كرامة عين انهل الدبس

[حسن بنوت]

*****

المشتى عن جنوبي ما ممكن ينعزل=بتبقى بقلبي محبتو ليوم الازل
هات حتى نرندح شوية غزل=كرمال عينيها الوحي عليي نزل
الله خلقها والنقص منها اختزل=ونور الشمس من نورها خيطو غزل
وعاود خلق مجنون اسمو بو علي=بيغزل حواليها متل بلبل غزل
*****

إذا بحب حدا من الشعار المشاركة بجولة الغزل يتفضـّل
الدعوه مفتوحه للجميع.

[slayman]

يا ضيعة الإبداع يا مشتى الحلو***الشعار فيكي بالمعاني تغزلوا
تركتي حسن بنوت يبرم مغزلو***من بعد ماهاجر ربوعك ها الحلو
وجايي أنا بها الملتقى تاإسألو***عن سر صرلي شهر يمكن حاملو
امتين بدها ترجع طيور الزجل***وما يضل عنا طيورعنا يرحلوا

[حسن بنوت]

[poem=font="Arabic Transparent,7,#000000,bold,normal" bkcolor="" bkimage="" border="none,1," type=0 line=0 align=center use=ex num="0,"]
*****
الموضوع يا سليمان مش قصة نزوح=الانسان عرضه للمآسي وللجروح
من عهد آدم جدنا وطوفان نوح=الانسان ساعه بيفرح وساعه بينوح
ولغاب عن هالمنتدا عذرو معو=البيهم انت تضل معنا ولا تروح
*****[/poem]

[slayman]

يا بو علي بالحق عيبي تستحي***ولا تروح تفلق ربّنا بقصة جحي
مشرف كنت بالمنتى واسمك صحي***بنوت رب المرجلي بينتف لحي
شو صار قلي ...!!!يا إدارة وضـّحي***ومن قبل مدة المسح ماشي والمحي
خايف انا الي هاجرواينسوا الزجل***وعندك مثل مروان طلمس بالوحي

[حسن بنوت]

*

****
مروان متلي شاعر افكارو ارتقو=والهجر في بحر المصايب غرقو
وحي الشعر لو قال عذرو..بمرقو=من شاعر نبوع الوفا عامفرقو
وبعرف أنا مروان من ماضي الزمان=بيطلع عند الله ووحيو بيسرقو
***** *

[slayman]

حاجي بقا يا بو علي كذب وخداع***البيروح مش معناتها تعدو شجاع
مروان يمكن مذوق وعندو طباع***فيها تحدي الربع باقي تلات رباع
يا بو علي موقع زجلنا الكون ساع***بيرفض وجود الأرنبة حد السباع
ولو كان متلك بالتحدي والزجل***ما كان قبل يحطك محامي دفاع

[مروان]

سليمان ياشاعر بعهدو الأوّلي=لْبنّوت مابتلبق ولا بتلبق إلي
الشاعر حياتو منوّعه ومحَوّلي=مَنّو جهاز بيشتغل عَ مْحوّلي
أحيان بيغيب الوحي من منزلي=وبيعود حسب المستوى والمنزلي
لكن إذا القصّه تحدّي ومقدره=بْخَلّي الوحي يحْضر عَ صوتي هرولي

[slayman]

خايف انا بالهرولي تعلن زواغ***وما يضل فيك ولا عضم بالشعر صاغ
البيشّد عزقة حالّي فوق البراغ***بيشد عزم القافية بيمنع فراغ
عندك بشر بتحلّ....!!!تا تغيّر صباغ***وعندك وحي بيفلّ من خربة دماغ
انشالله الوحي يرجع عا راسك هرولي***وما تضل خربة حالّي بعجقة براغ

[مروان]

كرمال أنهل رح بداري خاطرك=وما قلّك عْلى هالقوافي بخاطرك
حبّيت واسيك وألامك شاطرك=من بوعلي لْ نُصّين بعدو شاطرك
لكن بسوق الشعر شفت مْساطرك=عزقه وبراغي وهيك عقلك قاطرك
بنطر بخربه بعجقة براغ الوحي=ومابْظَلّ تَ يسَمّوك شاعر ناطرك

[slayman]

مروان انتي بتعرف الشاعر عنيد***وما في بقلبو عطف ألا عا القصيد
نطرني متل ما بتنطر السقعة الجليد***يمّا متل ما بينطر القمح الحصيد
انطرني متل ما القلب ناطر بالنهيد***ولنّو شي نقطة دم تمرق بالوريد
ولا تضل كاشش هيك **بيهجّ الوحي***وبحر الشعر بيضل عن شطّك بعيد

[slayman]

اووف اوووف اووف

جايب بلاطة حاميي بتشوي الحديد***وتطنّيب خدّك بالزجل مش رح يفيد
ومن بو علي لو كنت مرّة بتستفيد***كنت هربت من ساحتي هيدا أكيد

[مروان]

لا تلومني نْ كشّيت وشعوري انجَرَحْ=شايف إنت كيف الشعر عم ينطَرَحْ
في ناس عمْلو من الشعر هزل ومرح=زادو التّرَح بنفوسنا وزالو الفرح
ناطر أنا شاعر إذا بفكرو سرح=ماج القلب عشقان والصدر انشرح
إن كنت ياسليمان ماشي بهالطريق=بتشوف قلبي بين إيديك انطرح

[slayman]

حنيّت قلبي عليك ما بق شد فيك***تا تصير ديك...!! الخوف عا زنودي رميك
قرّب عليي وضمنّي ضمّة شريك***بتعصر محبة صادقة من شب شيك
قبلك أجاني ديك بلّش بالدبيك***زكزكت فيه المرجلي تا يضل ديك
ولا تخاف قلبي متل صنّين الزجل***اطلع لعندي ناطرك...!!! بالتلفريك

******************

اوووف اوووف اووف
الموقع طريق معبدّي وشعري بويك***وعندي التواضع بكتبو بقلام بيك
لنّك يهودي ولا شخص من بلشفيك***منشان اقسا عليك بعطف عا الركيك

[مروان]

بِطْلَع على التّلّه الرايه شِكّها=وبطلع على المنبر الكلمه ِصكّها
كلما الأرض صار الجفاف يدكّها=بطلع عَ شي غيمه بإيدي حِكّها
والشمس بعد خيوطها مَ تْلِكّها=بيطلع البدر قلوبنا تَ يْتكّها
وبطلع لعندك عَ الجبل بالتلفريك=بهالشعر بلكي عقدتك بتْفكّها

[slayman]

آب وإبن والرّوح عقدة مألهة *** الأهرام عقدة ولا مهندس حلهّا
نجوم السما يا مفتكر واصلّها *** دخان شعرك بس بيوصلّها
حكّيت غيمي وصرت صوبي تدلّها *** وعرفت يا مروان شو قلتّلها
شتـّي عليي من السما دموع الوحي = العبرات بتصّفي عِبر بمحلهّا

[slayman]

اوف اووووووووووف
صرلي مطلمس شهر ...!!!والله حلّها***تنزل عليي بيوت الله كلّها

[مروان]

يا مْعقّد وصابك من العقده مَرَضْ=عا هيك شِعر معتّر القاضي اعتَرَضْ
حتّى إذا قسم الزجل هون انقََرَض=مابتقدر بهالمستوى ُتوْفي الغََرَض
كل العُقَد جوّاتها مْن المفتَرَض=الله زرع الحْلول وعْليها فََرَض
مابين عقده وحلّ بفصول الّدني=بيظَلْ هوّي الجوهر وهيّي العَرَض

******************
مش إنت أوّل واحد زنودو عََرَض=مطلمس بتبقى دهر عا أحسن فََرَض

[slayman]

لوّفكت بالموضوع ودماغك شرد***وما شفت بالأنجيل من حكيّك ورد
عزمك انحلّ ودمك قبالي برد***لم شفت عقدة حاجبي وزندي الزرد
المحلول بالأوزان من عنّا انطرد***وعقد الزمرّد قيمتو بتقل الزرد
وبيت العقد كلّين اوعى تدقرو***بينزل عاراسك متل حبّات البرد


اوووووف اووووف
سليمان سبع القافية توقّوا ...!!!ان حرد***بيمحي المواقع بالزجل متل الجرد

بيت العقد بيت قديم معقود من دون عواميد متل الأهرام وموضة بلبنان

[مروان]

سليمان سَرّح عقلك من الخرفشات=يلّي بسببها عايش بحالة سُبات
شو بينفع الناس بْقساوة هالحياة=لَو عَقْد لُولُو زَيّن صْدور البنات
بْسَرّح لَ وِلْفي ضْفايرو المجدّلات=تَ يلاعبو النسمه من الأربع جهات
ولَو ما فْكار الأنبيا يتسرّحو=ما بان بالدنيا كتب ومْقدّسات

******************************
يا

سبع سيب القافيه والمفردات=ماشي عَ درب الشعر متل السلحفاة

[slayman]

لوما رباط الّيد يعقد عا الحروق***كان اللهب والنار وصلت للعروق
منّي نصيحة سماع يا وجه الخلوق***واعقد حزامك بالسفر لمّا تسوق
ياما حلول عطيتنا ومشيّت سوق***وضلّت حلولك متل شم ولا تدوق
عقدة حزام مقاوم الحرّر وطن***وحلول اوسلو ضيّعت كل الحقوق

اوووووووووف اوووف

كلما بتسمع ديك صاح و صوت بوق***يمّا خيانة بتجرح ويمّا شروق
بتعرف بو شربل لا جمل عندو ونوق***وشو جابرك تا اليوم تعلق عا الدبوق