إلى شفيق ديب

[الموعي]

[size="5"]هلق لعطري الداخلي الورد اهتدى ياديب وينك بالشعر مافي حدا

خليك عم تغزل حريرك عالهدى ومن ميل تغسل صوت وتنقح صدى

بتلبس مدى بالموهبة بتشلح مدى وكتافك القمة وإجريك الودا

امشي مع الموعي عجلجلة الهدى شو ما حكوا مابيحرجو دم الفدى

والمبتدا بدو خبر تا يكملو جايي تأعطيك الخبر للمبتدا[/size]

[شفيق]

[size="6"]ما زال طيفك من جنب مني عبر....انشالله يا موعي حاسب حساب العبر؟؟
عندك خصم بالسيف بيشوف العبر....وعندك خصم بتنعّمو بوخزةأبر
ويا من قصدت المبتدا وقلبك صبر....وشفت الخبر خيّ الصفة لأسم الكبر
لا تضيع بين تنينهن تا تنجبر....وما زالك بأسم الخبر صوتك نبر
عطيني خبر أنك عم تغني معي...وعن هالخبر للناس لا تنقل خبر[/size]

[الموعي]

[size="5"]شو يا سما أكتر مفيك اطلعي ........................... خايف أنا لو غضبت هلق توقعي

وياريح لما بتفلتي من إصبعي ........................ جيبي خبر رمل الصحارى المدعي

ولما الخبر يا ديب يلبس مطلعي .......................... بنقل خبر عنك على ورقة نعي

بنقل خبر للراهبات بمدمعي ......................... تا يحملو إنجيل قلبي اللي وعي

ومنشان إحراجك معي من موقعي ........................... رح خبرك يا ابن ديب الأصمعي

عندي الخبر صفى حجر بالمنتدى .............................. وجايي بطقم قزاز تا تغني معي[/size]

[شفيق]

[size="6"]ريح وسما ورمل ونعي وباشق وباز....هودي بضاعة تختخت كتر الحياز
مش ناقصك يا شب إلّا زيت كاز.....وتبدل زجلنا بلحن بوب ولحن جاز
صدّق ,,شفيق الدوّخ مقام الحجاز....الشهدو بأسمو من المغارب للحجاز
منّو بحاجة هالقزاز الما انعاز...وما بيفزع من النهر يللي بحر فاز
ولكن لأنو الدرّ طقم قزاز حاز....وفي معرض الصيّاغ رهن الاحتجاز
ما بنصحك باللوح تلطم جبهتك....بيتحطّمو سنينك على لوح القزاز[/size]

[الموعي]

[size="5"]اسمك بمشتاوي حرقتو بزيت كاز ........................................ واسمي الوجوب المنبري واسمي الجواز[/size]

[size="5"]بيغط عا صوتي إذا غنيت باز ............................................ وبيدوب ورد الواقع وعطر المجاز [/size]

[size="5"]سنيني لعرس الآلهة خلقو جهاز .......................................... لو تحطمو بتضيع مكة من الحجاز[/size]

[size="5"]ويا مفترض إنو قزازك امتياز ............................................ عيونك قزاز وللعمى قاطع جواز[/size]

[size="5"]بموعي لا تفتح عينتيك بنبهك .......................................... الخلعة بإيدو بتكسر عيون القزاز[/size]

[شفيق]

[size="6"]رقراق عيني قزاز من مخزونها....اكسر عطش قلبك بكسر عيونها
هيدي عيون الميّ في مضمونها......ملّي عيونك من قزاز عيونها
ويا لابس الخلعة أنا ممنونها....كرمال فارس معتلي ميمونها
وبتقول هالخلعة بحسب قانونها...هيي اللي كسرت مش يدين تصونها
معناتها ما لك فضل لديونها....وبعدك صفر ,وبْقول يا محزونها
اشلحها وتعا اهجم على ساحة شفيق....تنشوف شو بيطلع معك من دونها[/size]

[الموعي]

[size="5"]الخلعة بإيدي ما فهمت معناتها....................................... ياما خيالي داب عا مراياتها

العطر الإلهي مختبي بورداتها........................................وبذاتها بتخلق نبي من ذاتها

وقبل الدوالي ومن قبل حباتها...................................... انعرفت متل خمرة بتجلياتها

وحيثو عيونك مالحة مياتها .......................................... خلي الملح يكسر عطش نظراتها

ومن دون خلعة بعبد خيالاتها ......................................... بيطلع معي إشرحلك حساباتها

تا صير أخضر متلها بلمساتها.....................................شديت روحي بخيط من جدلاتها

وعلقتها نجمة بسما ترياتها ......................................... وجواتها بضوي على براتها
[size="5"][/size]
بلكي بتمرق عا قزازك خلعتي ....................................... وبراتها بتشوف شو جواتها[/size]

[شفيق]

[size="6"]لو كان بعيوني ملح لا تحرفو....بفرع اللغة والأصل تنسف أحرفو
معناتها أنت شهدت عا موقفو....أني بحر والبحر من ملحو اغرفو
ويا أخضر اللون الشعب ما بتبلفو....أنّك خضر والرّب كلّفلك عفو
وبتقول جسم الروح فيك تغلّفو...بمضمون قلبك والبقيّة بينطفو
عا هيك غلطة قباض عمرك واصرفو...ورح جاوبك من منطلق ما بتنسفو:
يا مسخّر الخلعة وأنت منّك كفو....البيشوف برّا ....كنز جوّا بيعرفو!!!!!!
ولك كيف منعدك جدير بخلعتك...والسر من ما بيقشعك عم يكشفو[/size]

[سمير هلال]

[COLOR="Blue"][SIZE="5"]بين الموعي وبين الديب ......... موجه عمتاخد وتجيب

كل واحد منهن صياد .......... غير عالطاير مابيصيب [/SIZE][/COLOR]

[الموعي]

[size="5"]قلبي طريقي للصليب وللهلال ............................................. وملحك بعينك عاليمين وعالشمال

بشوفك بحر مظبوط يابحر الرمال ............................................. حامل على كتافك سراب الانفعال

لكن إذا بتلعب بغميضة خيال ................................................ وبتشوف حالك بحر أمواجو جبال

عم تلبس تياب الزبد في كل حال...........................................وملحك عاضهرك نص قيل ونص قال

مني جدير بخلعتي هلق اعقال ............................................... خلقت بقلبي وردة السحر الحلال

مش هم لو انكشفت سراري ياغزال ..........................................الأسرار بدها معرفة وهيدا محال

و روح وجسد ضدين افهم عالسؤال..................................... ......بيمثلو جوا وبرا بالمجال

كنز الجمال بخلعتي وسر الكمال .........................................وروح وجسد صورة جمال باعتدال

البيشوف برا كنز جوا بيعرفو ..............................................وللمعرفة أول دليل من الجمال[/size]

[امطانيوس الزحلاو]

لكن إذا بتلعب بغميضة خيال ................................................ وبتشوف حالك بحر أمواجو جبال

عم تلبس تياب الزبد في كل حال...........................................وملح ك عاضهرك نص قيل ونص قال

حلووو ها البيت رائع

تقبلوا مروري