إلى عشّاق الشروقي

[Firas H]

[poem=font="Simplified Arabic,6,black,bold,italic" bkcolor="transparent" bkimage="" border="none,4,gray" type=0 line=0 align=center use=ex num="0,black"]
من حكم طبع الشخص ما زال بدّو يشيخ=بيحب يترك ألو ذكرى بطوليـّة
وبيصير يغزي الفضا ويهاجم المريخ=وبيخوض أكبر بحر عا كتاف جنـيّة
ومن دون قتل وضرب وحروب وصواريخ=ووقفة شموخ وإبا بلحظة مصيرية
الـ بيحب يلبس دهر ويخلـّدو التاريخ=يكتب بهيدا القسم ردة شروقيـّة[/poem]

تحية لأعضاء المنتدى الكريم
متل ما هو معروف لون الشروقي أحد أهم ألوان الزجل المعروفة وفي الو نكهة خاصة لما الإنسان بيكتبو

وحبيت إفتح قسم خاص للشروقي للأعضاء الكرام حتى نجمع قصائد الشروقي فيه

ويا ريت من الأعضاء الكرام من بعد إذن أستاذنا المشرف أبو علي بنوت أنو يلتزمو بوزن الشروقي للمحافظة على جمال القصيدة وإنسيابيتها
وشكرا

[Firas H]

هاويكي

ما عاد عندي جلد إحمل بُعد وغياب ــــــــــــــــــــــ لو كان بدّك رجا قدران أوفيكي

بلكي بليل السهر عا جوانح السرساب ــــــــــــــــ طيفك بيبعت غفا بمركب تصابيكي

ومعقول تنسي الـ مضى والقلب يلـّي داب ــــــــ وتنسي عبير الهنا في روض ماضيكي

والقمر منـّك أخد نور الحلا الجذاب ـــــــــــــــــــ والزهر خمـّر ندى ودموع يسقيكي

وياما وياما ضحكت عالحب والأحباب ـــــــــــــ ويوم اللي منـّي دنِت لحظة تلاقيكي

آمنت أنو القلب مهما تسدّو بواب ــــــــــــــــــــ مجبور يرضي بعجل سطوة تعاليكي

وقدّيش فيكي غلبت تا توضّحي الأسباب ـــــــــ وما كنت لاقي سبب يشرح تجافيكي

بيكفي .. دموعي انتهت وتخدّروا الأعصاب ـــ وما عاد عندي سوى ( الله يخلـّيكي )

وياما ملامة سمعت من الأهل والأصحاب ــــــ ومطلوب فسـّر لهن سر الولع فيكي

من دون طولة شرح او سرد أو إسهاب ــــــــ بأبسط عبارة أنا إنسان هاويكي

[mohamad kh]

يعطيك العافية على احلى الشروقي

مشاركة متواضعة اما ابداعك خيا فراس:
** ** ** ** ** ** ** *
[poem=font="Times New Roman,5,black,normal,normal" bkcolor="transparent" bkimage="" border="none,4,gray" type=0 line=0 align=right use=ex num="0,black"]
قلبي بليل الشجن شهقت اناهيدو = مكحل عيون السهر شعري بتسهيدو
استنيت طلعة شمس تـَ الصبح يشقع نور = ويغني حوض الورد اجمل تراويدو
جفرا يا شمس الصبح هاتي عن التنور = خبزات زيت الصفا نغَمِّس بترتيدو
وْنِورد ونروي الورد جوقات نغم طيور = ورد المحبة الْ بهنينا بتوريدو
ما بين دور الهنا انت وانا مندور = حتى يفوح الشذا باجمل اناشيدو
والعيد سعدو يعود ويوفي اغلى نذور = وقديش حلو السعد يوفي مواعيدو
شاعر يغني الشروقي بنغمة الشحرور = تعتق خوابي النبيذ كرمة عناقيدو
وشاعر يغني المعَنَّى والمعاني جسور = يعقد محبة وصفا وشمع الوفا يقيدو
يا اخي فراس اذا عرابة تنادي صور = صيدا تصيد الصدا من بعيد وتعيدو
تـَ الصوت يردد رجع ترجع معاه عصور = والناس تحفظ عهد رجعو بتجديدو
البلاد بين البلاد بتريد الها حظور = نحنا حظور البلاد في بلادنا نريدو
قال الزمان الْ مضى واكتبي يا سطور = اسطورة طول الزمن واسطورها يزيدو
تـَ الروح تحيي الجسد والارض تحيي زهور = والحب يحيي بالمنتدى تقاليدو
وفينيق ينادي على خطيب بالشاغور = يللا عَ منبر زجل نحيي الاسطورة
ونحيي الحقيقة بمنبرنا وتوحيدو[/poem]

[Firas H]

بكلتها

حادثة صارت معي بالجامعة


مرة سرقني الحلا بآخر شهر أيلول ـــــــــ بفترة ما تبدا الغصون تزت خضرتها

ساعة ما جيت الصبح عالجامعة ومعجول ــــــــ قاصد عا حصـّة من الممنوع فوّتها



ودْخلت دخلة بعجل متلبـّك ومشغول ـــــــــــ ودكتور بلـّش بأوّل شرح ساعتها

وما لقيت مطرح إلي بعجقة فكر وعقول ــــــــ أكتب وأنقل دروس كتير بمقتها



وما لقيت إلا وبنت زاحت شبر بالطول ــــــــــ وعِمْلت حسابي ما ضايقها بقعدتها

وقْعدت قعدة أدب ولسان حالي يقول ـــــــــ سبحان الله اللي خلا ّ الذوق شيمتها


وكل ما يمر الوقت والدرس فينا يطول ــــــــ وتخسر زهور الفهم عالشرح زهوتها

آخد بحنكة نسر نظرة خطف بأصول ـــــــــــ وشوف الصبيـّة بجنبي تزيد حيرتها



وفجأة ونسمة هوا من غامض المجهول ـــــــ فيـّق بقلبي العشق تحنان جيـّتها

هبـّت ونقلت شعر مفرود مش مجدول ــــــــــ غطـّى بوجي النظر يا حسن هبـّتها



التفتت وصوبي عطِت نظرة عذر مقبول ــــــــــــ مع نص نظرة كِبر تا تزيد قيمتها

وترجع بنظرة ملل من شعرها المغزول ـــــــــــ تفتح بسرعة وعجل سحـّاب شنتتها



وتسحب بخفـّة ورفق بكلة شعر وتجول ـــــــــ وتجمع شويـّة خصل بحفاف لمستها

وتزرد الشعر البهي ببسمة ثغر معسول ــــــــــ وتزرد ليالي العمر بسنان بكلتها