المباراة الزجلية

[حسن بنوت]

جوق الوطن|حسن بنوت
*****
يا شعر قبال مني اعتذاري
خطيت بحقك وما كنت داري

غشوني بخصمي وصرت ملزم
باري هالفقير الانجباري

ودولي البفن الشعر معدم
مش معروف شاعر أو مكاري

ويمكن شهر صرلو مش محمم
تا طلعت ريحة الشعر البزاري

على كل حال بدي قول تكرم
وقدر ما يكون رح بشلح دراري

واٍذا ما بيفهم عليي لا يفهم
أنا لناس عم بوهب فكاري
*****
أنا الفكر للي وزن الشعر قيــّم
وبنات الموهبي بتعرف سراري

اٍذا الجاهل هجا بحقي وتهجم
بعد مية سنه باخد بتاري
*****
بصحرا ورمل لو جهلك تكلم
العفه والطهاره من خضاري

وكرامة عين هاجر بير زمزم
سقي حجاجنا وقطعو الصحاري
*****
اذا عامل بهالايام ضيغم
يا اًما نمر داشر بالبراري

أنا السيف البقطع الروس مغرم
ما هــمّ بساحتي نمور وضواري
*****
اٍنت من مين أكبر يا مقـزّم
من حوا للي معها عم تجاري ???

عن رجعيتك ارجع واندم
وتعا شارك بهالعصر الحضاري

نحنا جيلنا مثقف معلم
وبنات اليوم مركزهن اٍداري

منهن هندس ومنهن الحكــّم
ومنهن ساهم بحقل التجاري

ووظايف اٍنت فيها ما بتحلم
يا مكسلن يا شب الخنفشاري

وحيالله موظفه الله أعلم
أكتر منك بتجني مصاري
*****
واٍنت يا بو شنب أعكف مبرّم
الك شهرين موعود بحواري

وبهالمشتى غرور الفيك عـرّم
وأنا للي قبلتك بصفي وجواري

وبكلمة موس يا لحم المحـّرم
عم بتهاجم شموخي ووقاري

ووجهك شوف كيف صاير مشرّم
من الموس العلى الناشف حلقلك

بعركات التحدي والتباري
*****

[محمد حسن شريم]

ختام

قبل أن أبدأ أتقدم من أسرة منتدى المشتاوي ألأفاضل لرحابة صدرهم وتعبهم على استمرارية هذا المنتدى الرائع وأخص بالذكر حضرة المشرف العام طوني الأخ العزيز الشهم الخدوم وكذلك الأخ المشتاوي ورلكس وصاحب المنتدى وجميع المشرفين وخاصه منهم مشرف قسم الزجل أخي وصديقي شفيق ديب .شكراً .

محمد حسن شريم


***********************


يا مشتاوي أنـــــا وافـي وعودي ____ حتى مــع ال خـانو في عهودي
لإني ربيت فيـــــــي العـــزم عاقد ____ لإجل الزجـل ضحي في وجودي
وفيك اليـــــــوم بعدو العزم واحد ____ صمود جبـال ألله مـــن صمودي
فيي شـــــــاف مُعجـب شاف ناقد ____ بعين الفهـم وبعيــــن الحسودي
أنا كرمال جيـــــــل الزجـــل عابد ____ دمي بعصـــرو وببـــذل جهودي
مش كرمال شهـــــــره ولا مقاعد ____ عهد قاطع عانفسي وعاجدودي
ومعك يا جسد منو العقـــــــل فاقد ____ يـا غبن ردودك تواجــه ردودي
ردودك بهـــــوره زنــود وسواعد ____ وأنا زنــود الذكا كانــــو زنودي
وذكـــــــرت المال يلّي فيــك واعد ____ لإنك رأسمــالي يـــــــــا حقودي
لإنــــــــك يـــــا مرا معقــد وجاحد ____ من اللذه جمعت ثـــروه وَعودي
وأنــــا مؤمـــن نصيبي مـــا بعاند ____ ألله شكرت بركوعــي وسجودي
ولإجـــــــل ولاد عندي عـم بجاهد ____ بجد وصبـــر وبــدمعــة خدودي
وحيــــــــالله موظفهِ بليل المــواقد ____ جمعت مال أكتــر فـــــي برودي
هيدي بليــــــس متلك عـــم يساعد ____ جحودي بحضن وبتاني ودودي
وزمزم مُعجزي من الصخر صاعد ____ صعودو مُعجزي كمّل صعــودي
مش كرمــــــال هــــــاجر لا تباعد ____ كرامة هالنبـــي ال خلّد وجـودي
وعاذكر الدوش مع جمهـور قاعد ____ والحمـــام يـــــــا أفكـــار جـودي
عيبي أحترم هيبــــــة كـــل شاهد ____ علينا وزيح سمّــك عـــن ورودي
وعاكلمة نمـر صوتك ليش راعد؟ ____ غيري ؟ حسد ؟ يا نفس الزهودي
لسانك لـــــو بقي نمــــري يعـاند ____ بدي اقطعــــــو ببـرقــي ورعودي
أنا مش بس عـــــم جاري بعاهد ____ حوا ويـــــا حبيبـي بقــــول عودي
وأنت معها وجودك غيــــر وارد ____ لإنــــــك أزرق بلـــــون السعـودي
وقزم لــو كنت ضلك أنت مـــارد ____ أنـا بحكّـم شهودك مــــع شهـودي
أنا حبستــــــك بقمقم فيـــه حارد ____ حيـاتــــــــك كلهــــا رهـن بقيودي
أنا عالم أمــــــام الجهــــل صامد ____ جنـود المـوهبي ضلّـــــــو جنودي
وإلي شهرين عم بتقـــــول واعد ____ نفسي فـي حـوارك مـــــع وفودي
أنقطع حيلك معي لا تكون شـارد ____ كذبــــــك مـــــا بيتخطــى سدودي
ولإنـــك عالتّجني اليــــــوم عائد ____ وبمشتاوي نهبت رزقـي وحدودي
عليي مــــــــــا كنت هالقــد حاقد ____ لومـــــــــا تكون يــــا خـاين معيّن

_____________ مُدير بمكتب اللوبي اليهودي ____________


****************

وحتى اللقاء في حوارات مقبله لكم مني تحياتي الأخويي .

محمد حسن شريم

[حسن بنوت]

جوق الوطن|حسن بنوت
*****
أنا لمن كنت من صغر سني
عا منبر زين والزغلول غني

سكرت بخمرة الشعر ومدامو
وبدم المرجله الخالق عجني

غمرني بو علي وقـلــّي بكلامو
يا بن بنوت ما خيبت ظني

وتيبقى المنبر الزجلي بمقامو
بعد ما موت كمـّل اٍنت عني

وبعد ما مات سلمني حسامو
حسام الفيه بضرب ما بتني

وحمل زين الحسن بنوت قامو
أمانه شاعر عليها أئتمني
*****
أنا لما الزجل نشفت قلامو
وكتر الاًعتدا وكتر التجني

من المهجر كتبتلو نظامو
بسن الرمح للشعار سني
*****
يا محمد بهالبحث وختامو
خدلك كلمتين زغار مني

آدم عند ما تفتحو كمامو
بجنه ما قدر منها يجني

الله شال حوا من عضامو
لحتى كملو وكمـّل الجني
*****
وشرع الدين لو تسأل اٍمامو
مسيحي انكنت أو درزي وسني

ما بيتكمل الدين ومرامو
اٍلا بالزواج وبالتهني
*****
وأنا شاعر محي الليل وظلامو
وعلى الفجر انتصر قنديل فني

وعلى زنودي بنات الشعر نامو
وهبّ الجمر بالحضن الحضني

وقصيدي بالغزل علق وسامو
واٍذا بينت للحلوين سني

بيصير على وعد حبي وهيامو
ليلى تكحـّل وسلمى تحني
*****
وأنت بالحب يا عاشق زلامو
وماشي عالدرب مشيت تأني

سعودي وعم يفتش عا غلامو
الجمل عندك حما وبو زيد كني
*****
انتهى الموضوع والشعر وقوامو
تغنى بدون دف ودون رني

يا مشتى بو علي بيضرب سلامو
وكل الشاركو فيهن بهني

تعبو بواجب الكلمه وقامو
من جوق الوطن والشام جوقه

تماني بتعرفوهن مين هني
*****

تحيه للجميع وهلق احلى غزل ...تفضل خيي بشار

[بشار]

الله يزيد فضلك

كيف بدّي غْرامك انسى__وعيف التنهيد
وكل ما قلبك عم يقـسى__حُبـّي بـيـزيـد


عرفتي شعوري وغْرامي___مـجـهول الحد
ليـش حـبـستي أحـلامــي___بسرداب الصد
فـتـّح جـــــــوري آلامـي___عَ كراسي الخد
لـمـا زرعـتـي أيـامــــي___كـذب مـواعـيـد


بهنّي الشعر فيكن يا تاج على جبين الموهبة , ويا حبات بعقد الوفا والحب.
الله يعطيكم العافية والى اللقاء بحوار جديد.
أخوكم بشار ابراهيم

تفضل يا عريسنا الحبيب شادي

[محمد حسن شريم]

******

فـتـّح جـــــــوري آلامـي___عَ كراسي الخد

حلو بشار حلووووووووو

**

[شادي75]

تكرم عيونك بشار الغالي....وعيون الشباب ....



حبستيني بسجن عيونك ------ قضبانو رموش
رموش انغزْلو من جفونك ------ يبنولي عشوش
عشوش تلفلف مسجونك ------ ت الشادي يطوش
يطوش الشادي وع غصونك ----- يشبع تغريد...



والله إلكن وحشة ياجماعة بس أكيد مارحتو من بالي وكل ما رندح شي ردو او أوف اتذكر المشتاوي وزجالة المشتاوي والعركات الحلوة ...وانشالله بتنعاد هالمحاورات وتكون أحلا وأحلا والشعر يعمر ويصير برج ملعب رياح الفكر يلي بتهب من وحي الشعار..


وهلأ انا بعطي الدف للإستاذ جعفر ..
تفضل استاذ جعفر ناطرين ردتك..

[جعفر حيدر]

كيف بدّي غْرامك انسى _____ وعيف التنـهـيـــــــد
وكل ما قلبك عم يقـسـى _____ حُبـّي بـيـزيــــــــــد

***

كتعا وفصعا من الباري ------ ولونا مخطوف
سـنانا وشــعراتا عياري ------ وما فيها تشوف

قلتلا ... يالله اختـــاري ------ واحد تا نشوف
حســــــونه البدها تاري ------ وغيرو ما تريد

***

لا بدّ أن تجمعنا قريباً نحن وهذا الجمهور الجميل لقاءات جديدة أخرى
إنني سعيد جداً بتعرفي على هذه المجموعة الكبيرة من الأقلام الواعدة
وأعتذر إذا كان قد بدر مني ما يسئ
فأنا لم أقصد إلا المحبة

دورك حسونة / أيها الصديق أبو علي حسن بنوت مع حفظ الألقاب

جعفر حيدر/ جوقة الوطن براغ

[Firas H]

حبستيني بسجن عيونك ------ قضبانو رموش
رموش انغزْلو من جفونك ------ يبنولي عشوش
عشوش تلفلف مسجونك ------ ت الشادي يطوش
يطوش الشادي وع غصونك ----- يشبع تغريد...


يحرق ديبك يا شادي

[the jackal]

أقوى مخمس يا شادي
لم نرتو نريد المزيد........المزيد
أحلى شعر و لا تقطعنا
the jackal

[حسن بنوت]

بتعرفني خيي جعفر ما بحب عوّف.....هههههه

*****

غار الغار حواليكي______وسيّج طربون
تا الزنبق غار عليكي______وزهر الليمون

وكيف بدو يوصل ليكي______جناح الحسون
ولحظك سيف وعينيكي______جوز بواريد


بتشكر حبيبنا وشاعرنا شفيق ديب يللي فتح مجال لاًول مباراة زجليه بتاريخ الزجل على الاٍنترنت.

وهلق حبيب القلب أبو آدم اسحرنا بغزلك...

[محمد حسن شريم]

هلا بالحبايب

*********

كيف بدّي غْرامك انسى__وعيف التنهيد
وكل ما قلبك عم يقـسى__حُبـّي بـيـزيـد

***

يلّي مـــن تما عصرت ____ شهـد ومصبوغ
عينا لــــو فيي بصرت ____ إعجاز بصـوغ
وكلما بلوزتها حصرت ____ عينـي بتــزوغ
وكلمـا التنوره قصرت ____ بشعُــــــل تنهيد

**

وأنا بدوري أدعو خليل روكز سوريا الحبيبه ,الشاعر والأخ الصديق " شفيق ديب " أن يغازل ويبدع كما عودنا .

[بشار]

خليل روكز سوريا هو أنا :mad: يا أخ سلطان :p عفوا قصدي بو حميد

[شفيق]

يا بنت المشتى ظنونك...........زادتني جنون

عيونك اية وجفونك .............قران فنون

تا ما ابقى من دونك..........نصراني بكون

عا شرط يكونو عيونك.........جرن التعميد



الله يا شباب

شو أنتو غاليين عليي كلكن ....من أخواني الشعراء الكبار... محمد حسن شريم ...وحسن بنوت ...وبشار ابراهيم ..وشادي موسى ..والاستاذ جعفر حيدر والاستاذة ثناء حيدر ..وعمر تنن ...((العدو الودود))


ويا ابو ادم الغالي ...

حملتني حمل أكتر من طاقتي وموهبتي وأوسع من مدى نظري ...بهالنداء ...


أخوكم شفيق ....

بدعو ...هلق الاستاذة ثناء حيدر.....

[ثناء حيدر]

يا هلا أستاذ شفيق

كيف بدّي غْرامَـك إنسى __ وعيف التنهيد
وكل ما قلبَـك عم يقـسى __ حُبـّي بـيـزيـد

***

أسـمر ناطر عَ التلّة ----- يكتب أشـعار
أشـــعار القلب تملّي ----- ورد وأزهار
أزهار تعبّي الســـلّة ----- ومواسم غار
غار العمر من القلّة ----- وشو بعد يفيد

***

الشكر الجزيل لكلّ القائمين على هذا الموقع الراقي
لإتاحتهم الفرصة لنا من أجل إقامة هذه المباراة الزجلية
التي نتمنى أن نكون قد أمتعنا بها جمهورنا الكريم
بالكلمة الجميلة والشعر المتميز .
وإلى لقاء قريب يضم هذه المجموعة الجميلة من الشعراء الكبار

وباعتباري الشاعرة الوحيدة بين هؤلاء الشعراء الكبار لا بدّ أن يكون شكري مضاعفاً لكم ولهم.

والآن أدعو الصديق الشاعر عمر ليتحفنا بمسك الختام كما عودنا

بكلّ الوجد

ثناء حيدر / جوق الوطن / براغ - تشيكيا

[عمر]

شكراً يا أميرة الحرف

شـفـافـك قِصـتهـن قِصّة ـــــــ قَصَا الخلاق

وقـَصّـة شعراتك قَـَصة ـــــــ قـَصا الحلاق

وغـصـّـة فرقتنا غِصا ــــــ قلبي المشتاق

حنّي عليي بشي بصّة ـــــــ وحاجة تعـقـيد

الله يعطيكن العافية يا حبيايب قلبي


استازي الكبير وتاج راسي أبو آدم شكر كبير على مجهودك الرائع إنت كنت أشجع من فارس وأقوى من نمر الله يخليلي ياك يا رب

أبو علي بهنّيك من كل قلبي على روحك المرحة وعلى مراجلك البتجنن وصلابة ردودك وبحب قلك إنو زين شعيب ما مات

المتألق بشار أسعدتنا بصورك الشعرية المميزة يا زينة الموهوبين وتاج على راسهن شكراً كتير

آل حيدر الكرام : الله يعطيكن ألف عافية والله يخلينا ياكن وما نحترم أشعاركن الحلوة

عريسنا شادي بتمّنا إلك أحلا أيام إنت وزوجتك .. كنت رائع جداً

شفيق ( الصديق اللدود ) مشكور على جهدك الرائع بإحتضان هالمبارة ونشالله منشوفك على أرفع منابر الشعر



إلى اللقاء يا أعز الناس

عمر

[Firas H]

الله يعطيكن العافية

من القلب بهديكن أجمل تحية وشكرا إلكن كتير على المباراةالزجلية الرائعة

طبعا المباراة لسا فيها مسك الختام شروقية الفارس النمر محمد حسن شريم

وأنا على أحر من الجمر في انتظار الفارس

بس ملاحظة صغيرة يا عمر

مو يحرق ديبك يحرق دياب الكون كلو لأجلك

تحياتي

[شفيق]

عال كتير .......................................!!!!!!!

[شادي75]

لمين هي العال؟

[محمد حسن شريم]

ختام

محمد حسن شريم

تحياتي إلى جميع زملائي الشعّار المشاركين في المباراة والذين لم يشاركو وإلى منتدى المشتاوي بإعضائه وزواره والقائمين عليه من صاحبه إلى المشرفين جميعاً فرداً فرداً .

**************************


غنو تماني زجـــــــــــل شعّار موهوبين ___ وكانـــــو قوافي شعر أشعار رشاشي
جينا عاشاشة زجل أحبــــــــــاب ملتمين ___ عدنا حبايب عمر مش بس عالشاشي
بنّوت خصمي بقـــــــــي بالشعر ما بيلين ___ بيضل شعـرو الحقد والكره متحاشي
قـــــــــــــائد خيولو ترك باليد ملجومين ___ عـــادرب زيـن المنابر بالشعر ماشي
عرفتــــو شهور السنه مــرت كأنا سنين ___ حبــــــو المـذلهِ بغير الشعر متحاشي
بيضل خيي عقل ظرفي أنـــــــــا بيعين ___ صبـرو عليـــــي بعت تايكون تشتاشي
وإستاذ جعفر بقــــــــي للكل جيم وسين ___ شريان شعرو وصل عاسرير إنعاشي
وبشار شاعر شمخ من فــوق هالتكوين ___ إحساس شعــــرو كمشني متل كمّاشي
وشادي عليي غلّي يــــا شاعر التلحين ___ وعّى حنيني أنـــــا ونايم على فراشي
وأشعار خيي عمــــــر بتدوّب الحلوين ___ حتى الشبيبه معو قطّرو على الحاشي
ومتلن شفيق الوفي بالشعـر علا جبين ___ روكز حقيقه لقب مــش هيك عالماشي
وبقيت ثناء الأديبهِ وميــــــــن قدا مين ___ حوا بشعرا طفل والحــــب خشخاشي
وبستان مشتى الحلو يـا أجمل بساتين ___ كنا عاوردك حــلا فراشي ورا فراشيِ
وطيور حُب ونسور وجوقة حساسين ___ واليــــــــوم سرن إلك يا منتدى واشي
كانو تماني ســــــــوى شعّار فهمانين ___ بساحــات حرب الزجل فرسان بطّاشي


**************

وإلى موعد أخر لكم مني أجمل التحيات

أخوكم محمد حسن شريم

[نور]

سلام عليكم كيف الحال شباب انا جديد هون بالمنتدى و حبيت شارككم بها القصيدة من تأليفي عن مدينتي التل انشاء الله تنال اعجابكم

يقول مطلع الأغنية :

يا نــوح الطير اللي طلّ ___ بْـمنْـقادو يْـجِبْلـَك مونـِة

لـو ما وَصّـل أرض التل ___ مْـنَـيْن بْـيقطف زيتونـــة ؟

أما الأبيات فهي :

يا تل اللي رْبينا بْـظلّ ** * زَيْـتونك عـا زهر الفلّ

لو نَـسّوني إسم الكل *** إسمك صَـعبة يْـنسّـوني


لو يرجع سيدنا نــوح *** عالدنيا وْ ترْجعلو الروح

بدو صوب التل يْـروح *** يسـقي نـفس الزيتونة


مَـرّة بالغربة رجـال *** شفتو وْ قلبي صَوبو مال

وْ ساعة ما قلي يا خال *** ضمّـيتو بْريف جْـفوني


يا تل الغصن اليبّـاس *** اخضرّ وْ عا نسماتك ماس

صرتي جنة وْ كل الناس *** صــارت فيكي مجنونة


لما الشــاعر رح بيمـوت *** و يصير بْـقلب التابوت

رح تبكي الشام وْ بـيروت *** عا هالدرّة المدفونـِة

التوقيع
من دمعاتي و احساسي عقت الشعر براسي
و صبيتوا بكاس الافكار و يا سامع خدلك كاسة