شاعر كِبر عَ وقت !!!

[عصام يوسف]

الشاعر..
خلق ما في حدا
قدّو
و لو وقّفو
كل البشر ضدّو
بيفرض بقوّة منطقو
دستور
يمشّي الطبيعه
متل ما بدّو

الشاعر متل بستان
كلّو زهور
تجاوز مفاهيم الزمن
حدّو
لْ بيعمّر التاريخ
بالمنتور
غير اللي بالبارود
بيهدّو

الشاعر نبي
بالدين مش مذكور
كل البشر
عن منهجو ارتدّو
بيطلع دراج .. دراج
من بخّور
يقطّف
عناقيد السما بيدّو

الشاعر
ما بيزلّو شعر مأجور
من هيك
فوق المادّه بعدّو
و لمّا أبو الطيّب
هجا كافور
طرقتو خمس بوسات
عا خدّو