برقية لآدم وحوّا

[مروان]

ياآدم شوف إبنك شو جرالو---- ولأيّا مرحله وصلت حوالو

مَعادت وسعت الأرض بمداها---- لأشرارو وظلمو وإحتيالو

ولا عاد الشمس تتغاوى بضياها ---- ولا عاد البدر يتباهى بجمالو

ولا الأزهار تتغنّى بشذاها ---- من الإنسان ومن خِسّة عمالو

***

ياآدم شوف هالأرض وغناها ---- ولإبنك خيرها طايف غلالو

ثَمَر وبحور وكنوز بثراها ---- زياده فوق حاجاتو وأمالو

لاكن واحد يعيش برَخاها ---- وواحد عاجز يطعمي عيالو

***

وبَدَل مايصون نعمتها وحلاها ---- ويشكر فضلها ويرشد جيالو

صار يْلوّث ترابا وفضاها ---- ويقتل إخوتو ويمحي جبالو

***

وكان الدِّين مبني بالبداها ---- على الإيمان بالرب وكمالو

بسّ الناس مدري شو دهاها ---- فُرَق متخاصمه صارت حِيالو

العداوه بينهن دايم بَقاها ---- لإنّو كل شخص حاطط ببالو

إنّو فُرقتو الله اصطفاها ---- ولباقي الناس مش فاسح مجالو

***

ياآدم بعد هاالحاله وبلاها ---- وعَمايل إبنك ال مافي بدالو

امتى منفهم العِلّه ودواها ---- إنّو الناس والكون بمطالو

أُسْرَه واحده كامل بِناها ---- بتسبح في حضن الله وخيالو

***

ياحَوّا بعد ماآدم سواها ---- التقيتو والنّسل بيّن هلالو

مزالِك عارفه الدنيا وشقاها ---- بلالِك كان هاالعلقه الكبيره

ولآدم كان هاالخِلْفه بلالو

[مروان]

كل واحد عامل متراس --- من دينو ومن عاداتو

ليش بتتقاتل هالناس --- مازال الخالق ذاتو

***

لما الشمس بنورا تهِل --- مابتفرّق بين الناس

والأرض بتعطي للكِل --- خيراتا من دون قياس

سقالله يوم العتمي تفِل --- ونصير بنفس المقياس

بلكي سرار الكون نحِل --- والله منفهم همساتو

***