انا بكره بلدي لماذا؟؟؟ الرجاء الدخول و التعليق
|
انا بكره بلدي لماذا؟؟؟ الرجاء الدخول و التعليق
|
12-06-06, 10:33 AM
منذ عدة ايام كنت اتحدث مع صديق مغترب لي في هولندا على الانترنت و قد سالته بطريق الصدفة (مو راجع عالبلد)فاجاب لا فقلت له لماذا فكان جوابه الغريب(انا بكره بلدي) ووبس و ليش يا منير بتكره بلدك قام سالني طيب بلدي شو قدمتلي ما عطتني شي غير التعتير و الشقا و قلة المصاري و العيشة المشرشحة و الظلم فليش بدي حب بلدي؟؟؟؟؟ معقول يا شباب انو وصلنا لمرحلة نكره فيها بلدنا ؟ انا شخصيا لا و ميت لا و بتمنى انو تحطو تعليقاتكن بسرعة لانها مفيدة
12-06-06, 11:49 AM
الفكرة يا اخ فادي والتي لم يستطع صديقك ربما ايصالها هي :
انه لا يكره بلده وإنما رأيه من رأي اغلب ابناء هذا البلد والمغتربين انهم يكرهون النظام في هذا البلد الضاغط على انفاس ابناء هذا البلد ومفكريه والسارق لخيراته بدون شبع وبلا مراقب او حسيب
12-06-06, 12:42 PM
اللي عم تقدملنا ياه بلدنا ما قدمتو بلد بالعالم " علم مجاني – صحة و طبابة ..... إلخ "
مع العلم أني حيادية و لا أنتمي إلى أي حزب شوف هولندة شو عم تقدم لرفيقك : بدوا يشتغل ليل و نهار ليأمن مصروفو و ليأمن أجار بيت و ليسدد ديونو اللي عم تتراكم يوم بعد يوم و ليحط ابنو بالمدرسة و اللي كل يوم و التاني بتهددوا المدرسة بالتقليع بسبب التأخير بتسديد الرسوم هاد غير مصاريف الطبابة المرتفعة جدا و نسي رفيقك نظرة الأوروبيين إلو لما بيعرفوا أنو سوري ... يعني " تعب و تعتير و شقا " بعدين سألتو ما الوظيفة اللي حصل عليها بهولندة ؟؟؟ إذا قللك أن هولندة أحسن من سوريا فأنا بأكدلك أنه ما عم يضحك عليك .....لا... عم يضحك عحالو و عم يقنع حالو بحياتو و بوضعو السيء كيف بدو يجي و ما معو مصاري للتفشخر و للطلعات و الفوتات و لاستئجار سيارة آخر موديل ؟؟؟ لو استفاد من اللي قدمتلو ياه هالبلد بمرحلة من حياتو كان عاش عيشة ولا أحلى و معزز مكرم و آخر شي مهم تعرفو أن اوروبا بأحسن الحالات لا تغني بس بتعيش الشخص عقدّو ....
12-06-06, 12:46 PM
أنا مع الأخت جلنار في الرأي
لاحظ أخ فادي أنو في جالية كبيرة من بيت سركيس بأميركا و لاحظ أو في نسبة كبيرة من أهل المشتى مغتربين يعني كل هالمغتربين بيكرهوا المشتى ؟؟؟؟؟؟؟ أكيد لأ بس ليش بدون يرجعوا . بدون يرجعوا عالتعتير متل ما قال صديقك.ما حدا بيكره وطنوا
12-06-06, 01:04 PM
sisi كتب:اللي عم تقدملنا ياه بلدنا ما قدمتو بلد بالعالم " علم مجاني – صحة و طبابة ..... إلخ " من كل عقلك أنو ما في غير بلدك بقدم علم مجاني ؟؟؟؟؟؟؟؟؟؟؟؟؟ اسمحي لي أخت سيسي رح أعطيكي مثال باميركا كل مدارس الحكومة ببلاش بس يا ريت تشوفي هالمدارس, أول شي كل صف مجهز بتلفزيون و كومبيوتر, في صفوف مخصصة للكومبيوتر يعني بالمدرسة في حوالي 150 كومبيوتر. من ناحية الطب يا أما بتروحي على مشافي الحكومة و بتتحكمي ببلاش أو على مشافي خاصة لحالة طارقة و كمان بتتحكمي ببلاش. التعليم بالجامعات: طلعي الأولة عا مدرستك بتتعلمي بأي جامعة بدك و موبس هيك بيعطوكي راتب شهري لحتى تصرفي. ببلاد العالم عاقد ما بتشتغلي عا قد ما بتاخدي, يعني ببلدك الواحد بيشتغل متل الحمار و آخر الشهر ما بيقدر يشتري ربطة خبز. بعرف واحد عاميشتغل عتال باميركا صار عندو بيت ملك وسيارة ملك و عيلة و ولاد و عيش و مبسوط, يعني بسوريا إذا الواحد اشتغل وزير بس شريف ما بيقدر يشتري بيت . بتعرفي أنو الوضع بسوريا كل مانو لورا ؟؟بتعرفي أنو صار في خطين بالبلد فقر و غنى ما بقى في طبقى متوسطة.؟؟؟؟؟ و حياتك الشعب الأوروبي و الأميركي بحنو عليكي أكتر من الشعب السوري و بيحترموا الشخص حتى لو كان من سوريا أوعا تفكري يوم بأنو في شعب بيكره شعب تاني يمكن حكومة بتكره حكومة بس مو شعب لشعب. شوفي لي شو قدمت سوريا من لي عديتون . طبعا نقصت كتيير شغلات.
12-06-06, 01:49 PM
يا جكل أنا قصدت أوروبا موووو أميركا
و قلت أوروبا ما بتغني حبيت علق عجملتك " الشعب الأوروبي و الأمريكي بحنوا عليكي أكتر من الشعب السوري و بيحترموا الشخص حتى لو كان من سوريا " أنا شفت بعيني و ما حدا قللي لا بيحترموه و لا شي ...... أصلا مو لحتى يعرفوا موقع سوريا عالخريطة ...... بتضل تشرحلون ساااعة و إذا ما قلت حد اسرائيل ما بيعرفوا و بيكونوا قبل ما يعرفوا انك سوري محترمينك بس لما بيعرفوا انك سوري بيرتعبوا و بيقولولك " انتو إرهابيين و مجرمين و و و ...... إلخ " و قعود بقا اشرحلون انو نحنا مو هيك و هاد الإعلام شوه صورتنا بعيونكم مع العلم أن الوضع بأوروبا أحسن بكتير من الوضع بأميركا يعني متل ما قلت انت بذاتك السوريين يا للعتالة يا أما للجلي و تنضيف الحمامات و للشغلات يللي الأميركان بيرفضوا يشتغلوها " بدي اسألك انت قلت أن هالعتال عايش عيشة حلوة و مبسوط : في حدا بيكون مبسوط إذا اشتغل عتال للأميركان؟؟؟؟؟ " بس هاد ما بيعني أن هاد وضع كل السوريين هونيك بس هاد وضع 99.9 % مع احترامي لكل المغتربين بأميركا و بدي علق عجملتك " ببلاد العالم قد ما بتشتغلي بتاخدي أما عنا فما بتاخدي عكل الأحوال " الدني عم تتغير و الوضع عم يتحسن و ادرس بتاخد كلشي بدك ياه أما إذا بدك تقعد لا شغلة و لا عملة من وين بدك تاخد و ليش ليعطوك ؟؟؟ قد ما بتقدم قد ما بتاخد أنا ضد شغلة وحدة هون هي البكالوريا و العلامات المرتفعة اللي عم تنطلب علما أنها مو مستحيلة بدليل أن كتاار عم يجيبوها و من قلب هالكتاب عفوا إذا طلعت عن نطاق الموضوع الأصلي بس هاد اللي عم يصير و شكرا فادي لأنك عطيتني المجال لأعطي وجهة نظري مع احترامي لكل الآراء
12-06-06, 03:34 PM
عجبني النقاش
هي أول مرة بناقش بالمنتدى شو الفرق بين أوروبا و أميركا؟؟؟؟؟؟؟؟؟ ما في فرق لأنو أميركا اتشكلت من أوروبا و كل دول العالم يعني أميركا بتحوي كل دول العالم. أول شي معك حق ما بيعرفوا شي أسمو سوريا حتى ما بيعرفوا شي أسمو الشرق الأوسط. شو بتقصدي أنو الوضع الأوروبي أحسن من الأميركي؟؟؟؟؟؟؟ إذا قصدك على الوضع الاقتصادي أو الوضع العام بالنسبة للعالم, طبعا أميركا وضعها أحسن بكتيييييييييير لأنو أقوى اقتصاد بالعالم هوي اقتصاد أميركا و كلشي بقولوه بالإعلام عن انهيار الاقتصاد الاميركي كلو كذب بكذب , أميركا مسيطرة عالعالم كلو و حارقة الاقتصاد الاوروبي اليورو موصل للسما. فتنا بغير موضوع. ليش بتوصلكن صورة غلط عن الشعب الأميكي , الشباب الأميركان بس تخلص المدرسة دغري بيروحو عالشغل, هون بدي أسألك الشباب بسوريا بيرضو عا حالون يشتغلو بالمطاعم؟؟؟؟؟؟؟؟؟؟عالقليلي الشباب باميركا بيعتمدوا عا حالون و بيطلعو مصروفون. لو افترضنا أنو واحد أخد الباكلوريا بعلامات ممتازة و دخل الجامعة بالفرع للي بدو ياه حتى لو كان طب و خلص الجامعة شو بدو يعمل بشهادتو؟؟؟؟؟؟؟؟؟؟؟؟؟؟؟؟؟؟شو بدو يشتغل ؟؟؟؟؟؟؟؟؟؟؟؟؟؟؟؟؟ بأميركا لأني ما بعرف غير عنا كل ما ادرستي أكتر كل ما أخدتي مصاري أكتر , كل ما ازداد علمك كل ما احترموكي أكتر متل عنا نفسي الشي كل ما درس أكتر كل ما فقر أكتر. دخيل الله لشو الواحد بدو يرجع؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ يذلني الغريب أحسن مايذلني ابن البلدي لا تواخذنا خيي فادي بس الموضوع محتاج نقاش مطول.
12-06-06, 06:24 PM
سوريا ( نور أطل من السماء عشية ..... فرئى الجمال هنا فحن فذاب )
اسمحولي شارككم بموضوعكم وبنقاشكم الجميل وبطريقة كتابتكم كمان : تذكرت من كلامكم قصة ديكتاتور رومانيا نيقولاي شاوشيسكو ايام عزو كيف كان يشغل للرومان التلفزيون كل يوم ساعتين المسا ويحط صور وافلام عن حالة المجاعة في افريقيا وهالمساكين الرومان يفكروا حالهم انهم عايشين العز والفخفخة ليش لانهم بيوقفوا بالطابور كل يوم حتى كل مواطن يطلعلوا صمونة خبز ياكلها وهو فرحان وللعلم ما كان فيه عند الرومان ايامها لا دش ولا قنوات اجنبية توصل لهم افكار حقيقية عن حالة اوروبا او امريكا الا ما قل وندر وحتى نكون منصفين نحنا ليش ما منكون احسن من هيك بكتير مو شوي سوريا ارض الخير وبحسبة اقتصادية بسيطة رح نكتشف انو الناتج القومي السوري بالنسبة لعدد المواطنين بيكفيهم وجيد جدا اما الهدر اللي عم يصير هو اللي مدمر الاقتصاد وابواب الهدر لا يعلم عددها الا الله واجهزة امن البلد تعرف هذه الابواب باب باب وتعرف مفاتيحها كمان بس ليش تاركين هالابواب مفتوحة ........... بيقولوا امن دولة وحتى ما ندخل بالسياسة والممنوعات السياسية رح قلكم هالقصة واظنها توفي بالغرض : مهندس موظف معترومنتوف بوظيفة بسوريا عزمه صديقه اللي عم يشتغل بامريكا راح لعندو ف شاف صاحبنا عند صديقه السيارات وفيلاتين تلاتة وكم مليون دولار حاططهم صديقه بالبنك...... فساله : من وين جبت كل هالمصاري؟؟؟...... فقله صديقه : تعال معي ......وفرجاه على جسر من تنفيذه.... وقله : شايف هالجسر اله ست اعمدة ؟؟...... قله صديقنا : لا هذا اله خمسة اعمدة بس...... فقله صديقه : اي هذا لازم يكون اله ست اعمدة والله صديقنا رجع على شغلوا بسوريا وفهم الطبخة تمام وراح يطبقها ولما زاره صديقة اللي بامريكا بعد فترة لقاه استلم ادارة شركة كبيرة قطاع عام عنده السيارات وفيلا وكذا بناية وشاليه وما عنده ولا فرنك بالبنوك السورية كل امواله بالبنوك الاجنبية وبحسابات سرية ....... لييييييييييييييش قال لاسباب اقتصادية .......بحته ......اي ......بحته ....... وصايرة حالته عال العال........ ساله : ولك من وين جبت كل هالمصاري ؟؟؟؟؟؟؟...... قله : تعال معي .........وقله : شايف هالجسر اللي هنيك؟؟؟؟ ...... قله : وين ما شفت شيئ؟؟؟؟؟..... قله : اي هنيك لازم يكون فيه جسر وفهمكم كفاية وتبقى بلدنا النا نحن السوريون ونتمنى على اهلنا في الغربة ان تبقى قلوبهم معلقة بها ولو طالت المسافات لاننا نحبهم فعلا كما نحب بلدنا كما بلدنا تحبنا وتحبهم وتشتاق الى لقياهم في كل يوم كما نشتاق نحن اليهم لو ما القمر عنده وطن عنو البشر ما بيسئلوا
12-06-06, 07:13 PM
و الله يا أخ هادي السوريين كل عمرون و رح يضلوا وين ما راحوا حاملين سوريا بقلبن سوريا الوطن مو سوريا الحكومة
بتعرف أخ هادي أنو سوريا أغنى دولة عربية بالثروات الباطنية بس الشعب مو شايف شي من هالغنى. الحكومات ببلاد برا ما بتسرق المواطن لأنو في مين بيحاسبها في قضاء, الحكومة بسوريا بتاخد ما بتعطي. شو ناقصة لسوريا ما تسبق الإمارات. كتير من الأحيان بيكون العطل من الشعب رح خبركن هالخبرية: في مرة طلبت الحكومة لإحدى المحافظات خبير بلغاري ليساعدون بعمل المشاريع. إجا هالخبير و اجتمع مع المسؤولين بالمحافظة, الخبير ميحكي و واحد ميترجم و المسؤولين ميتسمعوا و بنص الاجتماع بديروا وشون المسؤولين و بيقعدوا يتناقشوا شو بدون يتغدوا بعد الاجتماع, بيقوم هالخبير بسكر الملفات المعو و بيقلو للمترجم هالعالم ما بدون يشتغلوا. السوريين المغتربين بيفتخروا أنن سوريين و بيرفعوا راسن لأنن سوريين.
12-06-06, 07:23 PM
يا شباب انا برحب بنقاشاتكم كلها و انا اصلا طرحت هاد الموضوع للنقاش لانه موضوع بيخص بلدنا و شكرا للاستجابة و خدو راحتكن عالاخر
13-06-06, 10:40 PM
جكل أنا قصدت بالوضع " وضع العرب الموجودين بأميركا " و أنا ما خرجت عن الموضوع .." شو جابك عالوضع الاقتصادي؟؟؟ "
و مو نحنا اللي بتوصلنا صورة غلط عن الشباب الأميركان .... نظرة الأميركان النا غلط من ورا وسائل الإعلام و كلنا منعرف هالشي ليش مستهون اديش عم ننعطى معلومات غلط بغلط من ورا الإعلام المزيف الظاهر إنك فهمت كل الحكي اللي قلتو بالمعنى المعاكس إلو تمامااااا و هاد رأيي أنا مع احترامي لرأيك و أنا مع الجميع بأنو عنا ثروات كتيرة بس فهمكم كفاية أنا سوري آه يا نيالي
13-06-06, 11:11 PM
sisi
سي سي أنا بعتذر إذا فهمتك غلط مو مشكلة اختلاف الآراء هي هي للي بتصنع بلد ديمقراطي حر متطور استمتعت بالمناقشة معك بس أنا زعلان و مقهور عا بلدنا لأنو ما إلنا غيرو و متل ما قلتي أنا سوري آه يا نيالي ألف مرة
14-06-06, 03:31 PM
انا برفع راسي اني سوري
لالي لالي لالي.. يا علمنا لالي بالعالي.. عالي عالي عالي نسرك يا وطنا يا غالي تحت جناحو انا بتفيا… أنا سوري آه يا نيالي. بس الوقع واقع سورية بدى كتير حتى تصير بلاد الل يرحم ترابك يا جوريف صقر قوم فوت نام وصير حلام انو بلدنا صارت بلد هي بلد لأ مش بلد هي ارطة عالم مجموعين... مجموعين... لأ مطروحين... لأ مضروبين... لأ مقسومين..........؟ اي قوم فوت نام وصير حلام.... و انشالله سورية لا ادام على طول
10-02-07, 07:56 PM
لا شو سوريا أحسن من كل العالم و من هولندا كمان . بالعلامة الولديين السوريين اللي خطفن أبوهن الهولندي و تدخلت الحكومة السورية لإسترجاعهم لسوريا و قدمت لهم الحكومة مبلغ مليون يورو سوري للبدء بحياتهم من جديد في سوريا. و بعلامة انو محكمة العدل الدولية عنا و بعلامة أنو بلدنا ملانة زهور و توليب و بعلامة أنو الهولنديين عم يوقفوا طوابير عباب سفارتنا السورية بهولندا و بعلامة أنو بلدنا فيها سيسي
اسرب و انتعس شي شي اذا أحببت أحداً دعه حراً ان عاد فهو لك وان لم يعد تمنى له السعادة
14-02-07, 12:05 AM
أكيد البلد مابينكره و ع قولة الشاعر :
بلادي وان جارت علي عزيزة واهلي وان ضنواعلي كرام بس تصرفات الزعران بالبلد ... مكروهة
05-04-07, 08:24 AM
مرحبا ياشباب أنا شفت النقاش وعجبني وحبيت انوا شارك اذا ما عندكون مانع .....
أخي فادي أنا برأيي الشخصي انوا رفيقك كان قاصد كل كلمة بيقولها ... هلق بدكون تسألوني ليش الي عم تقدملك ياه البلد ما في دولة عم تقدموا متلنا... شو الي عم تقدموا بلدي ... بدكون تقولوا انوا التعلم مجاني هون عنا ولك على راسي ماشي انوا مجاني بس التعليم عنا فاشل فاشل جدا لانوا طريقة التعليم خطأ وغير هيك كمان الأساذة الي عم الي عم يعلموا بيروحوا على المدرسة ما بيشرحوا واذا شرحوا بيشرحوا من غير نفس منشان انوا الطالب اجباري عنوا ياخد دروس خصوصية ... بدكون تقولوا المشافي ولك انوا مشافي هي.... انا بعرف واحد عمل حادث فات على المشفى يعني فيه هالكم كسر وهالكم جرح طلع معوا الايدز .....ليش لانوا حتاج دم وجابوا الدم ماكلفوا خاطرون انوا يفحصوه... شو اسا بدكون تقولوا .... انا منجهتي بقول انوا على القليلة برا اذا طلعت بيعاملوك كبني أدم وخلص هيك بيكفي خليها بالقلب تجرح ولا تطلع لبرا وتفضح... وشكرا
05-04-07, 06:49 PM
شو قدمتلي بلدي ...ولا شي هالمعادلة ناقصة ياشباب وحتى تكون كاملة لازم نسأل شو قدمت لبلدي وشو قدمتلي بلدي
06-05-07, 09:23 PM
وطني حبيبي
إسمحو لي ان اعبر هنا عن رايي بهذا الموضوع الغاية في الحساسية - اعتقد ان لكل منا قصته في الهجرة من الوطن الحبيب - ومهما تعددت الاسباب فالكل يبحث عن العيش الافضل الذي لم يستطع ان يحققه على ارض الوطن -يمكن ان يكون هناك اشخاص وراء او سبب في هجرتنا -لكنه ليس الوطن -فالوطن يتسع للجميع ويحب الجمبع ويزهو ويعمر بمحبة الجميع - وطني حبيبي بالقلب دفيتك برموش العين غطيتك يالروح فديتك دمتم ودام الوطن في قلوبنا ------وعلى المحبة نلتقي اسيان
06-05-07, 10:17 PM
يا سلام يا هيك النقاشات يا بلا
بصراحه انتو ناس جد حضاريين كتيير بالنقاش المنظم بهالطريقه اخواني واخواتي بعد اذن الجميع رح اكتب رايي بالموضوع اولا صديقك يا اخ فادي صديقك قال انو بيكره بلدو لأنو ما قدملو غير الشرشحه والتعتير و الخ طيب ممكن نفهم شو نوع هالتعتير والشرشحه يلي هو عم يحكي عنها سوريا يا اخواني برايي الشخصي مو لأني سوري ابدا هاد المنطق بيقولو من اكتر الدول العربيه والشرق اوسطيه تقدما وحضارة ورقي كيف؟ ببساطه هتلي شي دوله عربيه بتصنع سيارات او عندها جوده الصناعات يلي موجوده بسوريا انا شوف عيني بالبلد يلي انا ساكن فيها حاليا ملابس وفساطين بتنباع بأعلا الأثمان بالرغم من انها صناعه سوريه بس المستورد بيشترط على المصنع انو يكتب عليها صنع في فرنسا وامريكا والخ هي من الناحيه الإقتصاديه يا اخواني هاتولي بلد بالعالم العربي بيدرس مواطنيه دراسه الزميه مجانيه حتى التخرج وبما انكن حابين تعقدو مقارنه بالمكان يلي انا ساكن فيه السنه الدراسيه الواحده بتكلفني ما يقارب 200000 ليرة سوريه وللعلم هي ارخص دور التعليم بالمنطقه كلها وبعدين يا اخ جاكل انت ما بتقدر تعقد مقارنه بين سوريا وامريكا لأسباب كتييييييرة كتير لأنو يا اخي الكريم سوريا ما عندها الإمكانيات الإقتصاديه لأمريكه او اوروبا او اي بلد اوروبي لما يكون لسوريه قدرة تنفق ميه مليار دولار على حرب لبلد متل العراق ساعتها بتقدر تقارن بالنواحي الإقتصاديه وبعدين بحب قول انو سوريا هي الدوله العالميه التي تمتلك اعلى نسبه من الإكتفاء الذاتي لا بالعكس بتصدر بعض المواد اكتر من استهلاكها إلها وعم تقلي كومبيوترات وما كوبيوترات بالمدارس اذا صارت الحضارة بتنقاس بالمدارس يلي فيها كومبيوتر فاغلب الدول فيها تخلف على مقياسك وبالنسبه للشغل بعد التخرج في شي اسمو مواكبه العصر هاد العصر عصر الكومبيوتر والإتصالات يعني لما بدك تدرس تخصص مطلوب متل هندسه الإلكترونيات وما بتقدر تلاقي شغل ساعتها منقدر نقول انو ما في فرص عمل بسوريا وبحب قول للجميع وهي معلومه بيجهلها اغلب العالم انو نسبه البطاله بسوريا هي اقل نسبه بالوطن العربي كلو وهي النسبه بانخفاض مستمر كل عام ونسبه الأميه هي كمان أقل نسبه بالوطن العربي والإحصائيات الأخيرة لمرض الإيدز بتقول انو عدد الإصابات المكتشفه بسوريا هي 224 إصابه منها 32 سوري بس وكل العالم بيشهد انو الدوله الوحيده يلي ما ظهر فيها مرض انفلونزا الطيور هي سوريا وهاد إن دل على شي بيدل على توعيه طبيه كبيرة وعلى النطاق العالمي يكفيني فخرا إني مطمن انو ما رح امشي بيوم من الأيام بالشارع وشوف واحد اسرائيلي عم يمشي جمبي وبقول لكل يلي ساكنين بسوريا ما رح تعرفو قيمتها لتطلعو منها ما في غير المغترب { يلي عندو شويه حس وطني } بيعرف قيمه سوريا لما يشوف الدول الأجنبيه التانيه كيف تعاملها مع الكل وتحديدا السوريين لما الواحد يبعد عن سوريا بيعرف النعيم يلي كان عايش فيه ومو حاسس بتمنى ما حدا يزعل هاد رايي الشخصي بس سؤال يطرح نفسو ليش المواطن السوري داخل سوريا ما بيلتزم بالأنظمه والقوانين ولك ولا حتى بإشارات المرور ونفس هاد المواطن السوري في حال غادر سوريا بيلتزم بكل الأنظمه والقوانين وبدون تأفف ؟ |
|
« الأقدم التالي | الأحدث التالي »
|
