سفر التكوين

[شام]

مرّة كنت ضجران عم عاني أرَق

معْتلي عَرْشي إسكَر وإشرب عرَق


وما كان لسّا بعد في غيم ومَطر

ولا في سَمَا تضوِي إذا رَعْدي بَرَق


كِتْر المَلَل ولّع بعينيي الضَجَر

خاطر غريب وأحمق بفكري مَرَق


قرّرت إخلق كوكب وليل وقمر

ونهار يطلع كلما نجمو شَرَق


أنهار وجبال ووِدَى، طيور وشجر

وأزهار من قوس القَزَح لونا انسرق


ومن بعد ست أيام عم برسم صُوَر

عِرْقوا صابيعي وفَلـّتوا نقطة عَرَق


بالغلط منها بهالدني خلقوا البشَر

تخربَط مزاجي ونور أحلامي احترق


إنسان إنسانيّتو وأصلو نَكَر

وبحقد مجرم دمّ إخوانو هَرَق


يصنع قنابل، أسلحة بتفني الحجر

ويجمَع فِرَق وجيوش تَ تقتل فِرَق


يفَبْرَك وصايا ودين، باسمي، وعِبَر

وكل شي وضع قانون، قانونو خَرَق


ولما شفت من خَلق هالكائن ضَرر

وقصدي بوجود الخَلْق عن قصدو فَرَق


قررت إطوي صفحة وجودو أنا

ويصير إسم البشر ذكرى ع الورق

[racan]

تحية شام
القصيدة حلوة كتييييير
بس برأيي لو كتبتيها بغير صيغة (الأنا)
كانت بتطلع أحسن
ولا شو.....

[شام]

تحية شام
القصيدة حلوة كتييييير
بس برأيي لو كتبتيها بغير صيغة (الأنا)
كانت بتطلع أحسن
ولا شو.....

هلا راكان.. يسعدك..

هيدي كتبتها على سكرة فشة خلق.. من هيك يمكن"تضخّمت" الأنا عندي

حتى كنت حاطط فيها كام "تحشيكة" ماكنة.. وكان عنوانها قسم من تحشيكة من كعب الدست :cheese:بس عدت غيرتها كرمال ما نخدش "الحياء العام"

[the jackal]

حتى كنت حاطط فيها كام "تحشيكة" ماكنة.. وكان عنوانها قسم من تحشيكة من كعب الدست :cheese:بس عدت غيرتها كرمال ما نخدش "الحياء العام"

دخيلك كلشي ولا ينخدش الحياء العام
بهالأيام ما ضل لا حياء عام ولا خاص

القصيدة جميلة بكل ما تحمله الكلمة من معنى
بس ما قلتلنا شو هني التحشيكات؟؟؟؟؟؟

[شام]

دخيلك كلشي ولا ينخدش الحياء العام
بهالأيام ما ضل لا حياء عام ولا خاص

القصيدة جميلة بكل ما تحمله الكلمة من معنى
بس ما قلتلنا شو هني التحشيكات؟؟؟؟؟؟

هلا بالـ جقل (إسمك ع إسم شب بيكتب كتير حلو، كنت إقرالو بغير مطرح)
نحنا بلا تحشيكات.. ومش خالصين يا خيي.. خليها لربك.. (كنت كاتب "لكن ابن هالـ كذا مذا" )

على كل حال..
هيدي وحدة تانية "من نفس الخط القديم.. بس ع شي جديد" (ع قولة الإستاذ نور بـ "شي فاشل")

عليي يا أرض حقك عليي
إذا تركتك بإيد الإنسانية

لإني ما توقعت بصراحة
من هالكائن يطولك أذيّة

ولا تخيّلت شوفو بكل ساحة
رمز عدوان، ظلم وعنجهية

وقاحة يا بني آدم وقاحة
تبني هالـ "حضارة" البربرية

أنا جْبَلْتَك على طيبة وسماحة
وصَفا نيّة ونفس حرة أبية

وعطيتك من جَنى لساني فصاحة
وهَديتك ع حروف الأبجدية

ت تكتب شعر، موسيقا بصداحا
تحاكي ترغلة بلبل هَنية

وتزرع، والصحاري تصير واحة
وبعلمك تفهم الدنية وشو هيي

لقيتك فضّلت صوت المناحة
وحكمت بلاد بعقول الغبية

ودول للحرب بتكدّس سلاحا
وفقط بالقتل عندك عبقرية

منك هالأرض كترت جراحا
وملّت تحمل فعال الرزية

فعلك سَودَن الدنية بصَباحا
وقبل ما جهلك يسَودِن مسايي
بقيم قيامة الخلقة الدنيّة