الحبّة .. و إختا !!

[عصام يوسف]

بِستنجي بْأرض بعيدي *** عا حُـبّك شاخ
كل ما بيــزرع تنهيدي *** بيقطفلك .. آخ

يا ريت بتــــــرجع فينا *** تــكّي و تــكّي
لمّا غصـــــون تركتينا *** عليـــكي نْتكّي
غصن يضحّك ماضينا *** غصـــن يبكّي
داخوا شـــفاف خوابينا *** و تمّك ما داخ

[بشار]

بِستنجي روحو جديدي *** من حُـبّك شاخ
كلما تنهد تنهيدي *** بتغار الأخ

ياما بأحلامو شافك***خدّك محلّو
من خيوط الشمس لحافك***وسريرك جو
الورقة شال علْى كتافك***بيرد الضو
وحتى يدلل أوصافك***عا كتافك باخ

[عصام يوسف]

من يــــــوم لْ ببّو كنتي *** و عمرك يومين
زحــتي لْ ببّو و سْكنتي *** جـــــوّات العين
و بعدك كل ما سوسنتي *** هاك الصــبحين
نْشكلّك زهــــــر و إنتي *** تشكّيــــنا سياخ

[بشار]

بنظراتك سر مخبّي***بلبّو اسرار
بس بصدرك من قبة***قبة بتغار
صوتك موسيقى مْحبة ***وأنفاسك غار
بتمزج وحي المتنبي***مع أرغن باخ

[عصام يوسف]

الورده اللي انهَديت لَيها *** و هفّـت بجنون
لو ضاعـــت في عينيها *** وين بدها تكون
حتّى تستــــــهدي عليها *** ورقـــة كربون
مرّقـــــــــــها عا خدّيها *** طبّــع و انساخ

[بشار]

غمزة عينك فتّاني ***جبتيها منين
وهزة خصرك سكراني ***عا دروب العين
ولك فضّي الحرب العلقاني*** ما بين وبين
ريحة جلدك وقناني *** العطر البخاخ

[عصام يوسف]

لا تقولي صرلو زمان *** تزكّــــــــرتو أمس
بعدو الغايـــــب ولهان *** و عم يهمس همس
و ما زالو جبينـِـك بان *** عْلا مجــدل شمس
ناخ الدهــــر و جولان *** بـــــــلادي ما ناخ

[بشار]

كنت بصومعتي كامن ***صوتي مبحوح
متخبي بمطرح آمن ***من عطر يفوح
يمكن من عقلي ضامن*** قدسية الروح
بس عيوني بتآمن*** بالاستنساخ

[عصام يوسف]

عْزمتو تا صاروا يزيعوا *** بالحــــي خبار
كيف نسيــــــــت بتطليعو *** الطبخه عالنار
تاري ان زاد بْتـــــــوليعو *** و تقّل لِ عيار
بدّو يحـــــــــرق صابيعو *** و قلبو الطبّاخ

[بشار]

الله لما بتكوينك ***عا شمسو جار
بكّل عقد محبينك ***والبدر احتار
بس الشمس المن طينك*** يا نور ونار
تا تشرق متل جبينك ***بدها برداخ

[عابرسبيل]

كانت عالكاس تجرّ ___ شفاف و ينباس

الكاس, و تنهيدة تصرّ ___ الآخ بإحساس

و لما شفـّـتنا تمرّ ___ على شفاف الكاس

منصير منعرف سرّ ___ الطعمة بالآخ