فاتح يافاتح

[مرهج]

ياشمس كل ماالليل بكاني .. وغبتي وتركتي الشاعر يعاني
من ادنك بشدك ت رد النار .. والنور عخصومي وع خلاني

عمرت للقصدان أحلى مزار .. وشكشكت فيه زهور بستاني
وصارت عروس الشعر منو تغار .. وتقول بدي ياه فستاني

يافاتح الفاتح بلاد كتار.. وشعرك صفي انجيل قرآني
لما التقينا من سنين, الغار.. بتيجانك تعلق بتيجاني

يارب نرجع نلتقي بمشوار .. تاني نغني بشي حفل تاني
تانرسم اللوحات بالبيكار .. وتتشربك لوانك مع لواني


أنتي وأنا طفلين كنا زغار .. ركدناع شاطي شعر وجداني
غناك تم الجرح عالغيتار .. وتم الجرح عالناي غناني
وصرنا حديث الروح عالأوتار .. نمرجح غناني قلوب حزناني
وندلق نهار الموهبي ع نهار .. الأفكار ونعبي بالقناني

يافاتح من الغصن كل ماطار .. شحرورشعر بيفشلو تماني
ولازم بقى للشعر نفتح دار .. مشعشع مهفهف متل رماني
الشاعر يافاتح للحياة جرار .. زيت وخمر وطحين قرباني
الشاعر دهر من صفنتو الأشعار ..بتمطر عياني ورا عياني

وهلق قبل ماروح ياشعار .. خلوالدني تنقل عن لساني
فاتح اتربع عاعرش الكبار .. بمي الزجل حامل عصا موسى
وبجنينة الأشعار بستاني

مرهج

أرجو عدم التعليق أو الرد الا من فاتح وأتمنى أن يلتزم برجائي السيد بيدق / Badar
وكل من يدخل تعليقا بالخطأ يستطيع أن يمحيه ذوقا أو سيمحيه مشرف الزجل السيد بنوت مشكورا

مع الاحترام للشعراء بسطاطي ,Sageh, بنوت ونجيب سجيم

[عصام يوسف]

يا كاس الخمـــر دوّقني شفافك *** أنا شِفّي يتيـــــــــمه عا ضفافك
و إذا شِفّي بشِفّي ما تلاقــــــوا *** الحلا ما فيه يسكــــر من هَفافك

عيوني متل موج البحر راقوا *** و هاجوا عند ما الريح استضافك
لأنّو الريح ساعـــــــة إنطلاقو *** مرق متــــــــل العبايه عا كتافك

إذا جرار القصــيده ما انداقوا *** و نطـــــــــروا بالكنيسه إعترافك
إلاه الخمــــر بيديقــوا خلاقوا *** و بقلّك قوم إشـــرب , مين شافك

الشمع لـــوّن عا كفّك احتراقو *** تا يتعلّم حلا مـــــــــــن إحترافك
و ربيع الشعـــر لحظة انعتاقو *** شافك عـــــرس و استلهم زفافك

حديث الشاعـــــريه في سياقو *** دلق حالـــــــــو بكتابك و بغلافك
تا صابيع القمــر كْلما اشتاقوا *** يدوقوا الطــــــهر بيدوقوا عفافك

الفرات اليوم بيغــــــل بْعراقو *** و زايد انجــــــــرافو و انجرافك
لا هوّي فيه لحظــــه عا فراقو *** و لا فاتح فيه يمـــــرق بالطبيعه
بلا ما يدوق حبّة مـــن قِطافك

[مرهج]

يافاتح مرحبا كيفك سعيده .. يافاتح بالزجل دنيا بعيده
ربيعك زركش فصول الطبيعه .. ورمى غطيطة صباحك عالقصيده

ولأنك أنت شاعر بالطليعه .. بصوره ملونه وكلمه جديده
عطيتك مشلح الجمله البديعه .. وسقيت زهور فنك من وريدي

ياشاعر ساحة جيوشك وسيعه .. وأنت بالمعركه قائد حديدي
الفوارس كلها خلفك مطيعه .. عذات المشوره وذات العقيده

وأنا بالشعر خرطشت الشريعه .. وصرت صاحب الآراء السديدي
وم في بهالمنتدى مهره سريعه .. والا لجامها كامش بايدي

واذا في ناس بتحب القطيعه .. وطق براسها شرش الحسيده
الفجيعه مش يعيفونا الفجيعه .. يروحو عالنميمه والمكيده

ويابسطاطي اذا شفت الزريعه .. ورده مفتحه و ورده بليده
بايدك اشمط الورده الوضيعه .. وبلا ماتكون ورداتك عديدي

وياأهل المنتدى حدودي منيعه .. وصرت قاعد بهالقلعه الوحيدي
ومابحمي أرمله وبقتل رضيعه .. لأنو الكل خفقاتي بنهيدي

وبترفع علأمور الفظيعه .. الخسيسه المحزني غير المفيدي
ولكن في بشر هوني -قطيعه- .. هلكتني وعمتراسل بريدي
بتحكي بالعلن كلمه شنيعه .. وخلف البواب بتقلي ياسيدي
وبدهن بركتي تصفي وديعه.. وم أقدر انقد باسم المجيده

وأناالبشعر جولاتي مريعه .. المواقع كلها عليي شهيدي
ورغم المعرفه روحي وديعه .. لأنو كل شعار المواقع
بعين الشاعر الأكبر زهيدي

مرهج

كمان أتمنى عدم المشاغبة بردود عشوائية من الآخرين
مع الاحترام لساجي, فاتح , بسطاطي , بنوت ,سجيم ومروان كمان

[عصام يوسف]

يا مرهج إذا بتكــــــــــــــــون مارق *** سمعت صوت الرعد و البرق بارق
بتخلق موهبه حــــــــــــــلوه برنجي *** لكن موهبه مــــــــــــــن نوع خارق

إذا سمعك حــــــــــدا بتحكي فرنجي *** و قلّــــــــك هون كاسر هون سارق
يا ويل اللي بقـــــــــي جوات طَنجي *** و ما زار الأندلس مع جـــيش طارق

إنت جرحك متـــــــل جرح الكمنجي *** جرح حارق قلـــوب و جرح حارق
الشفق لمّا رســـــــــم لونو الأورنجي *** عن خدّك ما شـــــــــاف كتير فارق

اللي بيظن الشعــــــــر لعبة جومنجي *** تايــــــــــــــه بالمغارب و المشارق
اللي حجــــــــــمو قد نقطه عالسْفنجي *** الله يساعــــــــدو بْصحرا الطوارق

في ناس بيحملوا للعــــــــــــيد صنجي *** و إنت حامـــــــــــــل للقيامه بيارق
و إنا متلك مــــــــــــــن الأزهار بنجي *** ما بسمــع صنج فوق الصنج طارق

إنت ما هنت مرّه لــــــــــــــيل زنجي *** ماعندك ظرف عادي وظرف طارق
إنت ردت القصيـــــــــــده بكل غنجي *** تتكلل عـــــــــــــــــروس الشاعريه
و تشــــــــــــوف الصبح بالليل شارق

[مرهج]

عند ماالرب في عيد التجلي .. خلقني للشعر شاعر تجلي
انبهر فيي اله الشعر بهره .. وقللي مطرحك تقعد محلي

ومره مع الرب سهرت سهره .. وسألني عليك يافاتح وقللي
أنتو اتنين زهره حد زهره .. وفله عمتميل قبال فله

الحسد قدامكن بعيون وهره .. و وراكون صار كلمه مايخلي
وضهر من قمقمو الحاسود ضهره .. وعبى بحقكون نص المجله

وجودك حد مني صار قهره .. بقلب الفكرو يحطو مذله
ووجودي حد منك صار شهره .. لدوله بالتحدي مستقله

واذا الأصوات مابتكون جهره .. م فيها بساحة المنبر تعلي
وأنت مهره وأنت بالشعر مهره .. تحت باطك وباطي ريح هوجا
وتحت باط للي فلو في مسله


مرهج

[المقنع]

عال عال عال.... حلو ياشباب...

++++++++++++++++++++++++++++

يا شــعّار المــوزونـه +++++ عــالــردة لا تلــوموني
مابسكر عاشرب الخمر +++++ بخمر الشعر سكرتوني


+++++++++++++++++++++++++++