من شاعر مرمريتا الدكتور إياد أحوش لحبيبتو المشتى

[عصام يوسف]

سرّ غابْة السّمَّاق - شعر

د. إياد قحوش 07/02/2007


وِجِّ الصِّبِحْ إمِّي
قالِتْ ياإمِّي الْحَاقْ

سِتَّكْ عَلَى التَّلِّهْ
الْفَوِق النَّبِعْ الِكْبيْر
وْحَوِّشِلْنا سِمَّاقْ



فِكَّرْتْ عامَهْلِي
بـْ هالـْ بَيتْهاعالتَّلّ
وْشِبَّاكْها بِيْضَلّ ..

بِيْضَلّ ينْدَهْلي
ولَمَّا مْرَقِتْ .. ماكان شِبَّاكْها مَفْتُوحْ
لِمَّسْت خَشْباتُو
وِتْرَكِتْ عِنْدُو الرُّوحْ
وْقَطْفِةْ حَبَقْ شِمَّيْتْ .. تـَ قِلّها مِشْتَاقْ
وْرايِحْ أنا بَكِّيْرْ

عَ غابْةِ السّمَّاقْ





وْهَوْنِيكْ ..

بِالْغَابِهْ

زَهْرَهْ بَعِدْ زَهْرَه .. نِتَّفْت هَالزَّهْرَاتْ

نِتَّفْتْها وْعَمْ قُولْ:

بِتْحِبّني تِخْمِيْنْ

وْتِخْمِيْنْ كِذَّابِي

وْيِقْطَعْ شْرُودي صَوتْ .. سِتِّي عَمِ تْقِللِّي

السِّمَّاق بَعْدُو زْغِيْر

وْبَعْدُن وْرَاقُو رْقاقْ

"صَابيعْ ببْيي"
وْقاعِدْ أنا وْسِتِّي

مِدْرِي أنا وْهِيِّي

في غابْةِ السّمَّاقْ





قِلْتِلّها: سِتِّي .. شُو الْحُبّ ياسِتِّي؟
قَعْدِتْ عَلَى صَخْرَه

وِتْطَّلَّعِتْ لَبْعِيدْ

وْطِلِع الصِّبِحْ .. ضَوَّا

وْدَحْبَى نْهَار جْديدْ

وْضِحْكِت وْقالِتْلِي

الحُبّ مِتْل الْعِيد

مْقَدَّس مِتِل سَجْرَه

مِتْلِ الشِّتِي بْتِشْرين
بْيِنْزُلْ عَ الِعْناقيد

وِبْيِمْرُق الْعَصْفور

بِيْدُوق خِصْلِهْ دْوَاقْ

وَهَبّ الْهَوا شْمَالِي

عَ غابْةِ السّمَّاقْ


وْراجِع أنا وْسِتِّي

وْحامِلْ عَ ضَهْري كيْس

حْكاياتْ مَهْجُورَه

عَ الحُبّ

بِالأسْرار .. وْبِالشَّوق مَصْرُورَه

وْحَدِّ الْحَبَق

هَوْنيكْ ..

عَ َرفّ شِبَّاكا .. المَعْجُوق بِالأحْلامْ
حِطَّيْت كِيْسِي وْرِحْت ..

تـَ تْزيدْ بالأيام .. حْكاياتْ هَالْعِشَّاق

وِنْضَلّ سرّ زْغِيْر

عن غابْةِ السّمَّاقْ.