قصيدة ود بين الريح وشفيق

[بسطاطي]

يا احباب المعنّى الدرب كفّو ........... وحول الكلمة الحلوي التفّو
لا تعتبرو الزجل صفا ضحّيي ........... وغربان الفنون عليه غفّو
*****
يا ريح الزجل روق شويّي ........... حتى نصير شعرك نستشفّو
تايزوروك كلمات النقيّي ........... ع عتبة هيكلك ياما تحفّو
*****
وشفيق الهاجم بخطة زكيّي ........... الشعار البيمقدرتو استخفّو
من التهذيب والنفس التقيّي ........... شفت كتفو بكتف المجد حفّو
*****
انتو تنينكون صورة بهيّي ........... تا يقروكون قلوب الناس هفّو
من هل منتدى طلعتو سويّي ........... جناحين بسما الاخلاق رفّو
*****
" بخليل" وبطرس" الداقو المنيّي ........... و"حرب" ورعد "وفغالي" التصفّو
إذا بقيتو بهـ الهمة القويّي ...........( بشرع الشاعرية ما توفّو )
*****
الزجل للناس صورة واقعيّي........... زجلنا للوطن وحدو ما لفّو
مهما حاربوه بسوء نيّي ........... ومهما بجوهرو برمو ولفّو
ولو بدلو النظام بفوضويّي ........... وصرعات الغرب ع الشرق لفّو
ولو زرعو الاغاني الموسميّي ........... وعينين الحقيقة عليه غفّو
*****
ولو حرقو الليالي الشاعريّي ........... ولو ع جمر الاحمر تدفّو
زجلنا للوطن باقي هويّي ........... بشاعر قادر يهز الطبيعة
إذا ع منبرو بيهز دفّو

حســــــــــان

[غير مسجل]

وقد وصل البعض لاستعمال كلمة السفاهه بالشعر

انا يا ريت عينيي عماها ***** الزمان ونزلت الزرقه ع ماها

ولاشفت الجراوي عالغضنفر ***** تتطاول بوصفو بالسفاهه

انا بديت الحوار بشعر اخضر ***** نتح من رقتو قطر الفكاهه

وما قصدي اعمل من الخصم مكسر **** عصا ويجيه"تسونامي"المتاهه

***

رجوتو لضيق وقتي نكون اقصر **** بالردات جاوبني ببلاهه

وكتب ردات عالردي وكتر **** ورد على صيامي با لشراهه

***
وعلى ذكر اعتذارو قال فكر **** انا رفيقو!! يا عيني عالنباهه

البيجرح رفيقو بهيك محضر ***** مش بعيدي يجرح عا عماها

***
وقبل مارد عاعذرو التأخر **** وقلو مسامحك, رد وتباهى

وظهر هالكان في عذرو مستر: **** الصلف والكبريا وحب الوجاهه
***
وذكرلي عيلتو وفيها استنصر **** وسلسل شجرة العيلي ورواها

وانا ولو كنت لبناني ما بفطر **** قبل ماسوريا حيي ثراها

انا بحب النبي وعندي الحيدر **** متل قوني المجد كلل بهاها

ولحتى الطائفيي فيه تظهر **** ذكرلي الحيدره وذم بسواها

وحرجلي وكلامو كان اخطر **** من سرائيل عالشام وحماها


****
وانا بهالعمر بسهر بس بسهر **** تروحي يزيد فيها مستواها

من الشعر الطري الطيب الاشقر **** النقي المقطوف من زهره وشذاها

ومتل ما قال موسى بيوم اغبر **** وبكلمي عقول هالعالم سباها

الشعر العنتري بس مات عنتر ***** بيموت ولكن الصوره ا لجديدي

بتخلد للازل باقي حلاها

عزيزي حسان :دلني صديق على موقعي مشتى الحلو و مشتاوي فتعرفت على شعرك لاول مرة بعد ان سمعت الكثير عنك. و لا اخفيك انني قرات ردك على شفيق وادركت انني لا القى المزاح معك لمتانة شعرك وجزالته وبلا غته ولسوء حظي حاولت مداعبة غيرك لكنها كانت غلطة لا تغتفر .انا في الطائرة وقد وصلنا اورلاندو وعليي الذهاب .اتمنى ان اراك يوما لاتعرف عليك

ريح الزجل

[شفيق]

اعصري دمعات حبرك يا جريدي ****** مرق شاعر بأفكارو البعيدي

كتب شعرو وجمال الفكر جسد ****** بجسم الحرف عاورقة جديدي

تعي نغربل حساب الما تحدد ****** بهالأشعار وفكار السديدي

بعد الغربلة منرجع منوجد ******* زوان الشعر طايف عالحصيدي

ويا حسان البكلماتك مزود ********** اتركلي الغدر وانسالي المكيدي

شو بدك من خصم أرغى و أزبد ******** عصب سبسب بكلمة بليدي

زهيدي بالفعل مش شخص يزهد ******* الزهيدي بدها تبقى زهيدي

كافور الملك ملكو استورد ********* ورح بيضل أوطى من عبيدي



شو بدي بضيق وقتك يا مبلد ********** أنا عا منبري ثورة عنيدي

إذا ما كان عندك وقت أجود *********** ليش تفوت عمواقع عديدي

وذكر فياض حدو اللي تودد ******** بإبداعو بكلماتو الفريدي

رفيقي وصاحبي وأقدم وأجدد ******** خيي وبالشعر وحدو عضيدي

ما بدي تسامح بحكي المولد ******** أنت في قلبك مربي الحسيدي

أنا ذليت حالي بشعر بعد ******** عن الرفقة عن الكلمة النضيدي

وعدت باعتذاري شفت مشهد ****قلت:: ""ما بسامح ""ونفسك عتيدي

دليل كبير في نفسك معقد ********* الكره عامي عيونك يا "فريدي"

وعذكر العائلة مجدي تمجد ************ وحد المجد رح تطلع مجيدي

بالاخلاق بالصيت المحمد ************* بالايمان بالسمعة الحميدي

وعذكر الطائفية يا مجمد ********* ليش ذكرتها بنص القصيدي

أنا بعرف أنت شو لاك مقصد ******* لحتى تموت القوة بوعيدي

بقلبك ساكنة في كل مرصد ******** هيي وحش ووجودك طريدي

أنت بتحبها في قلب أسود ******** وبوجك خدعتك بتقول"" حيدي"

إمامي حيدرة بسيف المبولد ******** إلي أديان ترحمني ب عيدي

و وجودي ساكن بأخلاق أحمد ******** ويسوع العاش حبو في وريدي

إلي دينين والعالم بتشهد ********* على حبي لأدياني وسيدي

وعمر حبو بقلبي قام مولد ******** وكل شي أنبيا بدنيا وطيدي

أنا لا فرق عندي بين معبد ******** ومعبد...يا جبال الكره ميدي



إذا خصمي ورد هادي مورد ******** بدمي بلون الكاس النبيدي

وإذا بيكون متلك مش مخلد ******* بدي دوقو السيف الحديدي

وموسى زغيب بالكلمات سدد ****** أنت خليك بالكلمة الوليدي

وأنا الزين وأنا السيد محمد ********* كلامن مرجلي وشعري مراجل

*************** وأكبر راس رح طقو بإيدي***************

[شفيق]

مرحبا استاذ فريد

أنا توقعت أنك انزعجت من شان شفيق غيث شفيق فياض ديب ... بس معك حق...

أنا بعتتها وبعد ما بعتا ندمت لقلك ليش....

أنا أول شي فكرتك فياض وبعدين وقت عرفت أنك مو فياض توقعتك من المشتى أو من سوريا وما خطرلي أنك من لبنان الحبيب وبالمشتى في إلنا كتير معارف واصدقاء فكتبت الاسم الكامل لأنو في ناس بيعرفونا فياض وناس بيعرفونا ديب

وكان قصدي شريف ولا يروح فكرك لبعيد ,,, وإذا منشان هي معك حق مية بالمية

ومنشان الباقيين أنا وضحتلك سوء التفاهم....

بس لقلك شغلة كل الردات مزح بمزح وحتى الفيهن كلمات مو مناسبة كلو مزح بمزح..

فمن شان هيك لا تزعل....
وبرجع بقلك إذا من شان الاسم معك حق مية بالمية بس متل ما وضحتلك والرجاء أنو تتفهم الوضع.


وشكرا

[غير مسجل]

وهلق يا سيوف الدم فيقي ***** انا بالشعر ما برحم صديقي

ولا بهادن ولاني دموقراطي ***** ولابرضى وساطه من رفيقي

ولأني كنت حذرتك تعاطي ***** تحدي درة الشعر العقيقي

ولأني كنت فرجيتك نشاطي ***** وزئيري الرجف البحر الفنيقي

لاتستغرب اذاما كان ساطي ***** جوابي ومن دموعك بل ريقي

العبق من نعنعة شعر القماطي **** بلل مطلعي وندى شهيقي

وبحر ادوار سلمني الشواطي ***** وخيال السيد محمد لصيقي

ومتل ما كان بطرس ديب عاطي **** انا عاطي بجديدي وبعتيقي

وطليع والتزامو الجنبلاطي**** طلب اجمع فريقو مع فريقي

وانت زايغ وفكرك اعتباطي ***** وروحك بالشعر سقطت بزيقي

وبزند الني والعقل المخاطي ***** مارح بيكون فيك على طقيقي

وياويلك عند ماتبلش سياطي ***** ع ضهرك تعزف المرش الموسيقي

ويا ويلك عند ما فرغ مشا طي ***** ورصاصي يلعلع ويضوي بريقي

وياويلك عند مايعلا عياطي ***** وعلى خوانيقك يسكر مضيقي

انا تياب التحدي من خياطي **** النصر بيي ,المجد خيي وشقيقي

القد ر والدهر خدامي ببلاطي *****البطش زندي, القهر عشقي وعشيقي

ونصيحه ن شفتني عالدرب خاطي ***** وعميطقطس وهج جمري وحريقي

يا اما متل شي ندمان خاطي **** استغفرني تاتخلص من جحيمي
يا اما زيح حالك من طريقي


ريح الزجل

[غير مسجل]

ملاحظه
انا احب الابداع بالزجل,احب الفكر الجديد الصورة الجديدة وماكتبت الرد اعلاه الا لاظهر لك ان التحدي ليس
بوصف الخصم " بالضفدع,او بالجمل, او بالسفيه, او.."

كما حاولت انت في ردود سابقة.
قد لا ارد بعد الان والله يكون معك يا شفيق يا ابني بدنا شعر بالزجل

موفق Good Luck

ريح الزجل

[غير مسجل]

تحية وداع للجميع عبر السيد بسطاطي:


يا بسطاطي تحيي من صميمي ***** لحضرتكم يا بو الكلمي الحكيمي

انت صنديحة الشعر المشذب ****** وفركة جبهتو لردي حميمي

كلامك فيض من القلب المهذب ******* ومن الروح الرقيقه والحليمي

كأنك بالشعر متلي معذب ***** من للي بيكتبوا مطالع عديمي

واذا مجد الزجل منهم تذبذب ****** بردي مصفرني وردي سليمي

كلام الحق لو مره تكذب ****** يمكن يختفي جمعه ولكن

بترجع تنعشوا نفوس العظيمي

ريح الزجل

[شفيق]

إذا بدك تحارب في مجالك ************* مجالك متل شعرك ما حلالك

ضعيف ومهتري وشعرك مصدي ************ وجايي عالبشر تظهر دلالك

رغم أنك ضعيف ومش عقدي ************* نزلت حدك تارفعلك خيالك

خيالك مقتبس في كل ردي ************* وخيالك صار بيعادل خيالك

بضعفك مدعي والوضع جدي ************ بأنو مركزك عالي بسؤالك

وأنا بشفق عليك بكل مدي ************* ولولا بالشعر في عمر خالك

مرة قال كنفشيوس بحدي ************* الذبابي بمدفعك فيها تطالك

وأنا الليلة بشعري بوقت شدي ************ ومابدي حط هالمدفع قبالك

زعلت من بعد ما أرسلت ردي ********** وقلت رجال,,,والضعف برجالك

وبعد ما وضعت إيدي فوق خدي ********** وجدت أنك مأوشك عا زوالك

ومثالك ضعف يا ورد المندي ************ وأنت بتحب هالرقة بمثالك

وقلت أنو النعومية تقدي ************ وهيك الخوف في قلبك ومالك

بفكرك يا مهاجر أنت حدي *********** وبعجقة مركزك مشغول بالك

أنا لو كان بالأشعار بدي ************ بهدك أنت والمركز ومالك

وبالإبداع تفكيرك مودي ************* شو هالابداع يا شب بجمالك

صرت بدك عهالكلمة مهدي ********** وعقصبة رقبتك تزرد حبالك

بعد ما ربحتك ظهرت المودي ********** شفقت عليك ووجودي دعالك

أنت نفسك زغيري ومستبدي ********* ما لك مدعي يا فلان ما لك

بس اليوم هالكف الب يدي ************ بدو يطبع بوجك هلالك

هيك الرد عا قول التعدي ************** وأنت ظاهر بنقصك وبكمالك

بوصفك نفسك بوصف التصدي ************ عملت حالك الرب وشو جرالك

أن كنت ربي أنا رح شد شدي *********** يا كبرك يا سموك يا جلالك

أمرت الكون وبإيدك مسدي ************** وزمن بتكسر بهيبة بكمالك

هوني النقص في هالعقل هدي ********* نسج قصة وهم رفعت حمالك

الله عملت حالك بالتحدي *************** العوض بسلامتك عقلك مخرب

********************ضروري بالخرابة تطم حالك***************





إلى حسان


اشهد يا حسان المعنى عالكلام ********* مين سابق مين في ضرب الحسام

ومين سابق مين في طيب الخزام ******** ونفح العطور الطيبة وأعلى مقام

اشهد عليي بالمعنى يا إمام ************ وما بزعل ,, عليي إذا هالحكم قام

وحط رأيك واشهد بصدق الضمير ********* مين فاز ومين جوا القبر نام

[غير مسجل]

حبيبي شفيق:
منذ بداية هذه الحوارية وانت تدعي بانك انتصرت او فزت . مع ان هم الفوز لم يكن في حسباني, فهمي كان ان
امارس موهبة جميلة احبها وايضا اغناء هذا الموقع المميز لبلدكم الذائع الصيت. ونزولا عند رغبتكم بالحكم على نتيجة الحوارية اقترح مايلي(بعد موافقتكم وموافقة المعنيين):

1-ان يقوم كل زائر بالتعليق او بالحكم
2-ان يقوم السيد رامي خوري وبمساعدة الشاعر بسطاطي
بتدوين الحوار الشعري فقط ( دون الجدل الكلامي) ووفق التسلسل . مع اخذ بعينالاعتبار انك في بعض الحالات كنت ترد بعدة ردات .اترك للبسطاطي القرار باختيار الانسب
3-ان ترسل المحصله الى خمسة اشخاص.اقترح ان يكونوا اولئك
الذين نشر لهم موقع مشتى الحلو.كوم قصائدا وهم جميعا من
بلدكم وانا راض
4-ترسل النتائج للسيد خوري مباشرةوتنشر المحصله النهائيه فقط دون ذكر من صوت لمن تفاديا للاحراج


اخيرا رجاء لاتقولني مالم اقل.ماقلت اني الله العوذ بالله ولكن اله الشعر شيء مختلف تماما:

بالشعر فيني روح امشي عالمياه **** وبقدر عديم الفكر ردلو الحياه
ومن كتر ما انتي عميق بجورتك**** بينت حدك بالشعر متل الاله


بيتين مش اكتر



على فكرة رجعت بس منشان حضرتكم,وساغيب حتى اعلان النتيجة ومبروك للموقع وللقراء لانهم هم الفائزون بكل
الاحوال
سلامات يا شفيق
ريح الزجل

[شفيق]

شكرا لألك استاذ فريد الغالي...

أنا موافق عكل الشروط اللي ذكرتها حضرتك ,,,,

بس برأيي يكون في لجنة حكم مختارة ,,, واللي بدو يصوت من الناس يصوت بس برأيي المتواضع أنو ما ناخد تصويت من شخص غريب ما بتعرفو لجنة الحكم حرصا على مصداقية التصويت....

وأنا راضي بالنتيجة شو ماكانت لأنو لو ربحت بيكون أكبر شرف لألي

ولو خسرت أكبر شرف لألي لأني عملت محاورة مع شاعر كبير ومحترم

وبرأيي أنو النتائج ترسل على موضوع جديد لحتى نشوفو أنا والاستاذ فريد ....



شكرا كتير للاستاذ فريد ولإدارة الموضع

وبتمنى دراسة طلبنا

[شفيق]

شكرا كتير لألك يا استاذ فريد.....

والله العظيم مافي ولا كلمة بتعبر عن اعتذاري من شان قلة أدبي وشكرا كتير ,,,,, و أنا وعم حاورك كنت ما عم حاورك كنت عم بتعلم منك ,,,,

ومتل ما بيقولو عنا كمان,,,

مع احترامي وتقديري

شفيق