تحف عا صغير

[نجم الليل]

قلّو الحجر
مرّه لَ هالنحّات
ما فيك تنحتني
شي حوريّه
شي بنت
حلوه .. شي
غنيّه ..؟؟
...
بلكي إذا
بحس بوجع
إزميل
و ضو الشمس
فوق الجرح بيسيل
بتصير
بتحس البشر فيّ
الله !! ..
لمّا تحس فيك
الناس
مين منكن داق
هالإحساس ..؟؟
...
محروم ..
من شرده بعينيّ
محروم من لمسه
يإيديّ
و كتار متلي
حجار بالفيّه
شي منهن بينباس
شي منهن بينداس
و كلّو عبوديّه ..
بعبوديّه
...
آه يا نحّات
يا حسّاس
من كتر ما ثورة
شعب فيّ
...
يا ريتني
تمثال حريّه !!!

الله يا فاتح
إنت التحف ... إنت شيطان الشعر
ما أجملك ... إنت الملك إنت البدر إنت الدرر النادرة
وحياتك بتستاهل وسام عبقر من الدرجة الأولى
وإكليل غار لهالشعر وهالتحف اللي بتحتاج متحف وأكتر

يا فاتح قلال اللي بيكتبوا متلك
عم تنحت الكلمات وتعطينا أجمل اللوحات
لاتحرمنا هالتحف صارت متل الزاد إلنا

تحيات نجم الليل

[اخر زمن]

في عقلي شيء تحقيقه ليس بالإمكانٍٍٍٍٍٍ
فأني مللت عمري كرهت زماني
اشتاق إلى وطن بعيد عن الأوهام
في شيء غريب إحساس مريب
في سراب واحلام
اريد النزوح عن مكاني
عن عالم الاحزان
هناك أمل هناك نور
بعيد .....قريب
لا أستطيع تحديده ليس بأمكاني

[نجم الليل]

في عقلي شيء تحقيقه ليس بالإمكانٍٍٍٍٍٍ
فأني مللت عمري كرهت زماني
اشتاق إلى وطن بعيد عن الأوهام
في شيء غريب إحساس مريب
في سراب واحلام
اريد النزوح عن مكاني
عن عالم الاحزان
هناك أمل هناك نور
بعيد .....قريب
لا أستطيع تحديده ليس بأمكاني

يا اخر زمن ياريت تكتب او تكتبي بالقسم الثقافي هوني القسم للزجل وهيدي الخاطرة اللي كتبتيها حلوة بس بالفصحى
فــ ياريت من عمي حسن بنوت يقوم بنقل مشاركتك لمكانها وأهلا وسهلا فيك يا اخر زمن

[عصام يوسف]

معقول في إنسان
مش إنسان !!!
وجّو عتم ..
قلبو ربع خالي ..
صوتو سفر
طرشان
عمرو عما الوان
غبرة دني
ما بتخطر ببالي
...
لو كنت بعرف
هيك في إنسان ؟؟
بحفر تراب الليل
بخيالي
بطم القصيدة
و فاتح و حالي
....
و بحط تقّالي

[عصام يوسف]

سمعتوا ..!!
..
القمر سافر عَ البرازيل
قال ..
بدّو يهجر بلادو
راح و على كتافو
في هم تقيل
من يوم ميلادو

قال .. العتم شحتر
على القنديل ..
اللي كان عَ جبينو
و لون السهر
بطّل عَ خدّو يسيل
محبوس بسنينو

ممنوع يقطف زنبقه
ممنوع خد يشم
ممنوع مطرح ما التقى
هوّي وقصيده معتّقه
باقة ربيع يضم
قالو إلو ..
من اليوم ما مْنقبل بقى
شفّه عَ شفّه
يلتقوا عَ التم
…
و هيكي طفى سراجو
و رد بردايه
دشّر على دراجو
عن غيبتو
حكايه…
….
متلو متل غيرو ..
لا تسالوه ..
...ْ
بقلّكن ..
بالصيف …
مش جاي ..!!!

[زاهر حدو]

أوّل مَ زهّر ع السما خيالك
كان البنفسج
عم يصلي
للحلا
قالو:
خلقتي
الورد صلالك
ما بيعرفو
إنك خلقتي من الصلا

[عصام يوسف]

مرّه شفت عتّال
حامل هموم تقال
وجّو متل حالو
مسنود عَ خيالو
دربو سفر خيّال
....
كفّو...
وجع منحوت
غبرة كلامو سكوت
لا تسألو شو انقال
صوت المدى
من الريح ما بينشال
...
قرّبت تَ إحمل معو ...
و حط عَ كتافي
من كتر ما حسّيت
باللي بيجعو ...
صار توجعو شفافي
…
صار يشرب جرح
عَ الصافي
...
تاري الشعر
ما بينفعو ...
قلّي .. وعيونو بالسما
ما يطلّعوا
...
اللي بيحملوا هموم الدني
لا تقلّهن ...
ما بيسمعوا ..!!!!

[عصام يوسف]

قالوا يا فاتح
إنت مش إنسان
وجودك وقت
لمّا مرق .. ما كان
غيابك خيال
و طلّتك ماشي
صوتك حكي
ما نقال .. من نيسان
همسك متل غبره
عالغباشي
...
رد الحلا و قلّن
كنت عطشان
بمشتى الحلو
صدفه أنا و ماشي
شقّيت باب الصبح
عالوجدان
لقيت الجرح .. " فاتح " ..
على الشاشي..
عطر و قصيده
و الحبق عشقان
دلقة ندي
عا شفاف حوّاشي
...
هَوْ كلّهن " فاتح"
سما و ألوان
بكوخ الفقير
و بيت الفراشي
...
الإنسان !!
شو الإنسان.. ؟؟
...
مرقة حلم عالضو ..
متلاشي
....

[عصام يوسف]

[align=middle]ليش الولاد بيلعبوا ..
ما بيتعبوا ؟؟!!
بْشو بْيحلموا ؟؟
هنّي و على ضهر القبو
بيعمّروا حجار و حكي
واحد بيجرح إصبعو
التاني بكي ..
بيعربشوا بضو القمر
بيزوزقوا سهل و صور
بيخزّقوا تياب السهر
و بيدخلوا عَ المملكي ..
شي بيعملوا
فرسان
شي بيلبسوا
تيجان
شي بيخسروا
شي بيغلبوا
بيصدّقوا..
وج السما
ما أقربو !!!
....
يا ريت لو بس الصغار
بيلعبوا
يا ريت لو بس الصغار
بيكزبوا
...
لو كنت بعرف في بحر
بيردّني للولدني ..
تا إشربو ..!!![/align]

[عصام يوسف]

هودي اللي
مجد الشعر بيفوتن
و الخيخنه
بتعيش من قوتن
بيجمّعوا الكلمات
بمقشّي
و بيبيّعوا
القصدان بالكشّي
يا ريت لو بيبيّعوا
سكوتن
...
مرّه قلت
للجاذبيّه .. نروح
و نزورهن
شي نهار ببيوتن
ردت و قالت
من قلب مجروح
"عهر البشاعه
نام عَ تخوتن
كيف بدّي روح
عَ بيوتن "
...
ايه .. يلعن الساعه
اللي خلقت فيها
و يلعن
أبو التفّاح .. و نيوتن

[عصام يوسف]

ضيّعت وجّي
من سني
و لليوم مدري
شو بني
فتّشت
تحت قصايدي
دوّرت
خلف السوسني
قبّيت طربوش
السما
زحت
الصور الملوّني
ما لقيت وجّي
بهالمدى
و لا لقيت
مين يدلّني
...
يمكن إذا
بيضيّع الشاعر حدا
ما بيلتقى
في هالدني !!!

[عصام يوسف]

بيمر عا جسر الحكي
وج الصلا
حامل على شفافو
يسوع من الحلا
بيشدّني .. بضو القمر
بيلفّني .. بغيم الوتر
بيردّني ..
صبح انجلا
..
آه يا جسر الحكي
شو بحبّها ..!!
و بخاف قول بحبّها
ما أجملا !!
ما أجملا !!!
ما اجملا !!!!
...
بكرا إذا ليل
القصيدة صبّها
و كاس العطر
فيها انتلا !!
قبل الورد ما يغبّها
عنّي ... إسألا..!!؟؟

[slayman]

[size=5]بكرة اذا شباكها بيدلف
قمر
بوعى بغيبوبي
عا صدر محبوبي
بسرق سهر
تا نام
بقطف من الأحلام
وبزيين دروبي
وخصلة شمس
بتلفني
بليلة قدر

وبعمل جسر من ريح
بوراق الشجر
وبزين النسمة
وبقلها
ابتسمي
رايح لعندك
أسرق سنيني
ضجر
وأسأل
عا شبباك
الهوووووى
المكسووووور
من ضربة
حجر[/size]

[عصام يوسف]

قدّيش صرلي
ما كتبت وجّي
عا سطور عينيكي
قدّيش صرلي
ما خلقت حجّي
تا شم خدّيكي
..
يمكن لأنّو الصدق
بينجّي
عم بكزب عليكي
و كل ما عا صدرك
إفتح القجّة
نجوم السما
بيهرهرو .. هيكي
..؟؟!!!
و صدرك طفل
أول ما بيهجّي
بيصير يقرا
بكفّك شفافو
و بيخربط بصابيع
إيديكي ....

[slayman]

من مين بتخافي

قديش صرلو وجك
قبالي
وما كنت شوفو
كتاب
يمكن من السرساب
عا بالي
كسسر
بواب
الخوف
بشفافي
مش شايفي
وخفتي
وكييييف
لو شفتي
جايي
ومعي جفتي
من مين
بتخافي
ما ضل عندي
بواب

[عصام يوسف]

ختير جبيني
من تقل وجّي
العتيق ..
و ما عاد يحملني
السهر
من كتر ما السيف انشهر
جرحي انشهر
..
تا صرت خاف
من الطريق
يسهر متل هالليل
ما يقدر يفيق
و حس الوقت
فيّ ...متل شي كاس
من عمر .. انكسر
..
يا ريت فيّ اشربك
متل الحريق
ما بيشرب خوابي
الشجر
حتّى إذا بعيونك
العتم انطفى ..
شعّل قمر

[عصام يوسف]

من بعد ما راحوا
الضيوف
مرقتي متل ما بيمرقوا
بعرس البدو
شفار السيوف
صرتي تصبّي
جمرة جنونك
و إشرب أنا و وجّي
من عيونك
أحلى السهر آخر مسا
لمّا اللي كلشي غير
خمر ... بينتسا
و بيخلصوا كل الضيوف
بيضل إحساس القصيده
عا الورق
متل الحروف
...
شو السر بالسهره
إذا فيها ضيوف ..
بحسّها متل القناني
عا الرفوف
و شو السر بالسهره
إذا فيها قمر
وجّك بيطوف
بحسّها رهجة سيوف
و شو السر بالشاعر
إذا بيسهر معك ..
بيحس ... ما بيقدر
يشوف

[عصام يوسف]

قالوا إلي
يا فاتح من زمان
كان لون قصايدك احلى
و كنت ترسم
عا الورق تيجان
بتقول أتينا..!!
اللي باليونان
مدري بعلبك ..
لابسي لبنان
....
قلتلّهن ..
لمّا كتبت قصدان
و تغزّلت
بعيونها الكحلا
ما زال شفت
عيونها أحلى
كيف رح إكتب
شعر أحلى ؟؟!!!

[عصام يوسف]

مشتى الحلو
اللي بتفتحي ديكي نهر
بتبوّسي تم الزهر
و بتنحتي الصخر .. الخصر
حتّى إذا الهمس اشتلق
حتّى إذا اللون اندلق
تتغنّج الدلبه
اللي عينيها خضر
تشبك غصن بالقنطره
و تلبس حلق

[عصام يوسف]

بتمرقي بالبال
شِعر انقال
قبل الدني .. و أزود
نهر السما
بينزل متل شلال
بيطوفن المزود

بيولد بعينيها صبي
بتحممو بعرزال
بتلبّسو موّال
بتمشّطو بصابيع غنيّي
بتعلّمو ..
بعرس القصايد .. هالسمر
يطلع عا درجات العمر
و يحوّل الميّي
خمر بجرار
عينيّي
الله .. !!؟؟
في تنين .. الجمال بيأمرو
الله .. خلق كل الدني
و هيّي ..!!!