شقف من تمثال..

[عصام يوسف]

كان زر الورد عم يكبر
بعدو صبي ..
وسع المدى خيالو
حلمو قصيدة ..
بيوتها.. فراشه و ندي
عم تسهر بْبالو
..
صار وهج العطر يتفجّر
صار يهدر لون شلاّلو
..
نْ شفتو بدي بالشوك يتزنّر
و هوّي و عم بيلعب
جرح حالو
لا تفزعوا من الريح يتكسّر
إبن الجمال
بيحمل السيف .. الصلا
الرمح .. الحلا
بيتعلّم بآذار ..
أشعار .. صبح و غار ..
يمكن لغير الزهر ما نْقالوا

إي ..هيك الله
حمّلو .. الشوك .. السيوف
اللابسي أخضر ...
و رماح ..
من كاس الندي بتسكر
ما حمّلو .. خنجر !!!

[عصام يوسف]

هالشاعر..
اللي ألْهَن حروفو
كان متخبّي
بجرح قايين
صار الوحي
يشوفو !!..

بصلّي إلو
بفيروزو بصنّين
بشِفّة سهل
شاف الفضا .. فناجين
...
اللي بيخترع تكوين
من حلوين .... !!!؟؟
نحنا بملكوت الحلا
ضيوفو..
قبل الدني و الدين
...
إي ..رح صدّقو
و إركع مع ألوفو
و لوما شفت
مسمار بكفوفو!!..

[عصام يوسف]

حاج .. يا إزميل
منّي جروح تْشيل
تعّبتني من القال
تعّبتني من القيل
و صَرلك سني بتقول
باقي حرف
و بصيّرك إنجيل ...

بعدك بذات الإيد
بتصب منّي نبيد
و صَرلك سني بتقول
عملتك مسيح جديد ...

تركني .. طهق
قلبي من الآلام
من حلم حريّه
ضيّق على شبابيك عينيّ
شو هم لو إبقى حجر
و يكسّروني عيونها هيّ ...

[عصام يوسف]

هالأرض
هيّ و السما
شِركي
لا همّها فرنسي
و لا تركي
بتطمع بزر
النرجس النعسان
و ما بتطمع بثروه
و لاتِركي ..

ترابها ..
بشغل الورد فنّان
تا يرسم
عْلا شفافنا الضْحِكي
و حتّى الصخر .. إنسان
في وجدان ...
شو باك ... يا هالصخر
ما بتحكي ؟؟!!

[عصام يوسف]

بينك و بين العتم
شو بتقدر تشوف !!؟؟
صوتك الأطرش ..
خوفك اللابس كفوف!!
وهمك بإنّك فارس
و كل المدى رهجة سيوف !
شهوة قمر
عم يفتح قناني السهر
و يصب كاسات الضيوف !
وصيّة نبي عم يشلح
كتاب الدني فوق الرفوف !

شايف ؟؟!!...

إذا بتقدر تشوف ..
أول ما وجّك
يدعس تراب الحلم
و الليل بعيونك يطوف
بتضّحك عليك الدني
و بتهر نجمات السما
بْحرجك .. ألوف


....
إي مليح ..
ما بتقدر نشوف !!
و لا هرّت نجوم السما
بحرجك .. ألوف

[عصام يوسف]

سمعنا .. بإنّو العقربه ..

عم تضيّف سم

بقناني الدهب .

قال .. جارتها الدني

جابت صبي .

آه .. شو مْحِبّه ..

شو فيها عاطفه

بتشعل بعتم خيالها

و ما بتنطفي

من كتر ما بتخجل

شي نجمه تشوفها

بتلبس عتم ليل السهر

و بتختفي

بتركض تلاقي ضيوفها

بتفتح بلهفي كفوفها

و بتطيلع قناني النبيد من الخبي..

و بتصير تعصر

قلبها كلّو بفرحة هالصبي

بتصير تسكب خابية ْ إحساسها

متل لْ كإنّو المَحْبَره

عم تشرب من المكتبه .

بتشك إبره متل سنّارة سهر ..

بتطرّز الليل العَبي

و بتخجل.. و متل الصبيّه بتختبي

بتصير تحلم شي أمير يزورها

لابس عبايه مقصّبي

....

إي دشّروها تحلم بمنتورها

هوّي و عم يفرفط على شفّة صبي

بيجوز .. ما بتعرف بإنّا .. عَقـْرَبه