وينو حسن بنّوت

[عصام يوسف]

وينو حسـن بنّوت يظهر من جديد *** تا رجّعو مقطّـــع متل قالـــب جليد
حتّى إذا وزنتو على بحور الزجل *** يطلع حجر مكسور من بيت القصيد

[عصام يوسف]

وينو حســــــن بنّوت ما بدّو يجي *** بالمنتدى صارت ظروفو محرجي
مبارح عليه سألت قالولي الشباب *** سيّارتو بنص الطــــريق مكربجي

[حسن بنوت]

0,"]
*****
راجع حسن بنوت قاصد حارتو=اهلا وسهلا بطلتو وبزيارتو
عالاتوستراد ما كربجت سيارتو=وبالجو ما تعطّل جنح طيارتو
بسعف النخيل استقبلو رب الزجل=جايي وراكب بوعلي على حمارتو
*****

[عصام يوسف]

يا بــو عــــــلي لمّا حــنينك رجّعك *** حتّى تبارك بالمحــبّه موقعك
جينا و شفنا الناس عم يستقبلوك *** بس ما شــفنا تلاميذك معك !!

[حسن بنوت]

*****
جايي وغيابي كان فوق المستحيل=ووين ما كنت بخلق من الشعار جيل
حظـّي قصير وإنما بالي طويل=وعا هالسؤال الناس ضحكت عالسئيل
ليش حتى تنطر صياح الديوك=عا مرايتك بتشوف نكـّار الجميل
*****

[عصام يوسف]

لْ ناكر جميلك قبل ما يصيحوا الديوك *** صار صخره .. الناس فيها مجّدوك
ما بيرضــــــــــى يســـــلـّمك للأجنبي *** متل اللي نخّوا عا جريك و"بوّسوك"

[حسن بنوت]

*****
بهنـّيك يا عاطي لنفسك هالصفه=لاكن لهلق بعد ما عرفت الوفا
صخرة قداسي تصير هيدا ما كفا=وعليك صعبي أضحك وقلـّـك عفا
وبصير بعتبرك إلي صخرة اساس=ان بطلت تحكي بحق خيـّك بالقفا
*****

[عصام يوسف]

الزهره بْتحكي بْوجّك .. العطر .. الأثير .. *** بْترجع بْتحكي بالقفا حكاية غدير
و شو خصّــــــــني لو إنت شجره يابسه *** لَ مْنِ الغدير بتشرب و لَ مْنِ العبير

[حسن بنوت]

*****
حاجي بقا تلوفك بحكيك لوفكي=خيـّبت ظن الفكـّرك شاعر ذكي
فن الحوار بدو عقول محنكي=بإسلوب يفتح بالمعاني معركي
اتركني الصليب اليابس وما بشتكي=وما بشرب من الزهر والعطر الذكي
إلا من الغفران ما بشرب دموع=روح جيب أصحابك وبلـّش بالبكي
*****