حلا منّو .. و فيه

[عصام يوسف]

بهاك الصحو
لْ من وج عينيكي شهق
و لهفة نهر
شي من صلا شي
من حبق
صارو القصايد يخلصو...
شو بيكتبو !!! ....
حالن عا ورده ...
و العطر عبّا الورق..؟؟

ما ضل في إلهن
مطارح عالسطور
و كل الورق
شي خصور شي
غنجة خصور
و يحترق حبر الحكي
بتم الزهور
كلما الندي
عا آخر الورقه مرق

شو هالندي
يكتب .. و إنتي ناطره
شو خاطرا بْبالو
تا يكتب خاطرا..؟؟
حبوب الندي
بْسرقة حلاكي شاطرا
و أحلى الشعر
يلّي من الورد انسرق

نقطة ندي توقع
من الورقا بْحنان
تنزل عا ورقا تانيي
يضج المكان
متل لْ كأنّو
بتعزف بيانو كمان
و بين الموسيقا و الشعر
قلبي احترق بخّور
فوق المذبح..
و وجّك عبق