نعش الشاعر الكبير زين شعيب

[محمد حسن شريم]

أهديها إلى كُل محبي الزجل وخاصة إلى محبي الشاعر الكبير المرحوم زين شعيب
إلى روح الشاعر :

قلت بــــــــــا زجل فجرك ليش عتّم ............. قلي ما سمعت في خبر عاجل
كسوف الشمس زين شعيب أحكم ............ نعشو كُبُر نور الشمس عازل
نعش تايصنعو الإنســـــــــــــان أقدم ............ بنخوهِ مــــــا حصللا قبل حاصل
خطوهِ فيه وحدهِ مــــــــــــــــــا تقدم ............ عجز عــــن صنعتو راكب وراجل
وبعد مــــــا الضعُف للقوهِ استسلم ............. قوة كوكــــب وضُعف السلاسل
ألله ملك أمــــــــــــــــر النعش سلم ............ نزل جبريــــــــل خلفو ألـف نازل
عملهُم بعد مــــــــــــا جبريل قسم ............. دارو بالطبيعه وعــــــــــــالمنازل
سمعو منبر الأشعــــــــــــــار تمتم .............. أنا خشابي بنعش الزين واصل
عليه الأرز رد وقــــــــــــــــــال يكرم .............. أنا للزين بعطي ومــــــا بفاصل
وعلى الأرزات جـــاوب كُـــل مُلهم .............. أنا للزين مكتبتي مُقــــــــــابل
حتى احتار جبــــــــــــريل المُعظم ............. صُنع نعش العادُنيا الخُلد راحل
هوني مـــــــــن السمــا ألله تكلم ............. ونده جبريل أمر النعش فــاشل
وأمر بالـــروح عـــــــــزرئيل يــرحم ............... جسد إنسان شرّف للبـواسل
حتى عالسما يوصــــــــل مكــرم ............... وحدو بلا نعش رب المـــــراجل

تقديري

[شفيق]

شكرا كتير استاذي والله يرحم بو علي

هلق استاذ بدي اسألك بيقربك الشاعر الكبير علي شريم من حومين الفوقا؟؟؟؟


شفيق

[محمد حسن شريم]

شريم جدي بالزجل شاعر عتيق ............ وعمي علي شاعر أبن شاعر أجل
وكل شاعر متل فضلك يا شفبق ............. بيكون عم وخي إلنـــــــا بالــــزجل

تقديري

[شفيق]

محمود جدك ,,,,منبرو الشعري غلي,,,,,,,,,,,,,,,,,,,,,,,,,,عاطي بفكرو ابتكار الشعر دين

يعني متل أحمد بنفس المنزلي,,,,,,,,,,,,,,,,,,,,,,,,,,,,,,,لكن بقول الشعر فوق المنبرين

وعمك علي بالشعر فكرو منجلي,,,,,,,,,,,,,,,,,,,,,,,,,,,, و ثبت وجودو بمنبر السيد وزين

يعني متل حيدر إمام المرجلي,,,,,,,,,,,,,,,,,,,,,,, اللي كان حد المصطفى بالدين عين

ومن بعد منهن جيت وبشعرك ولي,,,,,,,,,,,,,,,,,,,,,,,,,,,وهلق بقلك قدرك المعروف وين

من بعد محمود وبعد عمك علي,,,,,,,,,,,,,,,,,,,,,,,,,,,,يما الحسن بتكون يا أما الحسين


شفيق

[محمد حسن شريم]

متل الحسن متل الإمام متل الحُسين ........ كلُن أيمّة طُهُر عين قبـــال عين
وهيك نحنا بالزجل عالحـــــــــــــــالتين ........ فينا الوحي للفكر قلو طـــل وين
محمد حسن إسمي كتبتو بــدمعتين ........ دمعه عاغُربهِ وتانيه عــــالوالدين
عمي الزجل غنّى إلــــــــــو عامنبـرين ........ وجدي بحر ما كان بالأشعار عين
وبعدُن أنا مش بس اسمُن حــــــاملـو ........ حامل بفكري شعر موهبة التنين

تقديري

[بسطاطي]

لمّــــا انفطمت عاســــــريرو المرجـــــــــــلي ............ بقفــــــلة ســـــيوف حــــواجبــــو الموت ارتعش

ضــــــل النعش يرجف فــــــزع من بوعــــــلي ........... حــتّــــى النعش من رقّـــــة الّزيـــــــن انتــــعش

[محمد حسن شريم]

[[align=cent]

قالو علينا الموت آيـــــــــــه منزلي ....... وعالمقبره الميت بنعشــــو بينحمل
ضل النعش يُصغر حيا من بو علي ....... حتى النعش شق الأرض حالو دمل

[/align][/B]تقديري

[شفيق]

يا شريم بالعيلي الاسم ذاتو علي ******************** أهلا, وبماضيكم الشعر بينجلي

مرة مع السيد حكي عمك علي******************* بحفلة من الحفلات من ماضي خلي

بحومين ,,عمك بالبلاغة مختلي ******************ومن حيث بالمشتى القصيد بيمتلي

قطع بأشعار الفتوي مرحلي************************* وبين زند يقطع حديد المحدلي

تا قول هالكلمي اللي عمك قالها ********************((شريم سلطان الذكا والمرجلي))

[محمد حسن شريم]

شريم عــاحصان الذكا شد المسير .......... أسرع من البرقه ونسور العم تطير
عمي عــامنبر مُصطفى مالــو نظير .......... ما كان في ردو على خصمـو يحير
واليوم في هــالمُنتدى وبدرو المُنير .......... ما جيت لا سلطان اعمـــل لا أمير
وإنت ال سألـت بجاوبك حيثي قدير ......... ظهري لسائل يوم مــــا تعودت دير
عاقول عمي قُول قولك مش عسير ......... ولو كان هيك بهيّنو عليكُـــــم كتير
تاتقول هالكلمه للي عمي قالهـــا .......... مـا احتجت إلا عقل ولسان وضمير

____________
تقديري

[شفيق]

أسرع من النسر بجوانح شلتها ,,,,,,,,,,,,,,,,,,,,,,,,,,,,,,,,,,,,,,,,, دروب الهريبي عا عيونك ملتها

عيلي عريقة بالشعر حللتها ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ولولا شوي بكلمتك بهدلتها

ونفسي على خوض الحرب خولتها ,,,,,,,,,,,,,,,,,,,,,,,,,,,,,,,,,,,,,,,, وعا ربح عركات الزجل حولتها

والأسئلة يللي بشعري سألتها ,,,,,,,,,,,,,,,,,,,,,,,,,,,,,,,,,,,,, هي أسئلة فحصي بيكفي ملتهى

وجملة علي شريم الكبير حملتها ,,,,,,,,,,,,,,,,,,,,,,,,,,,,,,,,,,,,,,,,, بقلبي ذخيرة وبالشعر فضلتها

وجوا ضميري واعترافي نلتها ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, بتقدير عمك بس فيك بدلتها

ومن حيث عندي عقل ولسان و ضمير ,,,,,,,,,,,,’’,,,,,,,,,,,,,,,,,,,,,,, عنك عكس عمك أنا ما قلتها



طبعا نحنا عم نمزح أنت يا استاذ محمد غالي عليي كتير من ناحية لأنك من حومين ومن ناحية لأنك بتقرب الشاعر الكبير علي شريم

,,أنا هلق رح افتح مشاركة جديدة واذكر فيها الردات من شان نبعد مزح الشعر عن قدسية وفاة بو علي طبعا إذا بتريد تكمل الحوار

شفيق