الى الصديق الشاعر زاهـــر حـــدّو بمناسبـــة أوّل قصيـــدة بتمشـ

[بسطاطي]

قبل الدني
ماتصير لوحه مدهّبي
وتتوشّح بطرحة
ربيع مقصّبي
بالسرجمعو بعضن
حقول الزهور
تايلملمو حالن
عن حفافي النهور
ويباركو للشاعر
" بأول صبي "
كلّو غوى
وطهر وحلا
من الزنبق المقطوف
عن شفّة صــــلا
والقلب يشهقلو هــــلا
ويركض لعندو دبدبي
ويفتح إيدين
الصبح حتّى يغمرو
بلهفي وحنين يزنّرو
وبالعز يربى
متل مابيّو ربي
يكاغي حروف مشقلبي
وبالعطر يرجع يختبي
متل الكتاب بمكتبة
وتضحك حجار المصطبي
متل الدني
مابتفرح بأوّل نبي
ـــــــــــــــــــــــــــــــــــــــــــ حسّـــــان بســـــطاطي ــــــــــــــــــــــــــ

[amigo]

الصديق الشاعر المهندس زاهر حدو ( ابو الياس )
من القلب نتقدم باخلص التهاني والمباركة لك ولزوجتك السيدة رفيف المحترمه
بمناسبة قدوم المولود الجديد ( الياس )
الله يخليلكن ياه ويربى بعزكن
وتكر المسبحة

[انهل دبس]

ألف مبروك ...

يا زاهر ... إنت يابو قلب طاهر
ياللي سيف للأخلاق ... شــاهر
بْقـُدوم ( الياس ) فرحتنا كْبيرة
وبـِمشتاوي رَح نـْدِقْ المَـزاهر
***
انشالله بيكْـبَرْ بْعِـزَّك يا غالـــي
ورعاية إم ... رَح تِسهَر ليالي
تشوفو في مَقام ... كْتير عالي
ومِتِل بَيّو , بـِقول الشعر ماهر

الخال الغالي زاهر ...
ألف مبروك مِنـَّة الله عليك ( الطفل الياس )
يتربّى بوجودك ووجود أمه
وانشالله بتفرح منـّو ومن ولادو ...
بكل الحب
أنهل دبس

[راجح]

كلمة يابيي كتير حلوي كتير

[poem=font="Arial,7,#0000ff,bold,normal" bkcolor="" bkimage="" border="none,1," type=0 line=0 align=center use=ex num="0,"]
مبروك, صار البيت عشّ كبير = نشالله يزيدو فيه العصافير
ويصير جنبو بعد ببيّي = يناموا سوى أخوي ع فرد سرير
وتلعب معو وتقول ياخيي= ياالياس خدني بحضنك مشاوير
ويركد ع خيتو متل غنيّه = ب "يسعد صباحك" أو "أناوهالبير"
**
بكرا بيطلب منك هديّي = وبتلفّ قلبك بالورق ت يصير
يلاقي حنان البي عيديّي = ويعرف بأنو عيونك نواطير
ابنك حياتك,دحكتو لقيّي = صوتو ِشلل , تدليعتو سنانير
بتنام حدو بكل حنيّي = ب يغلّ فيك بتحملو وبتطير
بتفيق بتجبلو النونيّي = بالليل أو وجّ الصبح بكّير
وبكرا وقت بيقول يابيي = مافيك الا تقول ياألله
كلمة يابيي كتير حلوي كتير
_______

راجح[/poem]

مبروك الكم والنا والحمدلله ع سلامة الأم ..بوسه من ايديك ياالياس ..والرب يحميه ويجعلو من أبناء الحياة والنعمة

[pierre]

العدرا تنطرك

يا معلم راجح , و الله العظيم كلماتك بتبكي
دافئة حنونة , لك فيّا أبوبي و أمومي و حنان الرّب كلّوو
يا زلمي كتوب كتير من هالجواهر و السحر التعبيري
و اتركني يرحم بيّك من المتنبي و غيرو
و الله عندك محبة ل 5000 ضيعة كيف فيك تكتب هجاء؟؟
إلك مني فائق الإحترام و المحبة

[راجح]

يا معلم راجح , و الله العظيم كلماتك بتبكي
دافئة حنونة , لك فيّا أبوبي و أمومي و حنان الرّب كلّوو
يا زلمي كتوب كتير من هالجواهر و السحر التعبيري
و اتركني يرحم بيّك من المتنبي و غيرو
و الله عندك محبة ل 5000 ضيعة كيف فيك تكتب هجاء؟؟
إلك مني فائق الإحترام و المحبة

ولو يابيير

هيدا كلو مزح مع جعفر ..وهوي بيلقى .. بتشفش أهضم منو .. سدقني بحبو لجعفر أكتر مابتحبو
بس طيب شومنعمل .. يعني الكسل يؤدي للضمور ..


وبعدين ليك يابيير ..منسن عاجعفر ومنبارز ب عصام ومروان

وشكرا لتعليقك

وأنا عازمك و عازمو لجعفر عالبردوني


راجح

[عصام يوسف]

زاهر يا شـــاعر ما إلك مقياس *** إلا صـَــــلا البخّــــــور بالقدّاس
لمّا خشــــــــــوع الورد تِحْمِلـّن *** بتتغنّج الفوحــــــه على الأنفاس

كل لْ بيدوبوا شـــــعر عا حِلـُّن *** إنـــت بَـيُّن في عــــــيون الناس
بي النهـــوره و زهــرن و فِلـُّن *** بي الحلا و الحـــب و الإحساس

بي الكــــــروم و سَهلـُن و تـَلـُّن *** بي الخــوابي و الخــمر و الكاس
بي القصــــــيده اللي بْتـِغـْزَ لـُّن *** طلـّة أبو الطــيّب عَ بو النـــوّاس

لكن اســـــــمحــلي قلـّك و قلـّن *** لْ بيكون متلك شــاعر و حسّاس
مش هــــــم لو بيّن إنــــت كلّن *** لْ بيهم إنّو إنــت "بـي اليــــاس"



كل ما بيتــــغنّـــــــج علـى إيديك *** بْتـِتـْغنّج الريشـــــــه عا ألوانك
و كل مَ صَبيعو تخـرمش بخدّيك *** بيصــــير يكتب شــعر بستانك
و كل مَ تـّشـْـتـَش عَ صدرك هيك *** بْيــِمشي عَ ضـو القلب وجدانك
و كل ما بتمرق صــورتو بعينيك *** بْصوت النظــر بيخربط لسانك


شو هالصبي المحمول عَ كفوف الحنان *** متل النغـــــــم غافي عَ أوتار الكــــــمان
كل ما الندي بيهزهز ســريرو الصغير *** بيموج ضــــــــو العطــــــر فوق البيلسان
مش عجــــــــــيبه يفوح و يدلدق عبير *** و يصــــــــير غنيّه ببســـــــــتان الزمان
و قلبو ربيع و لابس تياب الأمـــــــــير *** من "زاهر" الشعر و "رفيف" الأقحوان


رفيف الأقحوان : إسم ديوان شعر لَ مارون عبّود

[زاهر حدو]

يـا زهرة العمر..الشعر مندور ***** تا كــل مــــا تبكـي يغنيلك
حســان شعَّل كلمتـو بخور ***** صــــارت قصيدة عـم تصليلك
و أنهــل نبع بالعاطفة بيفور ***** جـــــرار المحبة عـم يمليلك
و راجح مرق ع جنينة المنتور ***** تا قصايـــدو المن ورد يهديلك
وعصام من ليل الحلا المسحور ***** النجمــات فرفــط ع مقابيلك
يــا هالملاك الأرضنا ميزور ***** شفتـك و قلبــي عـم يكاغيلك
مـن فوق نازل ع دراج النور ***** و الشعــر طـــالع تا يلاقيلك

يسلم هالتم يا شباب هادي أحلا هدية , كل ما مرق عليها الزمان بتصير أحلا
عذروني ع التأخير كنت حابب إكتب شي ع مستوى قصايدكون و ع مستوى فرحتي
بهدية السما بس يبدو إنو الفرح الكبير ما بيساعو الحكي
قررت اكتفي بهالرد المتواضع ,
إنشالله الياس الصغير بيكبر ع محبة شعركون و بيصير يكتب و يشكركون بنفسو

شكر خاص للصديق رامي خوري
و بالنهاية الله لا يحرم حدا من هالنعمة

[بسطاطي]

يا زاهر بهـ المولود تتهنّا
وخلّي المدى الزعلان يتهّنا
وخلّي ورود الكون تفرح فيه
طفل المجد بالأصل يتكنّا
كانت محبّي بتشبه المولود
رهبان كلاّ قاعدي محلّا
وصار الولد رب السما يخليه
إن شاء الله بحياتو كتير يتهنّا

الخال أبو اسعد " ابراهيم زيريق "

[زاهر حدو]

يا خال يا مرجــوحة حكايات*****ع بيتــك المليـــان سهّارا
بينعس الليل و بعدها الكاسـات*****صـوب القمر عم تعمل زيارة
حَكيك طفولة و شعر و خيالات*****يا ملبِّس غيــوم السما سوارا
ياما زرعت ع شفافنا الضحكات*****بـوقدة حـطب دفيت هالحارة
بكرا الزمن بيكنِّــس الساحات*****و من بعد كرجة هالعمر بتضل
إنــت و الدلبــة و المغــارة