لو ترجَعي

[جورج قزعور]

لو ترجعي

لَو ترجَعي لْعنّا
وتبقي بموطنّا
بتَمّوز...
بشحَدلِك ..شتي
وبحفُر بحيطان الزَّمَن
شبَّاك
تا تتلَفَّتي
وبسحَب من نجوم السَّما
خيطان
بلفُّن عا خصرِك
وما تقدري تفلَتي
أو....تهربي منّا
لو ترجَعي لعنَّا

وبتسَلَّل بخَيمة عَرَبْ
بسرُق من المهباج
شي رَكوة
ومن فارس العربان
شي غَفوة
ومن الرَّبابة بسرُق
شوَيّة طَرَب
بسُوق الحَلال
وبحبسو ...عنَّا
لو ترجَعي لعنَّا

بهَدّي مواج البَحر
بكوانين
بعَشّش طيور الحُب
بِ تشرين
وبسرُق من الخاين
وَعد
ومن كل غَيمة عابسة
بشيل الرَّعد
يا سنين
شو بَدّك بَعد
تا ترجَعي لعنَّا

عَمتركضي يا سنين
عُمري ضاع
مين خَوَّفك منَّا
....ومين
حَطّ شراع
وعَلّا المَرَاسي
وما عاد يستَنَّا
...لو
ترجَعي لعنَّا

جورج قزعور 17\4\2009