تحف عا صغير

[انهل دبس]

تحفة تقليد ...

مْبارح ... بَعِد ما وَدَّعِـتني الشَّمس
تـْخـَبِّـتْ بـِ سَـفح التـَّـل
بـلـَّشِتْ إكتِبلِك ... رَسايل هَمس
وبْعَـتِتها ... عاجناح عِـطر الفِـل
وبْعَـتِت مَعها مِن حواسي الخـَمس
خيوط النـَّظـَر ... مِـ عْـيون ما بـِتمِـل
تا يحرسوكي ... ويشْـبَعُو مِن لـَمس
وجهـِك ... المِتل البَدر لو بيـهـِل
وبْعَـتِت ... قلبي اللي انحَكَم بالحبس
جُوَّا ضلوعي ... وقال: ما بيضَـل
عِـندي أنا مَيِّت ... اليوم وأمس
رايح لـَ عٍـندِك ...
تا بْهَواكي يغِـل ...

[عصام يوسف]

إلى الغالي فاتح ...
فاتح ..... يا فاتح دَرب هالخِـلاّن ــــــــ كِيوبيد إنت ... وبالعِـشِـق مجنـون
مِشْ بَس فاتح .. هالـْفـَتـَح بلدان ــــــــ فاتح .... اللي بيفتح أفـُقْ عالكَـون

العطشان ما بيوصــــــل على المنهل *** إلا إذا بيسمـــــــــــع شعر أنهل
شعرك سما و نحنا بشر عا الأرض *** صارت الطلعه عا السما أسهل

[عصام يوسف]

يا قدس ...

بفتح خيال الشمس
منّو بفوت
عا سهول عينيكي
بلاقي الشعر
ماشي نهر ياقوت
بيلف من خلف السما
و بيطلّع عليكي
يمكن وهب حالو
لعينيكي
لمسابح الزهر لْ بايديكي
كل الصلا و المجد و اللاهوت
ما بيطلعو نشوة بطل
بدّو .. فداكي يموت ..!!!

[انهل دبس]

تحف تقليد ...

لمّا بْتِشْـعُـر بانعِـدام الوزن
وبَين الفـَرحْ ... والحِزن
وبَين البـِكي ... والضحِك
والنـّور هادي ...
مِتِل ضَو شْمُوع
والروح رَح بـِتـْطير ...
وتـْصير اكبَر مِن حجـِم لـِ ضْلوع ...
واللون ,
(( بامبي )) بالأفق بادي ...
وصَوب الأفق ,
بَدَّك تـْشِـدْ طلوع ...
ولمّا عيونك ,
ما بْتِلمَح غير ...
طـَيف واحِد عالجـِفِن مَطبوع ...
ولمّا وجوه الناس ,
كِلاّ تـْصير ...
وجه واحِد بالقلب مزروع ...
ولمّا حروف الأبجديّة تـْغِـير...
مِن كام حَرف ,
انطـَبَعْ عا شْفافـَك ...
ولمّا بْتِصْفى الدّني فاضِيّة
بـِ غـْياب شَخص ,
ولـَو بـِقلب جْمُوع ...
وتِعطي الشَّخِص هادا , إلوهـِيّة
وشو ما عِـمِل ,
ما عْـلـَيه شي مَمنوع ...
مِنـْقـُول:
عاشِق ...
ألِفْ ... بالمِيِّة
وكِل العَـتـَبْ عَـنـَّك ,
صِفِي مَرْفـُوع !!!

[عصام يوسف]

شو الوقت ..؟؟
لو يرجع ..
نهار .. تنين ..!!
جمعه .. شهر ..
سنتين ..
ما بيعرفوا ..!!
من يوم ما صرتي
بنت صبحين
واحد وعي ..
واحد شرب كاسين
....

كل الدهب
بالسلطني
كل العطر بالسوسني
حلم السما .. عمر الدني
ما بيطلعوا للحب
دقّة قلب
و لا بيطلعوا
للشعر رفّة عين

[شفيق]

مجد الحقيقة انٌهب
ووهم البطل عدّى
والنور صوتو التهب
وهمس العتم ودّى
غمروك يابو لهب
بالورد لمندّى
وبالصدي طمّو الدهب
وقالو الدهب صدّى

[عصام يوسف]

مسكت الأرض
و برمتها عا إصبعي
و رميتها فوق السيوف
فَ قْ عِت ..!!
ضْحكت بْلا وعي ..؟؟
إي ...
من يوم ما احترقوا
الحروف
شو ما بشوف ..
يا شعر
ما بتفرق معي ...

[انهل دبس]

إلى الأخ الغالي فاتح ...
المشاركة الأصلية بواسطة فاتح:
العطشان ما بيوصــــل على المنهل *** إلا إذا بيسمــــــــــع شعر أنهل
شعرك سما و نحنا بشر عا الأرض *** صارت الطلعه عا السما أسهل

شُـكراً يا فاتح ... يا حِلو الأشعار ــــــــ بالشِّـعِر ..... إلنا نبع رَح بتـــــدوم
مختار عا شِعر الزجل ... مختـار ــــــــ يا نسر فوق المملكة ... لازم تحوم
تا تِطرد الغِـربان ... آخرة النهار ــــــــ وحتى ما يزعج جَونا شي طير بوم
ولو عالسّما عْـمِلنالنا ... مِشوار ــــــــ بلاقيك ..... سَـيِّد عَـر ِش المعَـنـّــى
ومن حَولك الشِّـعَّار تِعطيهُن علوم

[انهل دبس]

تحفة تقليد ...

مبارح مرقتي صَوب حارتنا ...
وشبّاكنا مفتوح ...
لا عْـلـَيه سِلـَّمتي يا جارتنا ...
مَـكْسور مٍنـِّك خاطرو ,
ومَجروح ...
وحَبقات هالشّباك دِبلانين ...
ما عاد إيدِك مَرقِت عليهُن ...
أمس اشْـتـَكولي ,
كْتير عِطشانين ...
هَيْ لـَمْسِة كفوفِك بْتِحييهُن ...
والدَّرفِة الكِنتي تدِقـِّيها ...
فـَسَّخ خشَبها بَعِد هالغيبة ...
كِرمال ألله ,
بَس لِقـِّيها ...
بـِتـْفـَرِّع غصون ووَرَق مِـ جديد ...
وبْلـَمِستِك ,
بـِتـْر ِدْ فيها الرُّوح !!!

[عصام يوسف]

ليش الأرض بتدور ؟؟..
هيك .. غرور !!..
تا تشرب من الشمس
شَفّة نور ؟؟..
....
ما بتعرفوا
ليش الأرض بتدور..؟؟

مرّه المسا
في طيف حلوي زارها
و هيّ ..و عم تشلح الصبح ..
زرارها فلتوا بعروة
خاطري المكسور
وقعوا عا خصر
نهارها .. المنتور
برموا متل لون
الخمر بجرارها
برموا متل مغزال
من بخّور
و من يومها .. هيك ..
الأرض بتدور

[Firas H]

مرّه المسا
في طيف حلوي زارها
و هيّ و عم تشلح الصبح ..
زرارها فلتوا بعروة
خاطري المكسور
وقعوا عا خصر
نهارها .. المنتور
برموا متل لون
الخمر بجرارها
برموا متل مغزال
من بخّور
و من يومها .. هيك ..
الأرض بتدور

أحسنت يا كبير
أكتر من رائع يا فاتح

[عصام يوسف]

طلّتك بتوجّع عيوني
متل القيامه ..
جرح بتوجّع صليب
بتمسحي بميرونك
جفوني
بْكون جرح .. بْطيب
أكتر من جنوني

بس المصيبي وقت
بتكوني
عا دفتري
بحسّك متل قوني
مرقت عا صدري
لْهيب
بكرا ان تركتي العتم
بظنوني
وقلتي يا شاعر
صار بدّي غيب
من وين الله بجيب ..!!

[عصام يوسف]

نيرون و المجنون

مرّه التقى
نيرون بالمجنون
....
قلّو (نيرون)أنا و طالع
عن القانون
صدفه ..
سمعت عن مملكي
فيها الرجال مْشكشكي
و فيها بطل
ملهم زكي
جاي عا بالي
إحرقا
و بنار حمرا غرّقا
مهما يكون
..
قلّو (المجنون) إنت مجنون
يا نيرون !!!!
...
إي ..ما فيك تحرق
مملكي
من خوف و حجار
و بكي

[عصام يوسف]

بْكيتي
على خد الجمر
متل لْ كأنّو
هالسما بتدلف
ندي
متل لْ كأنّو هالخمر
عم يدلق
قصايد تلج
نقطه.. على الكركي
غنج
نقطه.. دلع عالموقدي

ما بتعرفي إنّو البكي
بيجرّح العشب الطري...
لا تقعدي ..!!
ما بتعرفي إنّو البكي
متل الصْقيع
لفّي حلاكي بالفرح
بفزع عليكي
تبردي...

[نجيب سجيم]

بكيتي

من يوم ما بكيتي جمر شعلان
والفجر نايم مستحي يوعى

وحتى النهر عاف البكي وزعلان
طقطق عطش والمي مقطوعة

نجيب سجيم

[عصام يوسف]

ليش الصبح
بيفتّح مشاوير ؟؟
شو الصبح وردي ..؟؟
بنت حلوي كتير ..!!

يمكن لأنّو الصبح
آخر كاس
عا تم هالليل
و خلص بكّير
متل القمر بلوّن
الإحساس
بيطلّعو تصوير
رسام
عا ضو الندي
بيصير....
يتفلسف برسم
القصيدي .. كتير

[عصام يوسف]

من وحي هالإيام


ليش صاروا الكل
قد النِص ؟؟..
و ما بقي بالنِص
إلاّ الربع خالي
يمكن لأنّو اللص
متل الموت
كل ما بيقبض صوت
بيرد لِكْمالي

[وجهة نظر]

الله يا فاتح .

الله يافاتح ...........يلي عطيت للكلمي لون .... ورفعت فيها الصوت ت َ هبّطت الجبال ...يا ريتهن يعرفوا قيمة الكلمة ويرتقوا بصوتهن تحتى يبنو مجد وكرامة ...........!!!!!!!!!!!!!!!


قد ما يجرحوا فيك ...........بعد الجرح في قيامة !!!!!




" وجهة نظر "

[هنديوي]

يسلم تمك يافاتح ................................................ ايـــــــــــــــــــــــــــــــــــــلــــــــــــــــــــــــي(ويلي)

[عصام يوسف]

رقصنا سوى
و تخدّر الإحساس
متل الشمع و الطهر
بالقدّاس
برمتي .. شو برمة
شمس عالفيّي
برمة قمر
عا ضو سهريّي
برمة شعب عطشان
عا نهر حرّيّي !!
ايــــــه ... شو بدنا
بهم الناس
بس برمي فيّي ...

و لا تِتعبي خصرك ..
على مهلو
لمّا رنين الكاس
يشهقلو
ميلي متل
ميلة حجر الماس
وتَ يدق كتفي بْكتفك
الحسّاس
متل ما بيدق كاس
بْكاس ..

هبّطي الشال .. الحلو ..
المغزول ..
متل حدعش أيلول