حكاية الصندوق

[عصام يوسف]

سَنْدُوق سِتِّي الْخَشَبْ
الْبَعْدُو بِالِخْزانِه
وْمِن هالطَّرَف مَحْروقْ
وْمِن هالطَّرَف مَحْلُـول
وْبِيْزَقْزِق غْناني
قِضَّيْت عمْري قول
شـو فيه هَالسّنْدوق؟!
* ** ** *
وْهَلَّق أنا وْهُوِّي
تْنَيْاتْنا هَوْنيْك
وْبِتْشِدّني قُوِّه
تاإفْتَحُو
شو؟ بِفْتَحُو وِبْشُوف .. شوفيه .. شومافيه!!
ياربّ شو بْسَوِّي
قَلْبي صِفِي مَحْروق

شو فيه هالسّندوق؟!
* ** ** *
سَنْدوق سِتِّي الخَشَب
رح افتحو بيجوز
معبّى مطفّح بالدّهب
بيجوز فيھ كنوز
ويناالسّواره ل جابها
جدي معو من حلب
وينو الصليب الفيه

نِصّ الدّهب بالسُّوق
ياربّ سامِحْني .. رح إفْتَح السّندوق
* ** ** *
سِكَّرْت باب الدّار
وِبْعَتِمْ بِرْدايـِي
مَدَّيْت إيدي هَيْك .. وِفْتَحْتُو
وْمالْقِيْت إلا .. شَقْفِة مْرايـِي
طِلَّعْتْ فيها وْشِفْتْ
سِتِّي .. وْبِوِجَّا شْقُوق
ضِحْكِتْ وْقـالِتْلي
هَي آخر حْكـايِي


شعر الدكتور إياد قحوش

[pierre]

العندرا و المسيح والله و ملايكتو يحرسوكن انتو ال 2

والله ما بعرف منين بدي بلش ولا بعرف شو بدي قول ..
أصالة فن. روعة التصوير .خيالات .حنين
يا ريت عندي ذرة من هالمقدرة الإبداعية
دمت أيها المبدع حبيب القلب د إياد و أنت يا ملك اللون يا مزوق ..أستاذ عصام
محبة

[عصام يوسف]

يا بيير في قصــــدان تنقايه
بتشـــــوف وجّك للحلا مرايه
بيكون بين حروفها صندوق
كل ما فتحتو بتسـمع حكايه