أوف وألف أوف ( حسان بسطاطي & سمير هلال )

[amigo]

[SIZE="6"][COLOR="red"]

أوف وألف أوف
كم يحمل لنا أيّار من خوابي جمال لا متناهي
لقد حمل هذا الشهر بين يديه كنوزاً من التحف الجماليّة التي أطلق عليها الشاعر عصام يوسف
( تحف عَ زغير) .
من المسابقة القصصيّة التي أغنت رفوف الأدب بلمعات فكريّة تستمد منها شمس الأدب نوراً لا يغيب . مروراَ بالحرب الزجليّة التي أشعل نارها الشاعر العملاق موسى زغيب . وما تزال تشع نوراّ مثل ما قال الشاعر الفينيقي : سعيد عقل
" الشعرقبضٌ على الدنيا مشعشعةُ ....
كما وراء قميصٍ شعشعت نُجُمُ "
لقد كانت سكرةُ شعريّةُ من الخمر الذي عتّقته
( قانا الجليل ) . بين الخصمين الشاعرين
" سمير هلال " المعلوليّ الصلب و الشاعر " حسّان بسطاطي " النحّات المشتاوي العظيم
فكما منحوتات المشتى تتربّع في زواياها الجماليّة
كذلك كان الحوار الممتع المسبوك جوهرةً جوهرة .
قصيدة قصيدة ،
لقد قيل فيه الكفايّة من الشاعر العملاق والدكتورة الأكثر من عملاقة ( كلوديا شمعون أبي نادر) التي ندر وجودها .



ولا ننسى أن نشكر هذه المحطّة ( (otv اللبنانيّة بأمتياز .
أمّا ما ورد على ألسنة الشعراء فنتركه للشاعر الذّواق ( زيّاد سطّاح ) حيث يَسطَح الشعر كما يُسطح التين . ثمّ يغليه على نار الشوق ليصبح
( تين بسكّر) ويضيّفنا إيّاه على صفحات المنتدى . له جزيل الشكر .
فمن كان الأقوى ؟؟
الرأي يعود للذوّاقة . أعني لكم
ونعدكم بالّلقاء الأكثر عنفاً وجمالاً بين الشاعرين
( شربل كاملة و حسّان بسطاطي )
والّلقاء الأكثر شعراً وشموخاً في ( 5 حزيران )
في نادي الدورة ـ بيروت ـ والجميع مدعوين


للتصويت للشاعرين :
يرجى ارسال رسالة مكتوب ضمنها Z15 لحسان بسطاطي أو Z14 لسمير هلال

على الارقام
سيرياتل : 1737
MTN : 1648

[/COLOR][/SIZE]

[زياد]

عذرا ً على التأخير لدواعي العمل

[SIZE="5"]

[SIZE="6"][COLOR="red"]

أوف وألف أوف
كم يحمل لنا أيّار من خوابي جمال لا متناهي
للتصويت للشاعرين :
يرجى ارسال رسالة مكتوب ضمنها Z15 لحسان بسطاطي أو Z14 لسمير هلال

على الارقام
سيرياتل : 1737
MTN : 1648

[/COLOR][/SIZE]

[SIZE="5"]


الشاعر حسّان بسطاطي :
آووف ""
يا لبنان سمِّعْني خَضارَك ... تـ َ إسْكُب ليلـَك وْ إشرَب نهارك
وْ لولا ما بِقي مْن الكاس شَفـّه ... بـْخمِّر صُبح قلبي في جرارَك
كْبِرِتْ وِ بْقيت عا دربَك مكفّي ... وْ لـِحَدّ اليوم ماشي عا مَسارَك
وْ قبل ما كِنت كاغي بالمْلـَفّي ... كِنِتْ إقرا الدِّني وْ إسْمَع خـْبارَك
بِعَيني نهر إلهامَك مكفّي ... وْ لِأجلي غَيَّر العاصي مَدارَك
جُفوني مثل ضفّه قـْبال ضفّه ... ضَمِّتْ نهرك و باسِت حجارَك
وِقارَك عند ما استحْلاك عِفّه ...عَزَمْني عالعرس تا صير جارَك
وْ ضوا بْعرسَك شَمِع صابيع كَفّي ... و دفّي خاتم بـْ إصبَع وِقارَك
مِن خـْشاب الأرز نجَّرِت دفّي ... تـ َ إتـْخَلـَّد بتحفه من عْمارَك
وْ كلما بـْ يِحْتِرِق قلبي بدفّي ... وْ كل ما بـْيِبْرُد بْيِشْعَبل بنارَك
إذا الشَّعّار بيصُفّو بـْمَصَفّي ... وْعََلَيّي صار واضِح إختِيارَك
لولا ما بِقي بالكاس شفّه ... غيري ما بـْيِبْقى بـْ إعتِبارَك
إذا زْغارَك على زْنودَك مْغَفّي ... اتـْرِكني ضَلّ إحلَم مع زغارَك
وْ إذا كْبارَك بِغِفّو عْلَيك غَفّه ... اترِكْني ضَلّ إكبَر مع كبارَك
وْ إذا عالـ ْ لانهايه رح تـْكَفّي ... اعمِلـْني مطرق هوْ كَسِّر جدارَك
وْ إذا بِتـْقول: عالقدّه بِكَفّي ... اترِكْني مُوت عـ َ تـْرابَك قصيده
بَلكي بـْ عيش أرزه مِن بـْذارَك
===
وْ أنا مثل الوجود بـ ْ إمتدادي ... وِ منْ روحي الوحي بـْ ياخـُذ مِدادي
اللي قـَبْلي بـْ هالدِّني فِيّي تـكَمَّل ... وْ كلّ اللي إجو بعدي زياده
مَرّه الليل بعيوني تأمـَّل ... و ذاق العَتم شَفّه مِن سَوادي
وْ لمّا كنت نايم ما تحمـَّل ... فَتَح جفني وْ شِرِب قهوةْ رُقادي
مَرّه: الصّبح كرمالي تجمَّل ... وْ تَرَكلي زِر زَنْبَق عالوساده
وْ لما مِن خيالي العطر نمَّل ... انْكَبّ النهر منِ حنجور وادي
إذا شاعِر عـ َ كِتفو الدَّهر حَمَّل ... و بَلـَّش بالتَّبَجُّح و التَّمادي
بدّي رَجّعو الليله مْحَمَّل ... عـ َ آخر سطر بكتاب الإراده
وْ إذا هْلال الـ ْ بِراسو الوَهم دَمَّل ... دَوا الأحلام ما مِنّو إفاده
وْ إذا بـْقلبو حنين الجّرح عَمَّل ... مـ َ بدّو لا طبيب وْ لا عياده
وْ لأنّي عبقري وْ شاعر مكَمَّل ... بهِزّ الشّمس وِ بتْنَفِّخ رَمادي
قَبل الشِّعر ما شوفو تـرَمَّل ... رح خلـّيه يبكي عا شبابو
أكثَر ما بـِكي بـ ْ يـَوم الولاده
===================
الشاعر سمير هلال :
أووف
جينا بزيّ الأرز نِتْزَيّا ... وِ بـْ فَي دفّ الأوف نِتْفَيّا
عـ َ كْمام مرجوعة عطر ولهان ... مِن ياسمينة شام سوريّا
و كلّ ضحكه عْيونها سيمان ... بِنْشوفها بـْثلجا كفارَيّا
و كلّ نجمه بـ ِ سَما لبنان ... بِتْوِجّ شجرة كهربا بالجّو
بِنْشوفها ضَوِّتلنا ثـْرَيـّا
==
يـَ رْغيف خُبْز الثّلج بـِ بْشَرّي ... وجه الإله عـْلَيك مِتْمَرّي
بـْ نبرات صَوتو لـَبـَّسَك أرزات ... جسمَك بلاهُن كان مِتْعَرّي
بارَك وُ طَعمى الخمس مليارات ... وْ بَخَّر ضباب الزّعتر البرّي
الله ..شو طَيْبين هالخبزات ... فَتْحِت شَهيْتي عالنّبي جبران
وْ فَتَّحْت فيك عْيون لـِ مْعَرّي
==
بْشُوف الدِّني مِن زوم تَصويري ... عالشّعر مهما كِبْرِت زْغيري
الشّمس أكبر و القمر أزغر ... و الأرض بين زْغير وِ كْبيره
بـ ِ إيد الله مسبحه مَرْمَرْ ... و الجاذبـيّـه خَـيـطـهـا الـغِـيـره
لازِم نـفَتـِّشْ عا فضا اكبَر ... بيجوز بكرى تِنْقطع عالخيط
و يـِتـْفـَرَّقو كلْ كـَوكَب بـْ ديره
==
الشاعر صَديق الشّمس, نِيّالو ... محبوب ما بيحَبِّب بـ ْ حالو
فـْصول الطّبيعه بـْتعرفو فلاّح ... عا طول فيها شاغله بالو
وِ بْتنْطرو يـْدَخـِّن وَقِت يِرتاح ... وْ سيجارة الفلاّح موّالو
بتْضَمّنو الرّمان و التّفّاح ... وْ هُوّي الوحيد الـ ْ بَين كلّ النّاس
مـ َ بْتِسْتِحي تِتْفَرَّع قـْبالو
==
بـْحِبّ القصيده تـْكـُون شختوره ... عِمْلِت عـ َ نهر الرّوح كزدوره
هالنّهر يلّلي منبعو فوّار ........ وْ مـَ بْتِحرجو بالزَّق ناعوره
وِ تـْكون معموده بـ ِ جرْن النّار ... وْ مثل الدّوا أوقات لـ ِ ضْروره
وْ عند الغَزَل مـ َ تـْضَلّ ليل نـْهار ... تِبكي على أطلال تنّوره
وِ تـْكون وقت المدِح تاج الغار ... مـ َ تـْكون للسلطان مأجوره
بـ ْ تِرْم الهِجا تـْحافِظ على مِعيار ... وْ ما تِخْفُس بـْ ألفاظ محظوره
تـْغَنّي و ترْقـُص و المـُسيقا تـْغار ... مِن راقصة باليه مشهوره
وِ تـْضَلّ مَربى المجد بالأفكار ... وْ كلما اعتَلـِت عا مسرح الـْ بُلْشوي
بـْيـِنـْحـَتْ جَسَدْها الصَّوت و الصّوره
==
يا مِفْتِري عا شاعِرمْلوكي ... محروم وَقْفِة باب لـ ِ مْلوكه
شو جابَر تِمْشي طريق الوَعر ... وتـِشْقى شقاوة عبد مملوكي
كاس المَوَدّه لو شَعَرتو شَعر... بـْتِفضى مَصارِف زَوق وِ بْنوكه
وْ رَح مَيِّزَك بين الشِّعِر و الشَّعْر: ... الشَّعْر الـ ْ على راسَك طَبيعي بَسْ
الشِّعر الـ ْ بِراسَك شِعر بيروكي
======================
الشاعر زغيب :

وْعَدْتوني تـْكونو بـ ْ لبنان ... الليله صْحابي وِ ضْيوفي
ما في أغلى مْن الإنسان ... يللي بـْيوعد وِ بـْ يوفي
=
مِن سوريّا عا لبنان ... الليله شَرَّفتونا ضْيوف
و نحنا عا شاطي الأوزان... لمّا صار الموج يطوف
رْمَينا الجاروفه مِن شان ... ما نِحْكُم إلاّ مَنْشوف
مِن بحر هْلال وْ حسّان ... شو طالـِع بالجاروفه
===============
حسان :
يـ َ هلا الـ ْ بِتْفيض شْعور ... وْ بِتْوَعّي الكلمه بالهمس
بـْ معلولا انـْسَنْت صْخور ... وْر َوحَنت الـ بُكرى بالامس
حتّى تـْطَرْطِشْ حِبر النُّور ... وِ تـْبَقـِّع عـ َ جْبين الشّمس
وِ تـْطَلـِّع ذَوق الجمهور ... مْن الرّدات المألوفه
====
هــلال :
وْعَدناك الليله بـْ لبنان ... نـْخـَلـّي الكلمه: معزوفه
ما في أغلى مْن الإنسان ... يللي بـْيوعد وِ بـْ يوفي
=
شاعر مشتاوي معروف ... أقرَب مِنّي عا قلبي
عَيّدْت الهَجْمه ملهوف ... وْ رَبـَّعـْت جْراص الدِّلـْبه
عندي حْروف وْ عندي سْيوف ... فيها الموجِب و السَّلبي
الشّمس بـْ تِخـْجَل لمّا تـْشُوف ... لمبة كَهْرَبة حْروفي
====
مملكة حْروفـَك كرتون ... مْتَوَّجْها حاكِم أجْبَه
حتّى عرش الكلمه تـْ صُون ... يا رَيتَك شاعِر أنْبَه
خايِف كَهْرَبْتَك مـَ تـْكون ... كهربة الدّوله بـْ تِشْبَه
بـ ْ تِطْفي جِمْعه بـْ مرجعْيون ... ان لـَمْعِت بِشْمال الكوفه
====
كهربتي كهربة البرق ... العتم عـْليها بيدِلـَّك
بِتْكَنْتِك وِ بـْ تِحرُق حَرْق ... وْ وَين مـَ تـْكون بـْتوصَلـَّك
بـِتـْمـَنـّى تِشْعُر بالفَرق ... ان مـ َ بـْتِشْعُر شو بَعْمِلـَّك
ضَوَّيْتِلـَّك كلّ الشّرق ... وِ تـْبَعْزَقْت بـ ْ مَصْروفي
=====
يا تلميذ اليوم وْ أمس ... مصروفَك ما بيأدّيك
لـ ُ بـْ تِعطـَش بِحْواسي الخَمس ... بِعْصُر إحساسي وْ بِسْقيك
بِعْجُون غيمه بصَوت الهَمس ... تا زَيت وْ زَعْتَر طَعميك
وْ بِمْرَغْها عـَ جْبين الشّمس ... تا أعْمِلـَّك لـَـفـْـلــُوفـِـه
=====
اللي بـْ يِحْكي بـ ْ شَمس التكوين ... مـ َ بـ ْ يِحْكي بـْ زيت وْ زَعتَر
يا إستاذي يا مسكين .... .. حِلـْمي مِن عِلـْمَكْ أكبَر
حَمّلـْني قـْلام التلوين ... الـ ْ بِتْفور بـْحِبر الجوهَر
وْ لاهوتيّة أوغسطين ... وْ فِقه الإيمان الصّوفي
=====
&&&
سمير :

مازال بعدو الورد ما فـَتـَّح زِرار ... بِنحِلّ بالسَّحّاب مشكلة الزرار
حسّان سَمِّعْني على طبقة قَرار ... وْ نَغـِّم جَوابَك عا كَمَنجا الإختبار
هالأرض كوكَب بابها وِسْع المَدار ... ليل وُنـَهار مْداومه عا هالمَسار
بِتْريد باب الليل يِتْسَكَّر عليك ... أو يِنْفَتَحْلـَك باب عا ضوّ النّهار
==
حسّان :
الشّاعِر عيونو عالطّبيعه بَكـَّرو ... إلا ّ بِمشوار المجد ما فَكـَّرو
بيوتو لـ شلاّل الزّهر مـ َ اتـْنَكَّرو ... مِن دَفْقِتو عُطـْر الحبيبه تـْذَكّرو
لا تحصر النّبع النقي بِتـْعَكّرو ... وْ لـَ تـْسَكّرو بْجَرّه, بِجرّه سكّرو
فـَتـِّح عيونَك عالحقيقه يا سمير ... وْ لا تِفْتَح الباب الـ ْ مـ َ فيك تـ ْ سَكّرو
==
كلما الشِّتي للأرض قـَبَّضها حساب .. مِن حِرْصها بِتْسَكّر عـْليه الجياب
و الشّمس أحلى مَسْكـَره وقت الغِياب .. بـْيِتْسَكَّرو عـْليها جزادين الضّباب
حسّان يا شقفة جزيره مِن تراب .. ضايِع عمتـ ْ بَقْبِشْ عـ َ حالـَك بالسَّراب
نَبَّزِتْ راسَك إنت بالبحر وْ أنا .. البحر اللي حَوْلـَك سَكَّرِت كلّ البواب
==
اترِكْني جزيره بين لولو وْ بَين عاج .. وْ لـ َ تـْسَكِّر عـْلَيي إذا الإحساس هاج
مِثل الـ ْ كأنّي عَين مرسومه بـ ْ مَزاج .. رموشي صواري الريح وجْفوني مواج
مهما الكحل سَمَّك على جْفوني السّياج .. وْ سَكَّر على رْموشي الغفا وْ ما قال جاج
بـْيِفْتَح طريقو الشّوق عـ َ شْواطي الجّفون .. وِ بْيِعْمُل بْشمس العيون برونزاج
==
لمّا خيال بـْ يِفْتَح بْواب الجفون .. تـ َ تـْمَخمخو بِتْسَكِّر عـْليه الجفون
وْ باب اللي مِنّو فايته ريح الجنون .. سِدّو تَيِهنا البال عـ َ شْواطي السّكون
و النّاي يللي عاملينو تا يكون .. بـْقلبو خمس فتحات عا شكل السّكون
لوما تسَكّرهن بصابيع الجمال .. مـ َ بْتِطْلـَع النغمه من الناي الحنون
==
بِفْتَح عيوني يا صبح تا إقشَعَك .. وْ بفتَح يَدَيّي يا صليب وْ بِتْبَعَك
وْ بِفْتَح كفوفي بالكرَم تا شَبّعك .. وْ بفتَح خَيالَك عندْ ما تْسَكِّر مَعَك
حتّى الجرُح بالنّاي لولا بْيوجَعَك .. بيقول لو بِتْشيل عنّو إصْبَعَك:
لو ما فَتَح لبنان قلبو للضيوف .. لـ َ بْتِقْشَعَك عَين وْ لـ َإذن بـْ تقشَعَك
==
آووف :سمير
لبنان أحلى سجن حرّيه .. أرزو غَلَق عالشّمس شمسيّه
وْ لـِمْ شافني شاعِر كثير مْليح .. سَكَّر زرار العَربَطه فِيّي
وْ أنت الـ ْ فَتَحت دْروب للتسليح .. وِ ذْبَحت أهلو بـ ْ حرب أهليّه
لاكِن أنا تا وَقـِّف التذبيح .. قَطَّبت جرْحو بـْ ضَو عَينيّي
بالمَحْبَسه شربل غِني التّسبيح .. وِ تـْفَرَّد بـ ْ خلوات روحيّه
و عْيون رفقه استَرْخَصو التّفتيح .. عا أرض مفتوحه عالخـْطيّه
لمّا السّفَر زَيَّق بْواب الرّيح .. وْ طَيْلـَع مِن الفانوس جنّيّه
طْبَشْت البواب وْ تحت ضَو ّ شْحيح .. بـْ حَبّ الوطن صلـّيت ورديّه
وْ قلبي الـ ْ عِطي محبوبتي تصريح .. إنها الوحيده العايشه فِيّي
وِحْياة الله رْسَمْت حَولو زِيح .. مـ َ بْيِنْفَتَح مِن بَعدها هِيّي
وْ مهما تـْوَسِّع طاقة التجريح .. بردايتي عالبغض مرخيّي
عـ َ طْرافها صابيعَك مْفاتيح .. فَتْحِت مَجالـَك عالأنانيّه
وْ بالشِّعر يا حسّان للتوضيح .. لو كنت قدّ الإفتتاحيّه
ما كِنت بين الجَّد و التلميح .. تـْرَجَّيتني إفتَحلـَك مْعَنّى
تا بالنّهايه تـْسَكـِّر عـْلَيّي
**************
آووف : حسّان :
واقفه بـْ باب الصّبح فلـّه .. هِيّي وْ عمـ تـْفَتـّح عمـ ِتـْقلـّي
مِنشان إفتَحلـَك بإيدي الباب .. وَقت اللي بَدَّك بَسّ دِقـّلـّي
بَيت الشِّعِر مفتوح للأصحاب .. وْ كلـْما خَيال يـْجُوع للطَلـّه
صَوت الشّتي بْيِنْزَل مِن المزراب .. وْ إذن الأرض إحساس بيمَلـّي
شُوف الصّخر لـ َ جْفون لا أهداب.. عمـ ْ يِعزُم النّحات عـ َ التّلـّه
وْ كِلـْما انْفَتَح إزميل جرحو ذاب .. بِتْفَكّرو ناسِك عميـ ْصَلـّي
شوف الوَتَر مصلوب عالأخشاب ... لـ َ بْيِقْدُر يـْ وَطّي وَلا يـْعَلـّي
وَقْت اللي حَرَّك ريشتو زرياب .. فَتّـَح شَبابيكو على مْطَلـّه
يا شاعِر الـْ بالحِلم ظَنَّك خاب .. مثل الصَدى مْن الصّوت بِتْوَلـّي
مْسَكّر على روحَك بِقِفْل غـْياب .. وْ عتم الحَبس عالوقت بيسَلـّي
بِفْتَح حَديث عـْلَيك بالإعجاب .. بتْتِخْتُم عَلَيّي كُرْه وِ مْذَلـّه
بِفتَح إلَك عَصْر بـْخَيالو انساب .. بِتْسَكّرو بـْتاريخ عُصمَلـّي
بِفْتَح إلـَك بيدَر شَمِسْ ما غاب .. بِتْسَكّرو وِ بْتِسْرُق الغَلـّه
بِفْتَح إلَك عصْر اللغه الجذّاب .. بِتْسَكّر عـْلَيّي بْحَرِف علـّه
عا كل ّ حال بْعَجْقة السّرساب .. لازِم مَسافه بَينّا نـْخَلـّي
كيف بدنا نِلـْتِقي يـ َ غـْراب .. وْ لـ َ خْيالَك عـْلى هالمدى مفتوح
وْ لـ َ مْسَكّر عـْلى هالدّني ظِلـّي
*********************
غزل بسطاطي :

قدّيش مشتَقلِك يـ َ حلوايه .. يلـ ْ مِن سما و زنبق منَقـّايه
كلما مَرَقتي بـْ خاطري المكسور .. بـْ حِسّ مِن قلبي الفَرَح جايي
بـْتِتْشَرْبَك عْيوني بـْعِيون الحُور .. بْسنّارة رْموشي عـ َ تِكـّايه
بْصير سحّبْ خيطها المكرور .. تا حيّك جْبينِك عالمرايي
بِمْرُق عـ َ بيتِك هالـْ حلو المسحور .. عـ َ حْجار مِن صبحِك معرّايه
بُوْقـَف مثل زرّ الحَبَق عالسّور .. بْفَتِّح عَراوي بابِك نْكايه
بِعْزِفْلِك الشِّعر اللي كلـّو شْعور .. تـ َ يْتِخّ عودي وْ يِحْتِرِق نايي
وْ مِن رشْقة البَوسات عالمنجور .. بْترقُص على الشّباك بردايه
بْشوف الصّبح واقِف إلـِك ناطور .. عرقان وِ خْدودو مندّايه
عا قَدّ ما بيشِـــــعّ مِنِّك نور .. حامِل بِإيدو الشّمس مِهْوايه
هَمْسِك بِيِكْتُب عالوَرَق منثور .. وْ عا قَدّ ما بِتْرَفـْعو الغايه
بِتْفكّر بإيدو السّمَع مكسور .. وْ صَوتِك قَلـَم و الإذن برّايه
رَح ضَلّ غَنّيلِك بحر مِن صُوْر .. حتّى الوحي يِسْتَلـْهِمِك آيه
وْ لا تِزْعَلي لـ ُ الموج قـَفـّى سْطور .. مثلي بالكـْتابه البحر شاطِر
أي بَسّ مشْ شاطِر بالقـْرايه
===
غزل هلالي :

قـَعْدِت عمتـْلـَمِّن أضافِرها ..و الشّوق غمرة نُور غامِرها
وَهْج المرايه مِثل روحي كان .. مطروب عا رِقـّة مشاعرها
و الكحل عمـ ْ يِتْوَعَّد الأجفان .. بالمَسْكَره ناطِر أوامِرها
وْ مكياج بالأشكال و الألوان .. معْ أطْيَب الأشواق ناطِرْها
وْ عالجسم عمـ ْ بِتـْلـَبِّق الفستاق .. وْ بالذّكريات يْطِيب خاطِرها
وْ تِرْقُص فَرَح عا أجمَل الألحان .. وِتـْميل وِ تـْلوح بـْضَفايِرها
وْع الصّدر لِبْسٍت عقـْدها المرجان .. وْ لـِبْسِت خواتِمها وْ أساوِرها
مْن الجَيب شالِت علبة الدّخّان .. و فاحِت مِسِك طعمة سَكايِرها
وِتـْشوف لَون الشّال و الجّزدان .. مَع لون ثاني شْوَيّ حَيَّرها
وِتْشيل قنّينة عطر نيســــــان .. وِتـْرِشّ عا بَشْرِة حَرايِرها
حلوه الأناقه زينة الإنسان .. وْ لـ ِ مْلـَبَّسه حلوه بـ سُكـَّرها
الـ ْ مَبْتِسْتَخِفّ بـْنَظْرِة الفنـّان .. بـْ تِسْتَحْضِر الإبداع بالتّجميل
تـ َ تـْضـَلّ حلوه بـْ عَين شاعِرها
******************
موَشَّح زغيبي :
كيف بدّي طَوِّل بالي .. وْ ما كـُون لـْجوج
وْ كيف مـ َ تْمايَلتي قـْبالي .. خَصْرِك بيموج
=
(بيدي) وْ (بِترا) بأحلامِك .. ملـْكات اثنَين
لو خِلـْقو عا أيّامِك .. كانو يا عَين
مَلـْكه تـْمَشّي خِدّامِك .. خلـْفِك صفـّين
وْ ملـْكه ترقـُص قدّامِك .. وِ تـْدُقّ صـْنوج
=============
سمير :
الشّامات عْلـَيكي دَلـّو .. مِن مَيل وْ مَيل
الـْ عـ َ خْدودِك عمـ ْ يِتْحَلـّو .. يا نجم سْهَيل
وْ بـ نـْهار الأبيَضْ كلـّو .. شامات الليل
يا رَيتُن حتّى يْطِلـّو .. بيصيرو زْنوج
==
حسّان :
مَطْرَح ما كِنْتي تـْفيقي .. بْـ تـَخْت اللهفات
بْيوعى الخمر الفينيقي .. بـْ عِبّ الغَفـْوات
ابريقِك غار مْن ابريقي .. وْ طَقـّو الكاسات
وَقـْت اللي عِرْفو بـْ ريقي .. ريقِك ممزوج
==

بالإنزال النًّرمَنْدي .. غَيَّرتي العَصْر
وِتـْسَلـَّمتي مِن غـَنْدي .. مفتاح النّصر
وْ كلما حَرَّكتي جندي .. عـ َ حْدود الخصر
مقياس الرّختر عندي ... مخـّو بيضوج
==
رِحتي عالحَج, النُّور .. مْن النُّور انْسَرّ
وْ مِن دخّان البخّور .. العطْر بْْيِـِنْغـَرّ
بالرَّجعه جِبتي عْطور .. وْ جيتي بالبَرّ
صَفـّى حَجِّك مبرورْ .. وْ بَرِّك محجوج
***************

(( البداية ))
شــــــــــــُـــــــــكـــْــرا ً



[/SIZE]

[/SIZE]

[زياد]

[COLOR="red"][SIZE="5"]
انـْوَعَدْنا بـْ بمعركه بين الممالِك
عـ َ ساحات القلب, وِ الدَّرب سالِك

و حَلـَّقْ نسر سوري بـْ مرج جوري
و ْ حِكي اللي كَنْز بَيت الشِّعر مالِك

شَدى حسّان بالصّوت الجهوْري
وْ سمير هلال بَدَّد ليل حالِك

وْ شَفيق الدّيب وَقـَّع عقد صوري:
سوا رْبينا وْ سوا بـْنِعْبُر مَسالِك

وْ مَعِنْ صَرَّح بِعِزّة شِعر سوري:
المَلِك مـ َ بْيِحْلـَم بـْتاج الاماره
وْ عَلينا يا دِني ضَيِّق مَجالِك
[/SIZE][/COLOR]