نبيد

[جورج قزعور]

يا حلوتي ...حاجي تحبّيني
كرمال الله يوم تنسيني
لو تَعرفي هاللون ياللي صار
رمز ل هَدايا العيد والزيني
مسروق من جوّات قلبي جرار
وباقي شويّي ...ب شراييني
مش دَمّ هَودي خَمر حب ونار
وحَبَّات جَمر... بآخر سنيني
حاجي تعملي القلب خمّار
وحاجي بجَمر العشق تكويني

يا رَجوتي كبرنا وهالعمر قَهَّار
شي يوم قَبل المَوت زوريني
وذَكّريني بأول المشوار
ودَخلك ..قَبل ما غيب ضمّيني
واسحَبي شي قَطرتين صغار
من الوريد وبَعدها لغيني
وعالمَحرَمة خَلَي النقط تذكار
وقوليلهن جبنا بعيد الحب
صباغ وحبر تا نلوّن الزّيني


جورج قزعور