اللقاء المنتظر "فاتح ومحمد خطيب"

[mohamad kh]

رجاء وطلب خاص من كل شعار المنتدى انو ما حدا يعلق هون في صفحة للتعليق اكتبو تعليقاتكو فيها
وبطلب من فاتح انو اي واحد بكتب هون رد انو ينقلو لصفحة التعليق...... وشكرا للجميع....
*******************
[poem=font="Arial,7,,normal,normal" bkcolor="" bkimage="" border="none,1," type=0 line=0 align=center use=ex num="0,"]
طَار الشِّعِر وِبْكَرْمِة المِشْتَى إرْتَمَى = وْغَنِّى قَصَايِد هَزِّتْ أْرْكَان الحِمَى
جِينَا عَلَى المِشْتَى. فْهِمْنَا بِالوَمَا = أنُّو الشِعِر لِلْشَّاعِر الحُر إنْسَمَا
قَدِّر يَ فَاتِح شِعْر بِالمِشْتَى إْحْتَمَى = بْتِحْذِف بِجُوز عْيُون ضَارِبْهَا العَمَى
لَكِن إذّا بِدَّك حُرُوفِي تْقِيمْهَا = إهْوَن إلَك قِيم النُجُوم مْنِ السَّمَا[/poem]

[عصام يوسف]

بالخل.. وهــمك يا محـــمّد نَقّعو *** حاجي على نجوم المجرّه تْشقّعو
لمّا القَصــــايد عَ الرماد يسقّعوا *** غير المحــي بالنار شو بْيتوقّعوا
بلّشـــــت محّـي تا كتابك وقّعو *** شــيل حرف و حرف تاني وقّعو
بس المصيبه كل ما محّيت فيك *** بْلاقي حــروفك عَ الورق بيبقّعوا

[جهاد علاونة]

عذرا عالتّدخّل ... لكن محمّد أطال في الإجابة ... أنا آسف بحقّ

[poem=font="MS Dialog,5,,bold,normal" bkcolor="" bkimage="backgrounds/14.gif" border="inset,5,#0000ff" type=1 line=0 align=center use=ex num="0,"]
خلّ ورماد ونار ... والثّلج انحرَق !! =شكلو الجنون بْواب تفكيرك طرَق
خْيال الشّعر مش هيك سرقة بينسرق=من صفنة الفكر اللي أوشك عالغرق
داير بمحّاية ع خلقة مفترق=تمحي قوافي أسكروا كاس العَرَق
شعري يَ فاتح توأم زهور الرّبيع=بقّع ع كلّ الكون ... مش بسّ الوَرَق[/poem]

[mohamad kh]

[poem=font="Traditional Arabic,7,,bold,normal" bkcolor="" bkimage="" border="none,1," type=0 line=0 align=center use=ex num="0,"]
تِشْقِيع، خَلّ، وْنَار، وِقْصَايِد عَلَى.. = رْمَاد قَلْبِي بْيِسْهَرُو يْنُولُو العُلاَ
بْعَام إلْ مَضَى يَا فَاتِح صْرِيخَك عَلاَ = الله رَيْتُو مَا إجَا عِنَّا الغَلاَ
وْلَلْبُقْعِةِ إللِّي ذْكَرْتْهَا دَمِّي غَلاَ = حْرُوفِي وْدِينِي فِي تَرَابُط، وِالصِّلاَ:
بُقْعِة حُرُوفِي مِثِل دَعْسَات النَبِي!... = بَوِّس حُرُوفِي وْقَدِّم لْ شِعْرِي الصَّلاَ [/poem]

[عصام يوسف]

يعني اللي سمعوا حــجّتك بيفكّروك *** كنت بأحــد و بخـــيبر و بدر و تبوك
يا ريت يلّي إسـم طاهر لبّســــــوك *** يوم خــــــــلقت كانوا بزمزم غسّلوك
لو هنت دعسات النبي اللي باركوك *** بدها القبايل و الصـــــحابه و المـلوك
كلّ ما شـــــبّهت حـــــالك بالنبــــي *** يشيلوا سبع جمرات حمر و يرجموك

[mohamad kh]

[poem=font="Traditional Arabic,7,,bold,normal" bkcolor="" bkimage="" border="none,1," type=0 line=0 align=center use=ex num="0,"]
يَ مْنَاصْرِينِي يَا فْوَاج المُلْهَمِين = دَخْلِ إلْ جَمَعْنَا بَلّغُو خَصْمِي الحَزِين
يَاللِّي نِزِل لَ مْحِمَّد يْهَيِّي كَمِين = مِثْل إلْ هَجَم بِالمَسْطَرَة صَوْب العَرِين
وِبْمَوْسَم الزَيْتُون يَا شَاعِر فَطِين = مَالَك سِوَايِي لاَ وَسِيط وْلاَ مُعِين
كِلْمَا يَ فَاتِح شِفتْنِي عَم إنْرَجَم = كَبِّر الفَلِّة* وْلَقْوِط شْمَال وْيَمِين[/poem]****************
*"الفلة": الفلة هي الشريطة اللي بتنحط تحت الزيتونة والحب بنزل عليها نحنا منقلها فلة وحسب معلوماتي انو بسوريا ولبنان بيقولوها فجة.......

[عصام يوسف]

يا محمد خــــيالك لِوجّــك وفّرو *** و لا تصدّق الكذبه بحر..وتسفّرو
لمّا الوحــي بالشــــاعريّه تكفّرو *** غصن الحـــــلا من حبّتك بتنفّرو
تقل البشــاعه عالأرض بيطفّرو *** و الجــــــــــاذبيه بالعـكس بتدفّرو
ومن شان تا يشبع محمّد لقوطه *** بكرا بيجي محــــل السـنين يعفّرو

[mohamad kh]

[poem=font="Traditional Arabic,7,,bold,normal" bkcolor="" bkimage="" border="none,1," type=0 line=0 align=center use=ex num="0,"]
شُو هَالقَوَافِي بْجَرد الله حَافْيِة = حْقُوق الدِّيَانِي وِالشِّعِر مِش وَافْيِة
عْطَيْتَك قَوَافِي بِالمَعَانِي صَافْيِة = جَاوَبتْنِي بْأفْكَار مِثْلَك هَافْيِة
مْوَاسِم سِنِينِي لِلبَيَادِر كَافْيِة = بْتِعْطِي مْلُوك الشِّعر صِحَّة وْعَافْيِة
الشَّحْرُور قَبْلِي عَفَّرُو خَلْفُو الزَجَل.. = عَفِّر يَ فَاتِح خَلف مِنِّي القَافْيِة[/poem]

[عصام يوسف]

الشحــــرور لبّسني بإيدو محابسي *** و بالشعر دشّـــرني رهين محابسي
لكن إنت محل الوجــــــوه العابسي *** ســــنة الكبيسي عا دماغك كابسي
الفكره تياب من التحـــــرر لابسي *** و القافيه روحك بصحــــرا حابسي
و لمّا فتحت باب الحبس تا خلّصك *** لقيتك عطش عايش بشجرا يابسي

[mohamad kh]

[poem=font="Traditional Arabic,7,,bold,normal" bkcolor="" bkimage="" border="none,1," type=0 line=0 align=center use=ex num="0,"]
خَفِّف الصُوت. سْكُوت. لاَ تِحْكِي بْجَفَا = لا يِسْمَع الشَحْرُور. يَا فَاتِح كَفَا
سْنِين المَحِل وِالجُوع وِسْنِين الهَفَا = جَبْرِت عُيُونَك تِحْتِرِم طَعْم الغَفَا
وْيُوسِف الحُسْن بْيُومْهَا بْحِلْمُو إنْعَفَا = لَمَّا بْسَبِع بَقْرَات لِلمَلْك إكْتَفَا
وْهَالشَّجْرِةِ إلْ بِتْكُون مِثْلِي يَابْسِة = بْتِقْدَر تْشَبِّع كِل جُوعَات الدَّفَا[/poem]

*/*/*/*/*/*/*/*/*/*/*/*/*/*/*/*/*/
من بعد اذنك خيي فاتح زي ما بتعرف انا اسا ما فيي رد ليوم الخميس..... يوم الخميس انشالله يرجع وبرد.....

تحياتي...... محمد خطيب

[عصام يوسف]

سنين المصـــــايب و النوايب و الخطب *** بيجوز منها راســــك القاسي انعطب
من تياب يوســـــــف لا بقى تفك القطب *** و بنياب ديب تشوف وجدانو انشطب
عندك في شجره غصونها بتحمل رُطب *** فيها الرســول استبشر و قال الخطب
و عندك شجـــــر زقّوم يا محمّد خطيب *** بجهنّم الحـــــــــــمرا بقصّوها حطب

[mohamad kh]

آسف ع التاخير!!!........................

[poem=font="Arabic Transparent,7,,bold,normal" bkcolor="" bkimage="" border="none,1," type=0 line=0 align=center use=ex num="0,"]
سْنِين المَحِل لِلْغِرّ لَفْتُو الإنْتِبَاه = وْلَو كِنْت مُشْرِف مَا إلَك بِالشِّعْر جَاه
عِنْدَك شَجَر مِنْقَاس بِالصَّحْرَا بْعُلاه = وْعِنْدَك شَجَر مَا ضَلّ شَارِد مَ إْعْتَلاه
بَيْن الإلَه وْبَيْن إسْمِي إشْتِبَاه = رَبَّك أنَا بِالشِّعْر؛ إفْهَم يَا فَتَااااه
حَتَّى جْهَنَّم لِلحَطَب عِنْدَا طَلَب = مِنْ شَان تِشْوِي كِلّ مَن خَالَف إلَه[/poem]

[mohamad kh]

[poem=font="Arabic Transparent,7,,bold,normal" bkcolor="" bkimage="" border="none,1," type=0 line=0 align=center use=ex num="0,"]
سْنِين المَحِل لِلْغِرّ لَفْتُو الإنْتِبَاه = وْلَو كِنْت مُشْرِف مَا إلَك بِالشِّعْر جَاه
عِنْدَك شَجَر مِنْقَاس بِالصَّحْرَا بْعُلاه = وْعِنْدَك شَجَر مَا ضَلّ وَاوِي مَ إْعْتَلاه
بَيْن الإلَه وْبَيْن إسْمِي إشْتِبَاه = رَبَّك أنَا بِالشِّعْر؛ إفْهَم يَا وْلاَاااه
حَتَّى جْهَنَّم لِلحَطَب عِنْدَا طَلَب = مِنْ شَان تِشْوِي كِلّ مَن خَالَف إلَه[/poem]