مختارات

[فؤاد يوسف]

[size="6"]قالوا إلي المحظوظ كيف بتوصفو ..... رديت مابيتعرض لـعقبة بمسار

ولو عا حقل ألغام حرب منحـدفو ..... بـيخلـد الحقل ومابيحصل إنفجار

**************

قالوا إلي من العمر عاطول المدى ….. شو منيتك رد الخبـر عالمبتـدى

قلتلهن من كل عمـري ، منيتـي ….. عيش الحياة وموت ما إزعل حدى

****************

وقالوا ، البشر قلتلهن بحلف يميـن ….. عاملت أغلبها وإلي السـر انشـرح
ما شفت في أنبل من القلب الحزيـن .... الـمابيمنعوا حزنو عن غناني الفرح

****************

قالوا إلي عالحق شو عندك بيوت .... جاوبت وبقلبي الصبر باني بيوت

للأسف مابيظهر الحق علا الدني ..... وبيسود إلا بعد ما صحابو تموت

**************

وقالوا عن الطماع هتلك بيّنِة ..... قلتلن الطماع خاين مش أمين

بإسمو إذا بتسجلوا نص الدني ..... بِضل يسأل نصها التاني لمين

**************

وقالوا إلي جاوب على الآتي وهـات... شو أصعب مصيبة ياهاوي المعجزات

قلتلهن أصعب مصيبة يموت شـيء ..... بقلوبنا وبعـدو علـى قيـد الحيـاة

***************

قالوا الجوهـر مابيفقـد قيمتـو ..... إلا إذا ماضـل عـالـم تشتهـيـه

وقلت الورد لوما عَـرَض تبسيمتـو ..... ما كانـت بتتعلـق النحـلات فيـه

*************

دخلك ياناوي تغيب ومصمم تروح.....اسمعني قبل ما تروح وتهد الصروح

عاجروح قلبي رش ملح ولا تـرش ..... عالملح يللي بينك وبينـي جـروح

*************

وهلق بعد مـالنـاس فيـك تحكمـو ..... طالب سهم عـينـك بقلبـي تحكمـو

حكِّم سهم عينك بقلبـي وجرحـوا ..... عاشرط كلما جرحت جرح تحكمـو[/size]