواسبر ياحبيبي? أنا شفت مدينة , ومو حيالله مدينة, مدينة بتضيّعك?
انو بيوت فوق بيوت فوق بيوت وبالأخير طبّ زغيّر ..وعالم طاحشه عالطريق وماحدي بيفلت عن "بنط " قدام بيتو ..وشو ..البيشوف هالعمارات بيقول نيال صحابا ..



ويلّي ياعصاة اللّينه ,مافي حدي ..بيوت فاضيه , مافي حدي لاتندهي ..كل مين معو قرشين بيجي بينتع عمارة وبفرش نصا وبكب "نصا بالبحر" أجلّك يعني بقصد للبيع . وبيجوا هالغربتليي بيسترخصوا و"شب واشتهى" وهيك نص الضيعة من الضيعة ونص الضيعة مو من الضيعة ..وضايعة الطاسة ..حدي بيقلك اشبدي ..



واحزور شو ..حكيت مع الشباب منشان نطلع عالجبل , قالولي اطلب تكسي ومنطلع هلق ..ليك هالحكي ..ايلي..ياوال أمي ..تكسي ! قلتلهم لكم جبلكم ولي جبلي ..وطلعت أنا وعجيان حارتنا من عند طريق السلالم..وطول عالجبل ..حوشنا بلوط ومشينا من حد نبوعة زكي وبعدين كملنا عالسايح ومن هونيك مقاطعة عالصنوبر ..وهونيك سألت هالعجيان ايمت آخر مرة نصبوا طافوحة..



قام قللي واحد : أيشلا الطافوحة عمي اياد ..ايييييييه ..مابتعرف بالطافوحة ,ولك عمي أنو ?اذا جو الأمريكان لهون مارح يكون مركز انطلاق العمليات هوي عان زراق..
ومارح تكون المعركة الأولى اسما الطافوحة? ..صاروا يصهصنوا وفكروني مأمزح ..
ويابواسبر وحياة من سلمك بلشت نصب طوافيح ..وحفر بياش ..ونكشنا الصنوبر
كلو ندور ع سلول وقلتلهم ليكوا ولاه اذا صيدت هالطوافيح شي بتحسبوا حسابي
هاه ..



وهيك يابواسبر الضيعة ياخيي هيي تشم ريحة التنور من هون وتسمع بياع هندبه من هونيك ..الضيعة ياخيي هيي مو علب كبريت وكفتيريات وبس ..بدنا المعهن مصاري يعملوا مشاريع منشان هالشباب تبقى وتشتغل وتتزوج وتزدهر الضيعة ..
ومو عيبة نتم نقفقف تحت الشتي ونحنا عمنط من تحت بلكون لورا حاط ..العيبة
تسأل عن كل رفقات المدرسة وتتفاجئ انو معظمن صار برا ..

وبتسألني كيف شفت الضيعة يابواسبر ..ياخيي أنا بشم الضيعة شم.. وبسمعها كل يوم عمتعيطلنا وعمتعيط لهديك الأيام وقت كان الأول عسوريا من عنا ووقت كان عنا فريق طائرة بيشق الأرض ووقت كنا نحب بعضنا ونعرف بعضنا ..
ياخيي ماحدي بيعرف حدي بالضيعة ..
بس قللي الياس بتظبط وفؤاد خبرني انو نص مليون دولار بيرد الضيعة كلنكو ..واييييه قول انشالله ..
وبتهون






د. اياد قحوش - كندا


http://www.marmarita.com/nuke/modules.ph...e&sid=4626

[adidas]

راجعين ياضيعتنا

د. اياد قحوش

وبعدين يابو اسبر بخمنلك الحياة شوي مره بس وقت منتذكرها بتصير حلوي ..مدري ليش وقت الكنت زغير كنت اتدايق انو أمشي كل يوم من بيتنا اللي هوي بطرف الضيعة لحتى وصل عالسهله أو عاماريوحنا ..



بس بهالمشوار يابواسبر
اشتقت كتير للهلمشوي وصرت كل يوم أمشيها شي تلات مرات ..ليك وقت وصلت عالمطار كانوا قرايبيني بانتظاري وقالولي ليش مابتنام الليله بالشام وبتطلع عالضيعة بكرا قلتلون ياعمي والله بحب الشام كتير بس ماني مسدق ايمت شوف الضيعة ..وشدينا بنص الليل ..وكنا عمنحكي طول الطريق بس وقت وصلت عمفرق الوادي سكتت وماعاد قدرت احكي ..كأنو انربط لساني وبلشت الدموع تشرّ ..
وصلت عالبيت وصرت روح من أوضة لأوضة وفتش بالخزانة وبالدروجه وبقبش هالتخوت والصوفايات ..رحت عالحمام وشفت الطاسه للي كانت تحممنا فيها ستي وكمان طلعت عالسقيفة شفت جلاءات الابتدائي والثانوي ..وشفت دفاتر التعبير تبعوتي وفي كيس سيف اسمو سيف العبد اساتو بمحلو ..وكمان فتحت هالصور وشفت ناس ماتت وناس مابعرف وين صارت ..ولقيت رسايل من الشاعر شوقي بغدادي ومن الأديب زياد محبك ومن غيرهم كتير ..وماقدرت نام للساعة سته الصبح ..وحوالي الساعة سبعة اتصل واحد من حبنمرة قللي شو متعمل ..
قلتلو نايم قام قللي جاي لعندك قلتلو لاء خليني نايم ومنزور بعضنا بالحلم ..متل المافهم عليي وبعد نص ساعة كان ميدقدق عالباب ..المهم صرت اتاوب قدامو عاقد ماالله عطاني عزم ..وبعدين عطانا عرض كتافو بس ماقدرت أرجع نام ..يابو اسبر صبحية الضيعة بتجنن عصافير وهدوء وبيجوز تسمع صوت جارك عميعيط عمرتو شوي بس حتى العيطة حلوي ..يلعن عرض بلادنا ماأحلاها ..
المهم قللي بيي شو مشتاق نعمل غدا قلتلو أي شي مافيه لحم ..قام قللي مجدرة قلتلو فليكن ..وهوي عميطبخ مجدرة اجانا ضيوف ..شمو ريحة المجدرة قام واحد قال هيك بعتناك دكتور تتخصص برا وشاعر وياهو وراجع تاكل مجدرة ..يعني قللي يابواسبر لوأني جقمتو شي كف لهالزلمي حدا بيلومني بشرفك ..? قلتلو مامعنا حق لحم وبعدين أنا مشتاق للبصل لأخضر وجاط لبن بلدي وقعده عالبرندا برا بتسوى عندي البيت الأبيض ..
وبعد ما شدينا بالجماعة ليبقوا عالغدا وماقبلوا قال رايحين يتغدوا بالفندق ..قلتلون
صحة والله معكون ..وماتقول بيي يمكن كان حاسب حسابن لأنو الطنجرة كانت معرمه تعريم ..وفرشلك طاولة ماصارت للسلطان عبد الحميد ..بس بلش يزق بهالصحون وبالملاعق وكان ميعد هيدا لاياد وهيدا لزياد وهيدا لرامي وهيدا ..هون
قاطعتو وقلتلو يابيي شومتعمل لشو كل هالصحون وهالملاعق ..قللي يابيي من عشربن سنه وقت كنتو زغار كانت الطبخة ماتكفيكن وماكان عنا كراسي تكفي لعشرة وتعودنا أنا وأمك ماناكل لحتى الكل يشبعوا ..وهلق كلكون طيرتوا وصرت لحالي هون ..فخلينا نتخيل أنو بعدكن هون ونحط صحون وملاعق عالعدد ..وقللي بيي ليش مفكر أنا فيني ابلع اللقمة اذا ماتخيلتكن معي ..وليك هاه ..وشال صور من جيبتو وحده للمرحوم عامر ووحده لأخواتي الكبار ووحده للصغار ..وقال هه ليكون كلن هون معي وهلق فينا نشكر الله وناكل ..
يابيي يابواسبر ..دبحني بيي دبح ..ياالله عهديك الأيام لمن كانت الصحون تقرقع والملاعق تضرب ببعضها وننزل هبش بالكرانيب وبالرشاد وبالفجل وننزل سفق بسلاطة اللبن بخيار ..ياالله شوكانت حلوي هديك الأيام يابو اسبر ..ماقلتلك الذكريات حلوي ..
قلتلو لبيي مابترجع معي بعد مابتخلص اجازتي يابيي ..اتطلع فيي وقللي التراب هون بخور يااياد وبتحس بطعمة السما لما بتشم ريحة الأرض ..يابيي يااياد سفرتكن واحد واحد وعلمتكون أعلى العلوم بس أمنيتي قبل ماموت أقدر رجعكون واحد واحد لهلبلاد ..
كاسك يابيي كاسك ..ومنرجع انشالله منرجع وبترجع الملاعق تدق ببعضها وبترجع الصحون تقرقع وناكل من طبخ أمي كلنا سوى ونشرب كاسك يابيي وكاس مرمريتا
والوادي وسوريا ..
أنا كتير مشتقلك يابيي ووحياتك عالغالي راجعين ..نحوش مشمش سوى ونكسر صنوبر ونلعب طرنيب وننام بعد الضهر ونتمشور سوى ونمسي عالجيران ..
راجعين ياضيعتنا ..بس بعد ماتعمل أمي العمليه وبتقوم بالسلامة انشالله

قلن يابواسبر لكل المغتربين يرجعوا ..حلها بقى ..انبح صوت الأرض وهيي تعيطلنا..
د: اياد قحوش - كندا


**************************



http://www.marmarita.com/nuke/modules.ph...=0&thold=0

[هالة]

[size=4]الصديق أديداس :
ما يلامس شغاف القلب من الكلام ........... أصدقه ، وأقربه الى الحقيقة
أبكاني ما قرأت من حميمية ....
أبيع نصف العمر المتبقي
لأعيش تفاصيل الزمن الماضي بكلّ ما يحمل من معاناة
تلك المعاناة الممزوجة بالصدق والحب والذكريات والتفاصيل الصغيرة الحميمة
شكراَ لك على غسيل الصدأ الذي يعلو ذاكرتي والعودة بي الى الوراء

[/size]

[المشتى]

لا أعرف ما هو غرضك من نشرك القصة على موقع المشتى لأن هذا الوصف هو لمرمريتا

يا صديقي إذا أردت وصف المشتى فلن تسع صفحات هذا المنتدى ولا أي منتدى للوصف لأن المشتى قد تطورت خلال المدة الأخيرة بشكل كبير و أصبحت الكتل الإسمنتية تطاحش و تناطح في المشتى فكل عام يتم بناء أكثر من 5 بنايات و الله اللي بيشوف المشتى من 20 سنة و بيشوفها هلق بيقرف

لك تفوه على هالزمن الحقير

شكرا ألك ذكرتنا بألامنا

[باسم خوري]

ولك يسلم هالتم ...

[sherin]

[size=4]:
أبيع نصف العمر المتبقي
لأعيش تفاصيل الزمن الماضي بكلّ ما يحمل من معاناة


[/size]

تذكروا دائما يا أصدقائي انكم تعيشون امتداد ذاك الماضي

ماضي الغنى والجمال

فمهما كانت الطفرات التي طرأت عليه تبقى جذوره هي ذكرياتكم

أتمنى يا هالة أن تقضي نصف عمرك تبحثين عما تبقى من اوراق الزمن الماضي غير المهجنة وتلملمينها

وألا تعيشي بعيدا عن جزورك في بلد ليس له لا جزور ولا امتداد ..

بلاد طفرات ...بالصدفة ظهرت ...تغذت على النفظ حتى الانتفاخ ...

لم يفرغ فيها فم ليعرف كيف يغني ...

ولم تخل يد من الذهب يوما لترتفع بالشكر لله ...

فطوبى لمن يعيشون في بلاد بنيت بالاحلام الصغيرة

[adidas]

أغرب وراء الرزق وهو مشرق و أقسم لو شرقتو لغربا

الاخت هالة ....
شكرا ع مشاعرك الصادقة تجاه بلادنا تلك البلاد التي لا تعرف قيمة مبدعينها التي تدفع بهم و تلقيهم في الهوية "الغربة"



المشتى مشكور ع مرورك ....
الغرض يا صديقي ان جميع المناطق المجاورة يطلق عليها " وادي النصارى" جميعها لها نفس العادات و التقاليد يا صديقي ونفس المعانات فجميع ابناء هذه المناطق مهاجرووووون


باسم خوري " يسلم هالتم "


شيرين ....

تذكروا دائما يا أصدقائي انكم تعيشون امتداد ذاك الماضي

ماضي الغنى والجمال


ذلك الماضي الذي انمحت ملامحه ماضي الغنى و العز ماضي الافراح و الاحزان ماضي مساعدة الاخر والشعور به
وحل مكانه حاضر " الانـــــــــــــــــــــــــــــــــــــــــــــــــــا "

[Pascale]

يا adidas انا صحي دمعتي سخيي بس والله العظيم حرقتلي قلبي بهالحكي...حسيت اني اعدي معكن عطاولة و تخيلت الغربة الي عايشين فيها...الله يساعدكون و يساعد ضيعتنا علي عمبصير فيها.........و شكرا

[NANETA]

برافوا عليك والله يعطيك العافي ما حدى غيرك قدر يحكي شي من الواقع انا صرلي سة سنين بالمشتى بس هلق ماني عم طيق روح عليها قد ما فيها غربة وخصوصا سعودية وكويتية ومن النور اصلا المشتى صارت مديني مانة ضيعة
هادة الواقع يلي عم نعيشوا وهلق وبعدين صحيح متل ما عم تقول أصلا شباب المشتى كلن برا ويلي بالمشتى صار يطمح أنوا يطلع ويسافر
الله يعين شباب هل اليام ما بيعرفوا شو بدن

[ROMARIO]

دكتور اياد
فعلاأنا كتير سررت بقراءموضوعك، انت انسان حساس كتير، وشعرت أنو ذكريات طفولتك هي جزء مستحيل ينفصل عنك، قدرت ببساطة كلماتك وبلغة شعرية حنونة هادئة تنقلنا لعالم السحر..عالم الماضي الرائع.. بتشكرك كتير..والله يكتر من أمثالك