حفر و تنزيل

[علي عامر]

اذا قالو عبيرك عاف روضي

كذبه بالعتم مش عا فرو ضي

وانا آدون رابي عا فروضي

حنيني دموع من جرحي انساب

[عصام يوسف]

فاتح بحر
إحساسو كأن نَو
أوعا تفتكر
أنّك كأنّو
إذا حرمتو
من المشتى كإنّو
حْرَمِت يا كافر
من الصيف آب

[عصام يوسف]

بعد ما إسمَك
بْصدري وَشَمْتو
حْرَمتني فوحة
الزنبق و شَمْتو!!
و علّي تكبّرو
عيونَك و شِمْتو
شْماتة شط
بِزْرار التياب ...

[شفيق]

إذا ابن العوائل بدّا أب شر***عبيّ الخير فقدو بدّي إبشر
ومين القال أنّو بالدّأب شر***الدمع أرخص من دموع الدهب

[عصام يوسف]

الضو بيهرب لْصــــــوبك كَمَنجا
بيجي عا صوت إحساسك كمنجا
يْصيغ رموش عـــــينيكي كمنجا
و بِقوس الضَـــــو يِعزفلك غياب

[بسطاطي]

نبــع وجّــك عيـــوني كــم مليلي ؟؟

وآخـــر كــــاس فـــاضي كمليـــلي

فـــك العتــــم قطبــــة كـم ليـــــلي

وغــــزل صبحـــك بســـنّارة ضباب

[بسطاطي]

ياكحل الرمش
دخلك تَم تَ ميلو
عَ تمّي متل
ميلة تم تميلو
وتم التوب
تَمّي تمتميلو
تاتم التوب
توبة تم تاب

[عصام يوسف]

لمّا الوقت عَ الوقت ..
حالو زَم .. بَرَك
متل النهر بالصيف ..
لمّا زَم ..بِرَك
صار يبرم عَ الثواني
زِمْبَرَك
لاقى العِمر
وقّف عَ كسْرة ميجنا

[عصام يوسف]

هالرسّام ..
نهداتو مَ حلّن
يغيبوا و يتركوا
وجّك مَحلّن
من اللوحه لْ بِعينيكي
محَ اللون
و حبس صوتك
ببرواز العذاب

[شفيق]

غفّي لو قدرتي وفيّقي, ارمي******عيوني في ضياكي وفيّي قرمي
بشقفة ظلّ صخرة وفيّ قرمة****فيّي دوّخك يا شمس اب

[عصام يوسف]

يا قِطّاف العِنب سمّوك عَنّاب
أنا متلك كنت قِطّاف عِنّاب
و كنت عَض الجرح بالناب عالنّاب
متل طبْق الجْفون عْلى الهداب

[عصام يوسف]

إذا وجّهت دَفّي أم شِراعي
ما برضى البحر لمّا إمشي راعي
و لو انّي كون صخره أم شي راعي
عا صوت الريح رقّصت الدياب

[عصام يوسف]

تَ يهرب من سياجو .. الريح قلّو
من الأرض .. لْ فِيا الأزهار قلّوا
قلّو .. شو مخبّي عطر ؟؟ قلّو
تياب الورد ما إلها جياب ..

[شفيق]

سحر هالعين (هل) *بدرو ونجومو*****سحرني بسّ هالبدروا نجو مو؟؟
ليل الشعر هلّ بدرو ونجومو*****عفجرو تشنشلو دوالي ضباب

*البادر والناجم

[عصام يوسف]

القلم لو جَرّني عالسـطر جَرّه
دشّرني بْإســـم مـجرور جَرّه
عَبّى من جْـرار الحـــبر جَرّه
و صار يْصب و يقلّي شْراب

[عصام يوسف]

قبّة ســماكي .. شو !! ثريّا أم سُها
فيها الليالي .. شو بتعشــق أمسها
و لولا شـــرد قنديل وجّك أم سَها
بينوس همس الضو و بيغفى الهنا

[عصام يوسف]

أنا الســــــهل .. و عَالبيادر غِلالي
على نارو الشـــــــفق قهوه غَلالي
و لوْ ونّو تــــكون من زنبق غْلالي
ما برضـى يحبس شروشي التراب

[عصام يوسف]

مَ برضى في حياتي عاصي راعي
لو استشرس بشرّو عا ص ِ راعي
و لوْ إنّي عَ ضـــفّة عاصي راعي
كـــنت قبل الغنم بـِسقي الديـــــــاب

[جهاد علاونة]

يَ مْشاعري الحرّة ببحر موسى ارسبي=
وجيبي الدّرر .. حيث الهوى مو سرّ سبي=
ومو فلسفة .. مو ولدنة .. مو سرسبة=
مالي سواكي وما إلك إلا أنا=

[جهاد علاونة]

ل فكري ربّنا بليلة وهب بيت=
اشتعل شوقي ... بعد حزني وهبّيت=
كتبته .. وكنت في غرفة وهي ببيت=
انوصل قلب بقلب والبيت ذاب=