مغفورة خطاياكي ( شروقية)

[kino1]

مغفورة خطاياكي

بليلة عغفلة من الأهل وبنشوة السكران
دقت الخمر سرقة من شفاف عرقانه
وطبعت بوسة عاجمر تمها الدفيان
بلكي من شفافها بتدفى شفاف بردانه
وقربت دوق العسل من خدها المليان
واقطف حبة كرز عن خدها التاني

قالت بيي من التعب مرتكي وسهيان
وعيون امي من السهر دبلانه
ولك يا سارق الكرم والناطور غفيان
عناقيد العنب أطيب لو تصير بقناني
مش هيك لازم تعمل لو كنت بردان
تلجك داب على الجمر وبلحظات طفاني
البدو يدوق العسل من جرة الجيران
رح ياكل لسع من نحلات فلتانه

قلتلها خمرك لو تعتق بينساه الزمان
وما بيعود ينباع لو صار مجاني
وتلجات قلبي لو تنزل على النيران
بينطفي التلج وبتبقى النار شعلانه
واللي بياكل عسل من جنة الرضوان
ما بتفرق معو اللسعات ولا صرخة الجاني

حطي الجمر عالتلج بكرا بيجي نيسان
نارك بتنطفي وبتصبح الجمرات رمدانه
وتلجي بيدوب بيعمل بحر من حرمان
وبقضي العمر دور عخيال مرا هربانه
مش هيك شرع الهوى بيعلم النسيان
العمر عميركض والقصة مش حرزانه
بكرا بتوعي بعد ما يفوت الاوان
وبتقولي انا شو عملت بزماني
وبتروحي تقعدي عكرسة الرهبان
وتعترفي لبونا وتقولي غلطانه
بالماضي كان في شب اسمو كنعان
فتحلي بواب قلبو.. بس كنت جهلانه
ولما عالدني وعيت متل كل انسان
مالقيت حبيبي الكان يهواني
بطلب منك يا بونا وبكل ايمان
تصلي لأجلي صلا ربّابي
بلكي بيرجعلي حبيبي البلأمس كان
يورق بشعري غزل ويزهر غناني

ويكون هالراهب أنا واستعوز الشيطان
وبليلة سجود وصلا وشموع شعلانة
صلي أبانا لاجلك وناولك القربان
وقلك مغفورة الخطايا المنها عمتعاني

[عصام يوسف]

شربتي من النبع شـــــــويْ ******* و شــــــــفتو مْنْ بعيد
لا قادر يــــرجــــــع مـــيْ ******* و لَ يصــــير نـــــبيد

خصرك متحف قصـــداني ******* و قصــــــر و عمدان
فيه زهــــــــور الدبـــلاني ******* بْ تنــــــطر نيــــسان
و صدرك مسرح رومانـي ******* و فوق الــــــــــبركان
نار جهنّم شـــــــــــــعلاني ******* عَ جبـــــــــال جلــــيد

[جعفر حيدر]

يا حلوة عيوني عليكي *** ضويتا شــموع
حتى تضـوي حواليكي *** وبالعطر تضوع

بحبي وقــعت بايديكي *** وشبعت وقوع
عيني شــبكت عينيكي *** والأيـــــد بايد

[عصام يوسف]

شروقي :

صبّي جرار الندي عَ جسمك الشـــعلان
مطرح مَ كنتي على جناح الحلا تمــيلي
و خلّي نسيم الصَبا يحيّك إلك فـــــستان
مطرّز بوهج السهر عَ ضَو قنـــــــديلي

منشان شوفك بعين العاشـــــق الولــهان
أجمل قصيدة غزل من دون تفـــــــعيلي
وغافل عيون القمر والليل و الجــــيران
لمّا عيونك بهمسة شــــــوق تومـــــيلي

و قطّف حبوب الكرز والتوت و الرمّان
و عنقود أشقر حلو عالصدر بالـــــحيلي
لمّا الحرامي الزكي بيدخل على البـستان
مفروض يقطف من البستان تشــــــكيلي

و لمّا يفيق الفجر عَ سريرك الـــــعرقان
يلملم حبوب الندي بخيطان منــــــــديلي
فتّح عيوني الصبح شوفك أنا و نعـــسان
لوحة رسمها المسا فــــنان تــــــــشكيلي

[جعفر حيدر]

يا ريتني بعرف أكتب شروقي
بس مشكلتي اني ما تعلمتو
كتبت منو شوي
بس ناقصني كتير

مين بيحب يعلمني
يكتبلي عالرسائل
او عالعام

بكل محبة
جعفر